Qitësja e njohur kineze Zhang Shan ka lindur në vitin 1968 në provincën Sichuan të Kinës jugore. Kur ishte në moshë shumë të re, ajo hyri në shkollën sportive dhe filloi stërvitjen e basketbollit. Në vitin 1984, ajo u pranua në ekipin e qitjes të provincës Sichuan dhe filloi stërvitjen në qitjen me dy pjatela për femra.

Megjithëse preku për herë të parë pushkë në moshën 16 vjeçare, Zhang Shan u mësua shpejt me qitjen dhe pas pesë vjet stërvitjeje, d.m.th në vitin 1989, ajo hyri në kombëtaren kineze të qitjes. Po në atë vit, në kampionatin botëror të qitjes me pjatel, Zhang Shan fitoi një titull kampione në qitjen me dy pjatela për femra si individ dhe një tjetër titull kampione në qitjen me dy pjatela si ekip. Gjithashtu në të njëjtën vit, ajo mori një titull kampione në kampionatin e qitjes të Kinës. Një vit më pas, Zhang Shan mori pjesë në kampionatin e 45-të botëror të qitjes dhe fitoi një medalje të artë në qitjen me dy pjatela si individ, duke e thyer rekordin botëror të vendosur nga vetë ajo.

Në vitin 1992, Zhang Shan mori pjesë në emër të Kinës në Lojërat Olimpike të Barcelonës dhe fitoi një medalje të artë në qitjen me dy pjatela si individ, duke vendosur rekord të ri botëror me pikë të plota.

Para Lojërave Olimpike të Barcelonës, një specialist i qitjes bëri një analizë mbi nivelin e qitësve kinezë dhe tha objektivisht: "Në qitjen me dy pjatela, qitësit nga Italia, Spanja, SHBA-ja dhe nga Kuba kanë epërsi të dukshme. Kështu kinezët do të kenë vetëm një mundësi të vogël për një medalje nëse mund të bëjnë paraqitje të jashtëzakonshme." Në atë kohë, kishte vetëm qitje me dy pjatela për meshkuj dhe femrat mund të merrnin pjesë në të, gjë që nuk ishte në të mirë të qitëseve femra. Më 28 korrik të vitit 1992, u zhvilluan garat eliminatore të qitjes me dy pjatela. Njerëzit u befasuan që një qitëse kineze u kualifikua për në gjysmëfinale me pikë të plota dhe ajo ishte femra e vetme. Paraqitja e kësaj kinezeje tronditi të gjithë Barcelonën dhe e gjithë bota u befasua nga lajmi i mëvonshëm, që qitësja kineze Zhang Shan bëri të vetën kurorën e kampiones në qitjen me dy pjatela me rezultatin 200 pikë.

Fitorja e Zhang Shan-it në Barcelonë shënon jo vetëm një kulm në karrierën e saj sportive, por edhe është një faqe e ndritshme e sportit kinez në historinë e Lojërave Olimpike.

Pas fitores së Zhang Shan-it, Komiteti Olimpik Ndërkombëtar e hoqi qitjen me dy pjatela nga disiplinat olimpike, kështu Zhang Shani e mbylli karrierën e saj sportive dhe hyri në universitetin e provincës Sichuan, ku filloi studimet universitare në fakultetin e ekonomisë. Në vitin 1995, ajo formoi një klub qitjeje me emrin e vet, ku punonte si trajnere.

Në vitin 1997, disiplina e qitjes me dy pjatela u rifut në Lojërat Olimpike dhe Zhang Shan vendosi të rikthehet në kombëtaren kineze, duke filluar të përgatitet për Lojërat Olimpike të Sidnejit. Në vitin 1998 në kupën botërore të qitjes, Zhang Shan bëri të vetin titullin kampion, duke u kualifikuar për në Lojërat Olimpike të Sidnejit.

Në këto Lojëra Olimpike, Zhang Shan u radhit vetëm në vendin e tetë dhe pastaj ajo e mbylli karrierën e saj sportive. Në vitin 2004, Zhang Shan u martua me një australian, i cili ishte një qitës profesionist.

Duke folur për të ardhmen, Zhang Shan i tha gazetarit: "Dua të krijoj një klub qitjeje në provincën Sichuan dhe bashkëshoti im do të vijë të më ndihmojë. Synimi im është që ta përhap këtë sport në tërë Kinën. Besoj se në të ardhmen do të përgatitim disa qitës të dalluar. Nëse ndonjë anëtar i klubit tim do të fitojë titullin kampion bote, unë do të jem më e gëzuar se ai."