dëgjoni

Në nënrubrikën "Shkëmbime kulturore" do t'ju njohim me gazetën "Dritare"

Qysh nga numri i saj i parë i botuar në vitin 2004 e deri tani, gazeta "Dritare" në gjuhën shqipe, organi i redaksisë së gjuhës shqipe të Radios së Jashtme të Kinës, ka botuar 9 numra që janë pritur shumë mirë nga lexuesit shqiptarë.

Në numrat e kësaj gazete janë botuar artikuj të ndryshëm me përmbajtje të pasura lidhur me shkëmbimet dhe kontaktet miqësore midis Kinës dhe Shqipërisë në fushat politike, ekonomike, shoqërore, sportive, kulturore, me takimet midis dëgjuesve tanë shqiptarë dhe anëtarëve të redaksisë së gjuhës shqipe të Radios së Jashtme të Kinës në Kinë dhe në Shqipëri dhe me aktivitetet e tyre, me sukseset e korrura nga Kina në rrugën e modernizimit, me arritjet e reja tekniko-shkencore të Kinës, si fluturimi i anijes kozmike me kozmonautë Shënzhou nr.6, me stemën e Lojërave Olimpike të Vitit 2008, si dhe kukullat e fatmirësisë të këtyre lojërave, me trashëgimitë botërore, me disa pakica kombëtare të Kinës si dhe karakteristikat e tyre, me vendet e bukura piktoreske turistike, si dhe me vitin e ri kinez etj.

Në numrin e fundit të gazetës "Dritare" janë paraqitur edhe një herë anëtarët veteranë dhe të rinj të Redaksisë së gjuhës shqipe të Radios së Jashtme të Kinës si dhe rubrikat e drejtuara prej tyre, është bërë edhe paraqitja e përgjithshme e emisionit njëorësh që filloi nga 24 prilli i këtij viti. Në një numër të kaluar të kësaj gazete ishin prezantuar edhe disa shqipfolës të njohur kinezë, si ish-ambasadori i Kinës në Shqipëri Fan Chengzhuo, bashkëpunëtori i Institutit të Letërsisë z. Zheng Enbo dhe ish-shefja e zyrës së Jashtme të Bashkisë së qytetit të Shangait Hua Daming etj.

Profesoresha e fakultetit të gjuhëve evropiane të Universitetit të Gjuhëve të Huaja Xiao Guifen, pasi lexoi numrat e parë të kësaj gazete, kërkoi edhe numrat e tjerë duke koleksionuar të gjithë numrat e kësaj gazete, të cilët do t'i mbajë si kujtim.

Numri i parë i kësaj gazete u lexua edhe nga ish-kryeministri shqiptar Fatos Nano.

Edhe anëtarët e delegacioneve të ndryshme nga Shqipëria që kanë ardhur për vizitë në Kinë e kanë lexuar këtë gazetë. Ata janë befasuar dhe gëzuar kur kanë parë në Kinë gazetën në gjuhën shqipe " Dritare". (Zhai)