dëgjoni

Sot në tregjet e krahinave të ndryshme të Kinës, shitet një lloj makine larëse, që i lan rrobat edhe pa përdorur pluhur sapuni. Korrespondenti ynë pa këtë lloj makine larëse të tipit të ri edhe në një mapo aparatesh elektroshtëpiake të Pekinit. Kjo lloj makine larëse 90 centimetra e lartë është në ngjyrë argjendi dhe me kapakun e sipërm të kaltër dhe të tejdukshëm, prandaj është krejt e modës. Ajo jo vetëm duket e bukur, por  ka edhe funksione të jashtëzakonshme. Efekti i saj misterioz u demonstrua gjatë shfaqjes së shitësve.

Një shitës mori një copë peshqiri të bardhë si borë dhe e ndyu me kakao, vaj soje, uthull dhe lëndë të tjera ndotës, pastaj e hodhi në makinën larëse të mbushur plot e përplot me ujë të kulluar. Pas disa minuta larjeje, peshqiri doli shumë i pastër. Kjo gjë na u duk si magji. Duke shpjeguar "sekretin" e kësaj makine larëse, përgjegjësi i Korporatës Kineze Haire , ndërmarrja që e prodhon atë, zoti Ly Peishi tha:

"Kjo lloj makine larëse ndryshon krejt nga makinat larëse të zakonshme, si nga ana e ndërtimit, ashtu edhe nga ana e parimit. Thelbi i saj është sloti i elektrolizës, i cili i pastron rrobat pa përdorur pluhur sapuni."
Duke shpjeguar më tej, zoti Ly tha se, nën veprimin e "slotit të elektrolizës", uji i ujësjellësit mund të zbërthehet në ujë të karakterit kaustik, i cili bën reaksion kimik me papastërtitë në rroba, që janë me karakter acide, si rezultat, papastërtitë zbërthehen dhe rrobat bëhen të pastra.

Korporata Haire i ka shpikur dhe ka filluar t'i prodhojë në seri këto makina larëse të tipit të ri, duke u nisur nga parimi i "mbrojtjes së shëndetit dhe mjedisit". Dihet nga të gjithë se pluhuri i sapunit përmban një sasi të madhe lëndësh kimike, një pjesë e të cilave mund të mbeten në rrobat e lara dhe mund të ngacmojnë lëkurën e njeriut, gjë që shkakton rrjepjen ose kruajtjen e saj. Jo vetëm kaq, por uji i përdorur pas larjes së rrobave me pluhur sapuni edhe ndot rëndë mjedisin.
Në fillim të këtij viti, shteti kinez i dha Korporatës Haire çmimin e progresit tekniko-shkencor për funksionet e mira teknike të kësaj makine larëse. Që nga viti i kaluar, kur u hodh në treg, kjo makinë larëse është mirëpritu nga konsumatorët dhe është bërë një produkt që shitet shpejt.

Zoti Ren Zhenhua, përgjegjës i një mapoje të aparateve elektroshtëpiake të Pekinit, tha se vëllimi i shitjes së makinave larëse pa pluhur sapuni përbën 20% të shitjes së mbi 20 lloje makinave larëse të prodhuara nga Korporata Haire.
Pasi dëgjoi sqarimin që bëri shitësi, zoti Yang Qinglin, që kishte ardhur për të blerë një makinë larëse në këtë mapo, vendosi menjëherë të blinte një nga këto.

"Kjo lloj makine larëse është e pëlqyeshme për ne konsumatorët. Kur përdorim atë, ne kursejmë të hollat, sepse nuk kemi nevojë të blejmë pluhur sapuni. Nga ana tjetër, përdorimi i saj është i dobishëm për mbrojtjen e mjedisit."

Kjo lloj makine larëse, që kushton 5000 juanë, është dy herë më e shtrenjtë se makinat larëse të zakonshme, prandaj ky çmim është tepër i lartë për konsumatorët.

Kurse zonja Vang Yanfang, që tashmë ka filluar të përdorë këtë makinë larëse, tha se, meqenëse kjo makinë larëse kursen ujin dhe energjinë elektrike, përdorimi i saj ka leverdi, edhe pse shitet shtrenjtë.

Ky produkt i Korporatës Haire u tërhoqi vëmendjen shumë miqve të huaj. Pak kohë më parë, shumë biznesmenë nga 10 vende, si SHBA-ja, Zelanda e Re, Singapori, Japonia, Pakistani dhe India, nënshkruan marrëveshje me Korporatën Haier për importimin e këtij produkti. Në një të ardhme të afërt, kjo lloj makine larëse do të eksportohet në më shumë vende të huaja. (Zheng)