Ka mbërritur pranvera. Kur vjen në fshatin Hongqi të distriktit Longde në jug të provincës Ninsia të Kinës veri-perëndimore, të bien në sy menjëherë brezaret e rregullta dhe të bukura. Duke biseduar me fshatarë, ndjeva thellësisht në zemër se brezaret i kanë sjellë ndryshime të mëdha jetës së tyre, shkruan korrespondenti. Fshatarët më thanë se ndërtimi i brezareve ka sheshuar shpatet e maleve dhe ka ndryshuar konceptin e vjetër të malësorëve se prodhimi bujqësor varet nga qielli. Sot 90% e familjeve fshatare kanë automjete bujqësore dhe traktorë të lehtë dhe të gjitha familjet kanë krahë të tepërt pune që kanë shkuar në qytete për të punuar.

Fshatari 44 vjeçar Feng Baojun është pasuruar duke rritur lopë. Ai tha: "Në fillim fshatarët e kundërshtuan ndërtimin e brezareve. Ndërsa tani prodhimi i patateve ka arritur në 200 kuintalë për hektarë. Vitin e kaluar nga mbjellja e patateve fitova 3 mijë juanë. Të gjithë thonë se ndërtimi i brezareve është gjëja më e mirë që ka bërë qeveria për fshatarët."

Feng Baojun i tha korrespondentit se vitin e kaluar të ardhurat e familjes së tij arritën në 11 mijë juanë.

Inxhinieri hidraulik i distriktit Longde, Li Chunsheng i kishte shumë të qartë vështirësitë dhe ndryshimet në ndërtimin e brezareve në fshatin Hongqi. Ai tha: "Në fillim disa fshatarë të moshuar me koncepte të vjetra kundërshtuan me vendosmëri ndërtimin e brezareve, kemi bërë shumë punë bindëse."

Ngjarjet për të cilat bën fjalë inxhinieri Li ndodhën në vitet '90 të shekullit të kaluar. Atëherë brezaret ndërtoheshin me makinë me ndihmë ndërkombëtare për prodhimin e drithërave. Fshatarët që shqetësoheshin se mos ndërtimi i brezareve do të keqësonte shtresat e dheut dhe nuk do të rriteshin më kulturat bujqësore, e kundërshtonin me të gjitha mënyrat ndërtimin e tyre. Por në vitin 2000, kur panë me sytë e tyre prodhimin e lartë dhe të qëndrueshëm të fshatrave të tjera të siguruar nga brezaret, fshatarët e fshatit Hongqi ndryshuan mendim dhe filluan të bënin eksperimentime, e më në fund ata ndërtuan aktivisht brezaret. Deri në fund të vitit 2004, në këtë fshat u ndërtuan 7481 hektarë brezare, dhe prodhimi i drithërave arriti nivelin më të lartë në histori.

Inxhinieri Li i tha korrespondentit: "Në vitin 1990, prodhimi i drithërave në fshatin Hongqi nuk arriti as 14 kuintalë për hektarë, ndërsa tani ka arritur në mbi 30 kuintalë për hektarë, të ardhurat neto për frymë ishin mesatarisht 335 juanë, kurse tani janë 1900 juanë. Në të njëjtën kohë kultivohen normalisht patatet dhe bimët vajdhënëse si dhe zhvillohet edhe blegtoria. Sot, në mbarë fshatin Hongqi rriten 1870 krerë lopë dhe vetëm nga rritja e lopëve të ardhurat vjetore mesatare të fshatarëve janë shtuar me 362 juanë." Kur i thotë këto, inxhinierit Li Chunsheng i qesh i lumtur fytyra. (Pina)