Lu Yan lindi në Pekin. Në vitin 1947, ajo dhe familja e saj mërguan në Honolulu të SHBA-së. Në vitin 1956, Lu Yan hyri në një institut drame në Kaliforni për të studiuar interpretim. Pas mbarimit të studimeve, Lu Yan luajti në dramën "Gusht" dhe pati sukses. Talentin e saj në interpretim e pohuan plotësisht specialistët dhe shikuesit. Pas kësaj, Lu Yan filloi jetën e saj si aktore në Hollivud. Ajo zhvilloi disa bashkëpunime me regjisorin e famshëm të Hollivudit Frank Borzage dhe aktorin e famshëm Marlon Brando që kanë fituar çmime Oskar. Për shkak të talentit të lartë në interpretim, Lu Yan u bë e famshme në Hollivud si një aktore me origjinë kineze.

Kur Lu Yan ishte e re, Kina nuk ishte e hapur ndaj botës së jashtme dhe ishte e prapambetur. Shumë të huaj nuk e njihnin këtë vend dhe kishin shumë keqkuptime për të. Lu Yan tha:

"Kur isha e re, nuk kisha shumë raste të xhiroja filma lidhur me subjekte kineze. Sepse në atë kohë, amerikanët nuk e njihnin kulturën kineze. Për ta, Kina ishte një vend i madh, i largët dhe i prapambetur."

Në vitin 1986, Lu Yan interpretoi rolin kryesor të Ci Xi-së në filmin "Perandori i fundit" me financim amerikan. Regjisori i këtij filmi ishte regjisori i famshëm italian Bernardo Bertoluçi. Gjatë xhirimit të filmit, Lu Yan i dha regjisorit shumë këshilla dhe të djëna lidhur me historinë dhe zakonet e Kinës. Në vitin 1987, filmi "Perandori i fundit" fitoi çmimin Oskar si filmi më i mirë.

Më vonë, Lu Yan xhiroi edhe shumë filma në gjuhën kineze duke interpretuar shumë role të paharrueshme. Ajo interpretoi 3 herë personalitetin e famshëm në historinë kineze, nënën e perandorit Ci Xi dhe fitoi 3 herë çmimin "Kali i artë" të filmit të Tajvanit. Lu Yan mori pjesë edhe në xhirimin e filmit të regjisorit të pjesës kontinentale të Kinës Xie Jin "Fisniku i fundit". Krahas këtyre, Lu Yan ka interpretuar role kryesore në shumë drama, drama muzikore etj. Gjatë 35 vjetëve, Lu Yan interpretoi në SHBA, Kinë dhe vende të tjera mbi 200 filma, drama etj. duke fituar dhjetëra çmime. Duke folur për këto çmime, Lu Yan tha?

"Jam shumë e gëzuar që puna ime është pohuar plotësisht. Njëkohësisht jam fatmirë, sepse shumë njerëz më kanë ndihmuar, veçanërisht duhet të falënderoj shumë regjisorët për ndihmën dhe përkrahjen ndaj meje."

Në kohën kur Lu Yan ishte në Kinë, ajo mësoi posaçërisht operën e Pekinit nga artisti i famshëm i operës së Pekinit Mei Lanfang. Ajo ka nivel të lartë interpretimi të operës së Pekinit dhe shpesh jep shfaqje në skenë. Për të përhapur operën e Pekinit në SHBA, në vitin 1980, Lu Yan botoi në SHBA librin "Opera e Pekinit" ku ka përkthyer 5 shfaqje të famshme të operës së Pekinit në gjuhën angleze. Ky libër ka ndryshuar kuptimin e perëndimit për operën e Pekinit. Njëkohësisht ajo provoi të shfaqë operën e Pekinit në gjuhën angleze duke fituar përshëndetjen e shikuesve amerikanë.

Për të nxitur shkëmbimet kulturore midis Kinës dhe SHBA-së dhe për të thelluar njohjen ndërmjet njëri-tjetrit të të dy popujve, Lu Yan ka bërë shumë punë. Ajo ka përkthyer shumë filma, drama dhe vepra artistike të shquara amerikane në gjuhën kineze. Filmi vizatimor amerikan "Miu Miki dhe Rosa Donald" i përkthyer nga ajo është mirëpritur gjerësisht nga shikuesit kinezë. Njëkohësisht me ndihmën e Lu Yanit, shumë aktorë kinezë kanë shkuar në Hollivud për të xhiruar filma duke marrë vlerësim të lartë, si për shembull Zhang Ziyi, Gong Li etj. Lu Yan tha?

"Shpresoj se do të përhap kulturën kineze në SHBA e njëkohësisht do të ndihmoj më shumë regjisorë amerikanë të xhirojnë filma në Kinë. Nëpërmjet bashkëpunimit në xhirimin e filmave, kinezët mund të mësojnë nga përvoja e tyre duke ngritur më tej nivelin e filmave kinezë."

Lu Yan jeton në SHBA, por nuk harron kurrë se ajo është kineze. Ajo jeton sipas zakoneve dhe kulturës kineze. (Fani)