Xhudistja e njohur kineze Zhuang Xiaoyan ka lindur më 4 maj të vitit 1969 në qytetin Shenyang të Kinës verilindore. Kjo vajzë e çiltër ka një gjallëri dhe fuqi të madhe të lindur. Sidomos në tapetin e xhudos, ajo shfaq gjithmonë përpara kundërshtarit një energji të jashtëzakonshme, prandaj shokët e saj e quajnë "tigër".

Në vitin 1983, kur ishte 14 vjeçare, Zhuang Xiaoyan hyri në një shkollë amatore për t'u stërvitur në hedhjen e shtizës, më pas ajo u zgjodh nga ekipi i xhudos. Në vitin 1984, ajo hyri në ekipin e xhudos të provincës Liaoning dhe në vitin 1986, u pranua në kombëtaren kineze të xhudos.

Për të shtuar vullnetin e saj, trajneri i bëri asaj një stërvitje të posaçme me 14 ndeshje rresht. Në ndeshjen e 12-të Zhuang Xiaoyan u lodh shumë dhe ra përtokë pa ndjenja. Shoqet e saj të ekipit thërritnin me zë të lartë: "Ngrihu, tigër!" Me vullnet të madh, Zhuang Xiaoyan u ngrit përsëri dhe u sul drejt kundërshtarit.

Në vitin 1986, Zhuang Xiaoyan fitoi titullin nënkampione në kampionatin e xhudos të Kinës dhe në vitin 1987 në Spartakiadën e 6-të Kombëtare të Kinës, ajo fitoi medaljen e artë në xhudon pa dallim peshe. Në vitin 1988, ajo u shpall kampione në ndeshje pa dallim peshe në kampionatin e 7-të ndërkombëtar të xhudos në Japoni. Në vitin 1990, Zhuang Xiaoyan mori një medalje të artë në xhudon pa dallim peshe në Lojërat Aziatike dhe fitoi dy tituj kampione në kampionatin ndërkombëtar të xhudos në Fukuoko të Japonisë. Në vitin 1992, Zhuang Xiaoyan mori pjesë në Lojërat Olimpike të Barcelonës. Në finalen e xhudos në kategorinë 72 kilogramë, Zhuang Xiaoyan u ndesh me një xhudiste të gjatë kubane dhe e mposhti shumë lehtë, duke fituar për Kinën medaljen e parë të artë në xhudo. Pas ndeshjes, specialistët thanë se Zhuang Xiaoyan ishte e pakrahasueshme në tapetin e xhudos. Kjo ishte periudha më e lumtur në jetën e saj, ajo u bë heroina e Kinës.

Pas vitit 1992, krahas nderimit dhe medaljes së artë, Zhuang Xiaoyan fitoi edhe një dashuri të lumtur. "U njohëm në konviktin e kombëtares, ne xhudistet ishim në katin e 3-të, ata boksierët banonin në të katërtin."kujton Zhuang Xiaoyan.

Por pas martesës, Zhuang Xiaoyan zbuloi që ata nuk ishin të përshtatshëm për njëri-tjetrin. Në vitin 1996 ajo u nda nga bashkëshorti i saj dhe tani jeton bashkë me vajzat e saj binjake. Pas mbylljes së karrierës sportive, Zhuang Xiaoyan nuk gjeti një punë të përshtatshme, prandaj gjendja e jetesës së saj u vështirësua shumë.

Kur ndodhej në një gjendje të tilë, Zhuang Xiaoyan u punësua në Akademinë e Sporteve të provincës Liaoning dhe punon aty si trajnere. Megjithëse rroga nuk është e mirë, ajo është e mjaftueshme për jetesën e saj. "Jam mirë tani, akademia më ka dhënë shumë ndihmë" i tha gazetarit Zhuang Xiaoyan me optimizëm.

Gjendja e vështirë e Zhuang Xiaoyan-it u njoh nga Drejtoria e Përgjithshme e Sportit dhe në prag të Festës së Pranverës, Zhuang Xiaoyan mori 20 mijë juanë nga fondi pankinez i sportit. "Nuk e mendoja që qeveria do të më jepte aq shumë ndihmë, e falënderoj shumë!"

Tani, Zhuang Xiaoyan ka nxjerrë shumë mësime nga përvoja e saj. "Kur ishte e re, doja vetëm gjëra me pamje të bukur por nuk u kushtoja rëndësi thelbit të shpirtit të tyre. Tani mendimi im për jetën ka ndryshuar dhe unë dua një jetë të vërtetë!" tha Zhuang Xiaoyan, "Unë nuk do të heq dorë nga kërkimi i lumturisë."

Pas fitoreve në fushën sportive dhe mësimeve nga martesa, Zhuang Xiaoyan u mësua me vështirësitë me të cilat i duhet të përballet. Në vitin 2004, ajo shkoi në Athinë, për të parë nga afër punat përgatitore të Lojërave Olimpike të Athinës. Zhuang Xiaoyan i tha një shoqeje të saj po të ketë mundësi, ajo do të shkojë jashtë Kinës të punojë si trajnere në ndonjë shkollë ose klub xhudoje.

Duket se Zhuang Xiaoyan ende ka një dashuri të madhe për xhudon. (Jiang Lei)