Më 26 mars, u hap në Pekin "Java ndërkombëtare e veshjeve të modës për vitin 2006", që është tregues i ndryshimeve në tregun kinez të veshjeve, duke u bërë prelud i ekspozitave të tekstileve pranverore. Gjatë një jave modelet parakalonin në skenën në formë T-je, duke demonstruar veshjet e modës së fundit të stilistëve të njohur kinezë dhe të huaj. Nga këto punë ju mund të njiheni me modën ndërkombëtare të veshjeve të këtij viti dhe të vitit të ardhshëm. Veshjet e grave në ngjyrë të kuqe, të portokalltë, të kuqërremë, të bardhë dhe të artë pasqyruan bukurinë dhe cilësinë e pastër, të freskët dhe fisnike të femrave. Veshjet e burrave të rehatshme në ngjyrë të shkëlqyeshme dhe brilante janë bërë të modës, kurse ngjyra e verdhë, e kuqerremë dhe e portokalltë është ngjyra kryesore e veshjeve të burrave në pranverë dhe verë.

Në javën e veshjeve të modës, firma e veshjeve të burrave "Bredhi i kuq" paraqiti mbi 100 kostume burrash të stileve të ndryshme. Stilistja e kësaj firme zj. Zhao foli për veçoritë e veprave të saj. Ajo tha:

"Kam ndërthurur faktorë të stileve të ndryshme, si materiale të holla me gëzof, e materiale të pambukta me ato të mëndafshta, të lirit etj, për të krijuar shije dhe stile të ndryshme, ndërsa në veshjet e përditshme kam aplikuar teknologjinë e veshjeve zyrtare etj. Unë shpresoj se veshjet e burrave do të jenë të larmishme dhe do të kenë ndryshime."

Gjatë javës ndërkombëtare të veshjeve, u organizua edhe Ekspozita Ndërkombëtare e veshjeve dhe stolive të Kinës, ku u ekspozuan veshjet e mbi 1 mijë markave të njohura të 18 vendeve dhe rajoneve të botës duke tërhoqur vëmendjen e shumë vizitorëve. Një blerës i huaj u shpreh se këtu mund të shohësh me të vërtetë veshjet kineze të shumëllojshme dhe me çmime të arsyeshme.

Ndihmësja e posaçme e Kompanisë Oudifen, një nga ndërmarrjet e njohura kineze të veshjeve të brendshme, zj. Chen Shuyuan i tha korrespondentit se në ekspozitë janë ekspozuar mbi 1 mijë lloje të veshjeve të brendshme të markës "Oudifen", dhe shumë prej tyre janë mirëpritur nga konsumatoret kineze dhe të huaja.

"Rrezet infra të kuqë të përdorura në disa gjoksore të markës Oudifen mund të nxisin qarkullimin e gjakut. Këto gjoksore cilësore me qëndisje të hollësishme të ngjyrës kafe dhe të artë në formën e gjetheve krijojnë një forcë tërheqëse për gratë, prandaj janë mirëpritur shumë prej tyre."

Përveç veshjeve të gatshme, në ekspozitat e pranverës të tekstileve janë përfshirë edhe ekspozita në përmasa të vogla të lëndëve të para, si stof, basmë etj. Në një ekspozitë të tillë u ekspozuan qindra lloje stofrash të cilësive dhe të ngjyrave të ndryshme të prodhuara nga Fabrika e stofrave e qytetit Xiantao të provincës Hupei. Drejtori i kësaj fabrike z. Zhang Xianliang i tha korrespondentit:

"Në bazë të kërkesave të tregut, çdo vit prodhojmë produkte të reja, p.sh. në veri të Kinës klima është e thatë dhe ka elektrostatikë, kështu në stofra kemi shtuar fibra rrymëpërçuese, kemi aplikuar edhe teknikën antibakterore për të mbrojtur mjedisin. Produktet tona janë njohur nga shumë konsumatore të huaja, mbi 40% e tyre eksportohen në vende evropiane dhe në Japoni."

Në këto ekspozita u ekspozuan edhe fijet e ndryshme të lirit, të pambukut, të fibrave nga proteina e sojës dhe të qumështit. Zv/drejtori i Shoqërisë tekniko-shkencore të fijeve të qumështit Zhengjia të Shanghait z. Zheng Yu tha se fijet prej fibrash të proteinës së qumështit janë të buta si lëkura e dytë e njeriut. Ai tha:

"Këto materiale të reja të nxjerra nga qumështi kanë perspektivë të gjerë. Fibrat e proteinës së qumështit kanë aktivitet të lartë dhe janë shumë të ushqyeshme për lëkurën."

Persnalitetet e qarqeve kineze të veshjeve thonë se marsi i Pekinit është më i bukur, sepse ekspozitat e ndryshme të tekstileve e kanë stolisur Pekinin. Zëdhënësi i Shoqatës së Industrisë Kineze të Tekstileve z. Sun Weibin u shpreh se organizimi i ekspozitave të tekstileve në pranverë ka për qëllim që ndërmarrjet të blejnë në mënyrë të përqendruar produkte të ndryshme, të njohin prirjen e modës, dhe në të njëjtën kohë, të forcojnë shkëmbimet dhe bashkëpunimin me kolegët kinezë dhe të huaj. Z. Sun tha:

"Këto ekspozita në varg pasqyrojnë gjendjen e të gjithë industrisë së tekstileve kineze. Ndërmarrjet e ndryshme ekspozojnë produktet e tyre në një vend dhe në një kohë, për të nxitur zhvillimin e industrisë së tekstileve. Në këto ekspozita marrin pjesë edhe shumë biznesmenë të huaj."

Vitet e fundit, ekspozitat pranverore të industrisë së tekstileve të Pekinit kanë tërhequr shumë biznesmenë të huaj për të marrë pjesë në to dhe për të blerë. Z. Salge Martin i Shoqërisë me përgjegjësi të kufizuar "Novalin France" i tha korrespondentit se çdo vit shoqëria e tij merr pjesë në këto ekspozita, për të zhvilluar shkëmbimet dhe bashkëpunimin me kolegët kinezë.

"Ky është një rast shumë i mirë i shkëmbimeve, këtu ka edhe shumë miq tanët. Në të njëjtën kohë blejmë produkte të përshtatshme dhe u shesim produktet tona klientëve të përshtatshëm." (Pina)