Gazeta kineze "Beijingyulexinbao" njoftoi se më 7 maj në mbrëmje, u shfaq në Pekin drama klasike muzikore e Broadway-it të SHBA-së "West Side Story", kjo shënoi hapjen e Stinës së 4-t ndërkombëtare të shfaqjes së dramave në Pekin. Gjatë 25 ditëve të stinës së shfaqjeve, artistët kinezë, amerikanë, gjermanë etj. do të japin 17 drama për shikuesit.

Stina ndërkombëtare e shfaqjes së dramave e Pekinit filloi në vitin 2003 dhe zhvillohet një herë në çdo vit.

Do të zhvillohet në Republikën e Koresë veprimtaria e shkëmbimeve kulturore "Njohja e Kinës"

Agjencia kineze e lajmeve Hsinhua njoftoi më 9 maj se në shtator të këtij viti do të zhvillohet në Seul të Republikës së Koresë veprimtaria e madhe e shkëmbimeve kulturore "Njohja e Kinës".

"Njohja e Kinës" do të jetë veprimtaria e shkëmbimeve kulturore me përmasat më të mëdha që zhvillohet nga Kina në Republikën e Koresë. Gjatë veprimtarisë do të zhvillohen ekspozita fotografish të shkëmbimeve miqësore kino-jugkoreane, forumi i lartë kulturor e ekonomiko-tregtar kino-jugkorean, shfaqje artistike etj.

Këtë veprimtari e shpalli kryetari i shtetit i Kinës Hu Jintao në nëntor të vitit të kaluar gjatë vizitës së tij në Republikën e Koresë. Gjatë vizitës, udhëheqësit e dy vendeve shprehën dëshirën për zgjerimin e mëtejshëm të shkëmbimeve kulturore.

Kjo veprimtari organizohet nga zyra informative e Këshillit të Shtetit të Kinës dhe ka gjetur përkrahjen e shumë organeve qeveritare dhe të shoqatave ekonomiko-tregtare të dy vendeve.

Fotografë kinezë do të vizitojnë vendet e ASEAN-it për shkëmbime kulturore

Gazeta kineze "Beijingyulexinbao" njoftoi se ditët e fundit, filloi veprimtaria e madhe "Udhëtimi miqësor Kinë-ASEAN" për vitin 2006. Si një aktivitet përbërës, në tetor të këtij viti, fotografë kinezë do të shkojnë në vendet e ASEAN-it për vizitë dhe për shkëmbime kulturore.

Ky aktivitet organizohet nga Shoqata e miqësisë me botën e jashtme e popullit kinez dhe Shoqata e ASEAN-it e Kinës. Sipas planit, fotografë kinezë do të vizitojnë Vietnamin, Laosin, Tajlandën, Birmaninë, Kamboxhian, Malajzinë dhe Singaporin, do të zhvillojnë atje ekspozitën e fotografive "Kina sot" dhe do të fotografojnë panoramat dhe zakonet vendëse.

Rusia do të blejë të drejtën e autorit për 75 lloje librash kinezë

Agjencia kineze e lajmeve Zhongxin njoftoi se më 11 maj, do të hapet në qytetin Changsha të Kinës Panairi i parë i bashkëpunimit ndërkombëtar të të drejtave të autorit i Kinës. Siç bëhet e ditur nga komisioni organizator, në këtë panair, Rusia do të blejë të drejtën e autorit të 75 lloje librash kinezë, kjo do të jetë një kontratë më e madhe tregtare e të drejtave të autorit midis Kinës dhe Rusisë.

Panairi i bashkëpunimit ndërkombëtar i të drejtave të autorit i Kinës ka për qëllim që të përhapë botimet e shquara kineze në botë dhe të nxitë zhvillimin e shëndetshëm të sektorit të botimit të Kinës. (Fani)