dëgjoni

Chen Yan është akorduesja e parë e verbër e pianos në Kinë. Ajo jo vetëm ka mjeshtëri profesionale të akordimit të tingujve, por edhe vullnet të fortë.

Chen Yan lindi në vitin 1973 në provincën Hebei. Për shkak të kataraktit të lindur, ajo nuk sheh fare nga syri i djathtë, ndërsa nga syri i majtë mund të shohë vetëm dritën dhe ngjyrat e dobëta. Kur ishte në moshën 5-muajsh, prindërit e braktisën Chen Yanin dhe ajo u adoptua nga e gjyshja.

Për të nxitur rritjen e shëndetshme të Chen Yanit si fëmijët e tjerë, gjyshja bënte përpjekje të mëdha për forcimin e shqisës së të dëgjuarit dhe të shqisës së të prekurit të Chen Yanit. Kur Chen Yani ishte 4-vjeçe, gjyshja filloi ta stërvitë të ecë sipas shqisës së të dëgjuarit dhe të qepë rroba. Në fillim, Chen Yani haste shumë vështirësi dhe lëndohej shpesh, por pikërisht këto stërvitje e ndihmuan atë të jetonte si një njeri i shëndetshëm dhe të merrej me akordimin e zërave në të ardhmen. Chen Yani e falënderon shumë gjyshen për stërvitjen e saj. Ajo tha:

"Në jetën time, gjyshja është njeriu më i rëndësishëm për mua, jam rritur me dashurinë e saj. Kur isha e vogël, gjyshja shqetësohej shumë se unë nuk mund të jetoja vetëm, prandaj ajo më mësonte të bëja shumë gjëra dhe më inkurajonte të veproja si një njeri i shëndetshëm. Gjyshja më tregoi shumë herë se në botë nuk ekzistojnë gjëra të vështira, çdo njeri duhet të bëjë përpjekje më të mëdha për të arritur suksesin."

Procesi i mësimit në shkollë për Chen Yanin ishte shumë i vështirë. Për shkak të verbërisë, shumë shkolla nuk e lejuan të niste mësimin në to. Deri në moshën 13vjeçe, Chen Yan u pranua në një shkollë fillore të nxënësve të verbër e Pekinit. Qysh në moshë të re, Chen Yanit i pëlqente shumë muzika dhe mësoi shumë vegla muzikore. Gjatë mësimeve në shkollën e nxënësve të verbër, Chen Yan zgjodhi të studiojë mjeshtërinë e akordimit të pianos. Chen Yan tha:

"Kur sapo fillova të mësoj akordimin e pianos, isha e mendimit se kjo nuk ishte një gjë shumë e vështirë për mua sepse unë mund t'i bija mirë pianos. Por në fakt, një piano ka mbi 8000 pjesë këmbimi dhe unë duhet të njoh mirë çdo pjesë."

Është shumë e vështirë për një njeri të shëndetshëm që të njohë mirë mbi 8000 pjesë këmbimi të pianos ndërsa për Chen Yanin kjo është një gjë edhe më e vështirë. Por Chen Yani kishte besim të plotë për kapërcimin e vështirësive. Ajo harxhonte çdo ditë 14 deri në 15 orë për t'u ushtruar në akordimin e pianos e më në fund ajo e zotëroi me sukses këtë mjeshtëri.

Kur ishte në moshën 22vjeçe, Chen Yan mbaroi studimet dhe filloi të kërkojë punë. Por në atë kohë shoqëria kineze nuk pranonte akordues të verbër e Chen Yan pësoi dështime të panumërta. Më në fund Chen Yanit iu dha rasti të bëjë një provë për akordimin e tingujve në një shoqëri pianoje. Ajo e kreu me sukses këtë punë, shoqëria ishte shumë e kënaqur nga puna e Chen Yanit dhe vendosi ta pranojë si punonjëse. Qysh nga ajo kohë, teknologjia e akordimit të pianos e Chen Yanit është mirëpritur gjerësisht nga njerëzit.

Pasi siguroi këtë punë të qëndrueshme, Chan Yan nuk i harroi njerëzit e tjerë me të njëjtin fat si ajo dhe bëri përpjekje të mëdha për t'i ndihmuar. Në vitin 2004, Chen Yan botoi autobiografinë e vet. Në këtë libër, Chen Yan i nxit njerëzit me të meta fizike të mposhtin fatin e pabarabartë dhe të jetojnë si njerëzit e shëndetshëm. Po në këtë vit, Chen Yan hapi shoqërinë Xinyue të akordimit të pianos të Pekinit. Ajo tha?

"Kam dhënë të gjitha fitimet e shoqërisë për t'i ndihmuar akorduesit e verbër. Kam dëgjuar se në Evropë dhe në Amerikë, akorduesit e verbër kanë një histori mbi 100-vjeçare. Kurse në Kinë, ky është ende një sektor i ri. Jam e bindur se me përpjekjet tona, akorduesit e verbër kinezë do të bëhen të famshëm."

Chen Yan është një njeri jetëdashëse, asaj i pëlqejnë noti, çiklizmi, patinazhi etj. Vizatimi ka qenë ëndrra e saj në moshë të re dhe tani Chen Yan po kërkon një mësues vizatimi për ta realizuar këtë ëndërr. (Fani)