dëgjoni

Feng Jicai është një shkrimtar dhe piktor i famshëm kinez. Vitet e fundit, ai po merret me mbrojtjen e kulturës popullore kineze. Me propozimin e tij, filloi të zbatohet "Programi i shpëtimit të trashëgimive kulturore popullore të Kinës" për të mbrojtur trashëgimitë kulturore popullore kineze që kanë rrezik të zhduken. Për shkak të ndihmesës së madhe në këtë fushë, Feng Jicain e quajnë "Mbrojtësi i kulturës popullore kineze".

Feng Jicai ka ndjenja të thella për kulturën popullore kineze. Shumë kinezë janë të mendimit se Feng Jicai është një studiues që e do historinë dhe mbron kulturën tradicionale dhe pothuajse harrojnë se ai është edhe një shkrimtar dhe piktor i shquar.

Feng Jicai lindi në vitin 1942 në qytetin Tianjin afër Pekinit dhe qysh në moshë të re i donte shumë artet, letërsinë, muzikën dhe sportin. Pas mbarimit të shkollës së mesme, për shkak të shtatgjatësisë së madhe, Feng Jicai u bë një basketbollist profesionist. Por shpejt, ai u dëmtua në ndeshje dhe u largua nga ekipi i basketbollit. Më vonë, Feng Jicai u punësua në një galeri pikturash. Pikërisht në atë kohë, atij filloi t'i pëlqejë arti dhe kultura popullore kineze. Në mes të viteve '70 të shekullit të kaluar, Feng Jicai filloi të krijojë letërsi dhe shkroi disa novela të famshme. Ai është i aftë të përshkruajë jetën e intelektualëve dhe tregimet historike të qytetit Tianjin. Nga veprat e Feng Jicait, lexuesit mund të marrin shumë njohuri historike e kulturore. Veprat e tij janë përkthyer në mbi 10 gjuha të huaja.

Në vitet '90 të shekullit të kaluar, ekonomia kineze filloi të zhvillohet me shpejtësi të madhe. Por në të njëjtën kohë, me shndërrimin e mënyrës së jetesës së popullit, kultura tradicionale pësoi goditje. Feng Jicai i bëri thirrje shoqërisë t'i kushtojë vëmendje kulturës tradicionale. Ai tha:

"Në vitin 1994, lexova në një gazetë se qyteti Tianjin do të rrëzonte tërë qytetin e lashtë për të ndërtuar qytetin e ri. Qyteti i lashtë Tianjin ka një histori prej 600 vjetësh dhe ka shumë trashëgimi kulturore. Unë ftova 70 a 80 studiues dhe fotografë për të nxjerrë në fotografi qytetin e lashtë. Duke filluar nga ajo kohë, vendosa të shpëtoj kulturën e tij tradicionale."

Gjatë një viti e gjysmë, Feng Jicai dhe këta studiues e fotografë bënë mbi 30 mijë fotografi e më në fund botuan 4 albume fotografike. Këto fotografi shënuan trashëgimitë historike e kulturore të qytetit të lashtë Tianjin duke i nxitur njerëzit t'i mbrojnë këto trashëgimi. Pas kësaj, Feng Jicai i ka kushtuar më shumë vëmendje mbrojtjes së kulturës tradicionale dhe ka ndërmarrë shumë veprime të rëndësishme për mbrojtjen e kulturës tradicionale. Ai ka shkruar shumë artikuj ku u bëhet thirrje njerëzve të përkrahin mbrojtjen e kulturës tradicionale dhe ka botuar vepra të posaçme lidhur me studimet e kulturës tradicionale. Feng Jicai tha:

"Duhet të përkrahim dhe mbrojmë kulturën tradicionale, përndryshe shumë trashëgimi kulturore do të zhduken."

Në vitin 2003, me përpjekjet e Feng Jicait, Shoqata e Artistëve Popullorë e Kinës filloi "Programin e shpëtimit të trashëgimive kulturore popullore të Kinës". Ky program do të hetojë dhe do të mbrojë trashëgimitë kulturore kineze që kanë rrezik të zhduken. Por për shkak të mungesës së fondeve, programi ka hasur shumë vështirësi. Për të përkrahur këtë çështje, Feng Jicai ka shitur shumë piktura dhe me këto të ardhura, ai krijoi "Fondacionin e Kulturës Popullore Feng Jicai".

Përpjekjet e Feng Jicait kanë pasur mjaft rezultat, mbrojtja e kulturës popullore ka tërhequr vëmendjen e përkrahjen e qeverisë dhe të shoqërisë. Qeveria kineze e përcaktoi të shtunën e dytë të qershorit si "Ditën e trashëgimive kulturore" dhe do të hartojë ligjin për të mbrojtur kulturën popullore. Po hartohet lista e trashëgimive shtetërore kulturore jomateriale.

Feng Jicai tha se ideali i tij është që të shkruajë përsëri novela, por tani ai është i zënë tërë ditën dhe nuk ka kohë. Feng Jicai tha se ai nuk ka zgjedhje tjetër:

"Tani mbrojtja e kulturës popullore është detyra kryesore për mua, sepse e dua shumë atë." (Fani)