Vitet e fundit, janë shtuar pandërprerë shkëmbimet dhe bashkëpunimi ekonomiko-tregtar midis Kinës dhe Rusisë, ndër to më tërheqës është bashkëpunimi në fushën energjetike. Gjatë vizitës së presidentit rus Putin në Kinë kohët e fundit, të dy vendet nënkruan disa marrëveshje të rëndësishme në lidhje me energjinë, duke dhënë një garanci për bashkëpunimin e mëtejshëm midis dy vendeve në këtë fushë.

Në forumin e parë të nivelit të lartë të qarqeve ekonomike, industriale dhe tregtare të Kinës dhe të Rusisë që u zhvillua në Pekin pak kohë më parë, presidenti rus Putin foli për përmbajtjen kryesore të marrëveshjes dypalëshe mbi energjinë:

"Rusia vendosi të ndërtojë një tubsjellës të naftës bruto nga Siberia Lindore në Oqeanin Paqësor. Tani Shoqëria ruse e naftës tubësjellësve dhe Shoqëria e grupit të naftës dhe të gazit natyror e Kinës nënshkruan protokollin përkatës dhe do të studiojnë mundësinë e ndërtimit të tubsjellësit anësor të naftës bruto në Kinë. Zbatimi i këtij objekti do të shtojë furnizimin e Kinës me naftë. Shoqëria me përgjegjësi të kufizuar e industrisë së gazit natyror e Rusisë dhe Shoqëria e naftës dhe e gazit natyror e Kinës nënshkruan dokumentin përkatës dhe po studiojnë projekte të ndryshme për lidhjen e gazsjellësve natyrorë të të dy vendeve."

Në vitin 2005, Rusia i ofroi Kinës mbi 8 milionë tonë naftë bruto, por kjo zuri vetëm një pjesë të vogël të importit të naftës bruto të Kinës. Tani energjia e Rusisë eksportohet kryesisht në tregun evropian, kurse në furnizimin e tregut aziatik me energji ajo ka përparuar ngadalë. Vitet e fundit Kina dhe Rusia kanë bërë përpjekje për bashkëpunimin e mëtejshëm në këtë fushë dhe po konsultohen për ndërtimin e një naftësjellësi nga Rusia në Kinë.

Lidhur me marrëveshjen e bashkëpunimit në fushën energjetike të nënshkruar gjatë vizitës së presidentit Putin në Kinë, specialistja e problemeve ruse e Akademisë së Shkencave Shoqërore të Kinës zj. Li Jianmin tha:

"Zhvillimi i shpejtë i ekonomisë kineze ka nevojë gjithnjë e më të madhe për naftë dhe për importimin e naftës, ndërsa Rusia ka burime të pasura energjetike, ndaj të dyja palët kanë shumë interesa të përbashkët në këtë fushë dhe nënshkrimi i marrëveshjes kino-ruse ka bërë një hap thelbësor."

Kjo specialiste vuri në dukje se, pas ndërtimit të gazsjellësit natyror kino-rus sipas marrëveshjes, Rusia do të eksportojë çdo vit në Kinë 80 miliardë metra kub gaz natyror, shifër kjo që do të përbëjë mbi 50% të eksportit të Rusisë në Everopë.

Përfundimet e bisedimeve mbi investimet për ndërtimin e naftësjellësit anësor nga Rusia në Kinë, e nënshkruar nga dy shoqëritë përkatëse të naftës të Kinës dhe të Rusisë kanë tërhequr vëmendjen e madhe të qeverive të dy vendeve dhe kanë gjetur përkrahjen e fuqishme të tyre. Drejtori i përgjithshëm i Shoqërisë kineze të naftës dhe gazit natyror z. Chen Gëng shprehu besimin e plotë për ndërtimin e këtij naftësjellësi nafte. Ai tha:

"Kohët e fundit, qeveria ruse miratoi projektin e ndërtimit të naftësjellësit të naftës nga Siberia Lindore në Oqeanin Paqësor, duke hedhur një bazë për ndërtimin e tij. Ndërsa ne kemi në plan që krahas ndërtimit të naftësjellësit në Rusi, të investojmë në ndërtimin e naftësjellësit anësor në Kinë."

Pala kineze dhe ajo ruse nënshkruan edhe marrëveshjen në parim për krijimin e ndërmarrjeve me investime të përbashkëta te njëra tjetra, dhe për bashkëpunimin në zbulimin dhe shfrytëzimin e burimeve të naftës të Rusisë dhe në përpunimin dhe shitjen e naftës në Kinë. Rusia ra dakord që shoqëritë kineze dhe ruse të naftës të shfrytëzojnë bashkërisht burimet e pasura të naftës dhe të gazit natyror të Rusisë dhe të ngrihen ndërmarrje me investime të përbashkëta të rafinerisë dhe të shitjes së benzinës dhe të produkteve të tjera të naftës.

Gjatë vizitës në Kinë të presidentit Putin, të dy palët nënshkruan marrëveshje bashkëpunimi në fushat energjetike, financiare, të investimeve, komunikacionit etj.dhe organizuan bashkërisht forumin e parë të nivelit të lartë të qarqeve ekonomike, industriale dhe tregtare të të dy vendeve.

Në referatin e mbajtur në këtë forum kryetari i shtetit i Kinës Hu Jintao bëri të ditur se Kina dhe Rusia kanë përcaktuar fushat kryesore të bashkëpunimit në të ardhmen:

"Të dy vendet duhet të ngrenë peshën specifike të produkteve mekanike në tregtinë dypalëshe, të zgjerojnë përmasat tregtare të produkteve energjetike, të shtojnë investimet në fushat e pajisjeve elektroshtëpiake, telekomunikacionit, të infrastrukturës si dhe në shfrytëzimin dhe përpunimin e thellë të naftës e gazit, pyjeve, burimeve minerale etj."

Hu Jintao u shpreh se ka mundësi të plotë të realizohet vëllimi i tregtisë dypalëshe prej 60 deri 80 miliardë dollarësh amerikanë në vitin 2010 i përcaktuar nga të dyja palët. (Pina)