Kur Xu Haifeng fitoi medaljen e parë olimpike për Kinën, kishte edhe një qitës kinez që mori një medalje të bronztë në qitje në Lojërat Olimpike të vitit 1984. Ai ka marrë pjesë 6 herë në Lojërat Olimpike në emër të Kinës dhe ka fituar gjithsej 2 medalje të arta, 2 të argjendta dhe 1 të bronztë për Kinën. Ai është qitësi i njohur kinez Wang Yifu.

Wang Yifu ka lindur në vitin 1960 në provincën Liaoning të Kinës verilindore. Ai hyri në shkollën sportive të provincës në moshën 16 vjeçare dhe në ekipin e qitjes të provincës Liaoning në vitin 1977. Në vitin 1979, kur ishte vetëm 19 vjeçar, Wang Yifu mori një titull kampion në garën e qitjes në Spartakiadën e 4-të Kombëtare të Kinës me 573 pikë, duke vendosur një rekord të ri për Kinën. Në vitin 1982 në Lojërat e 9-ta Aziatike, ai fitoi një medalje të bronztë në qitjen me pistoletë me zgjedhje dhe në të njëjtën vit në kampionatin e 43-të botëror të qitjes, ai u radhit në vendin e 6-të në qitjen me pistoletë me zgjedhje. Ndërsa në vitin 1984 në Lojërat e 23-ta Olimpike, ai fitoi një medalje të bronztë për Kinën në qitjen me pistoletë me zgjedhje. Dhe dy vjet më pas në kampionatin e 10-të aziatik të qitjes, Wang Yifu mori dy tituj kampion me ekipin në qitjen me pistoletë me zgjedhje dhe në qitjen me pistoletë me ajër. Në vitin 1987 në kampionatin e qitjes të Kinës, ai fitoi titullin kampion në qitjen me pistoletë me zgjedhje me grykë të ngushtë me 665 pikë, duke thyer rekordin botëror të atëhershme. Në vitin 1990 në botërorin e qitjes, Wang Yifu fitoi dy tituj kampion në qitjen me pistoletë me zgjedhje dhe në qitjen me pistoletë me ajër në largësinë 10 metra, e po ashtu në vitin 1991 në fazë finale të Kupës Botëror të Qitjes, ai bëri të vetin titullin kampion në qitjen me pistoletë me ajër. Në vitin 1992 në Lojërat Olimpike të Barcelonës, Wang Yifu fitoi një medalje të argjendtë në qitjen me pistoletë me ajër. Në garën finale të qitjes me pistoletë, ai nuk u paraqit mirë në fillim dhe në provën e fundit, ai kishte ende 0 pikë?4 më pak se kryesuesi. Për 16 vjet Wang Yifu ishte marrë me qitjen dhe kishte bërë të vetët shumë tituj kampion, por nuk kishte marrë asnjëherë medalje të artë olimpike. Kjo ishte hera e parë që ai ishte aq afër medaljes së artë olimpike dhe fitimi i saj varej nga prova e tij të fundit. Ai e ngriti pistoletën dhe qëlloi në sekondën e fundit dhe në fund, ai fitoi me 0,7 pikë më shumë. Kur doli jashtë ndarjes së tij, Wang Yifu thërriti i emocionuar me lot në sy: "E kisha pritur për 16 vjet!!"

Në vitin 1996, Wang Yifu mori pjesë në Lojërat Olimpike të Atlantës por fitoi vetëm një medalje të argjendtë në qitjen me pistoletë me ajër për shkak të gjendjes jo të mirë shëndetësore. Deri në provën e fundit, ai ishte kryesuesi, por para qitjes, atij i ra të fikët dhe nuk mori dot pikët e mjaftueshme duke u radhitur në vendin e dytë. Në vitin 1997 në Spartakiadën e 8-të Kombëtare të Kinës, ai mori një titull kampion në qitjen me pistoletë me zgjedhje dhe një titull nënkampion në qitjen me pistoletë me ajër. Në vitin 2000 në kampionatin aziatik të qitjes, Wang Yifu bashkë me shokët e tij shënoi rekord të ri botëror në qitjen me pistoletë me ajër me rezultatin 1757 pikë.

Në vitin 2004, Wang Yifu mori pjesë për të gjashtën herë në Lojërat Olimpike. Në fazën finale të qitjes me pistoletë me ajër për meshkuj 10 metra, Wang Yifu u ndesh me qitësin e njohur rus Niestrujev. Në fillim, të dy ishin nervozë dhe nuk u paraqitën siç duhet. Ajo nuk ishte më një garë e teknikës, po një garë e vullnetit. Në fund, Wang Yifu e mposhti presionin e madh dhe fitoi titullin kampion.

Kur u ngjit në podin e dhënies së medaljeve, veterani Wang Yifu derdhi lot. Ai tha në konferencën e shtypit: "Kam marrë pjesë gjashtë herë në Lojërat Olimpike, por kjo është hera e parë që më dalin lot, sepse kjo ishte një fitore e vështirë."

Ndërsa për pjesëmarrjen e Wang Yifu-së në Lojërat Olimpike të Pekinit, kombëtarja kineze ka zhvilluar disa bisedime mbi të. Nëse veterani kinez merr pjesë në Lojërat Olimpike 2008, ai do të jetë sportisti i parë që ka marrë pjesë 7 herë në Lojërat Olimpike dhe ky do të jetë një rekord i ri Gines. (Jiang Lei)