dëgjoni

"Lidhja e Kulturës Aziatike" do të krijojë selinë e përgjithshme në Tianjin të Kinës

Agjencia kineze e lajmeve Hsinhua njoftoi se siç bëhet e ditur nga Forumi Aziatik i Sektorit Kulturor dhe i Bashkëpunimit Rajonal i zhvilluar ditët e fundit në qytetin Tianjin të Kinës, "Lidhja e Kulturës Aziatike" do të krijojë selinë e përgjithshme në Tianjin.

"Lidhja e Kulturës Aziatike" u krijua me propozimin e organizatave kulturore të 16 vendeve e rajoneve aziatike në Konferencën e Bashkëpunimit Kulturor të Azisë të zhvilluar në vitin 2004 në Pekin. Qëllimi i kësaj lidhjeje është për forcimin e shkëmbimeve dhe të bashkëpunimit kulturor midis vendeve të ndryshme aziatike.

Mësohet se "Lidhja e Kulturës Aziatike" do të ndërtojë "Qendrën e Sektorit Kulturor të Azisë". Pas përurimit, kjo qendër do të jetë qendër e shkëmbimeve të kulturës aziatike dhe bazë e eksportit të produkteve kulturore kineze e njëkohësisht do të jetë një zonë e re kulturore që nxit zhvillimin e ekonomisë rajonale.

U botua "Raporti i zhvillimit të radio-film-televizionit të Kinës për vitin 2006"

Gazeta kineze "Jinwanbao" njoftoi se më 12 prill, u botua "Raporti i zhvillimit të radio-film-televizionit të Kinës për vitin 2006" i hartuar nga Qendra Studimore e Zhvillimit dhe Reformës pranë Drejtorisë së Përgjithshme Shtetërore të Radio-Film-Televizionit të Kinës. Ky është raporti i parë vjetor lidhur me zhvillimin e radio-film-televizionit në Kinë.

Raporti është ndarë në 4 pjesë ku shtjellohen gjendja e zhvillimit të radio-film-televizionit kinez në vitin 2005, problemet kryesore në zhvillimin e radio-film-televizionit, gjendja e zhvillimit të sektorit të radio-film-televizionit dhe perspektiva e zhvillimit të këtij sektori.

Do të zhvillohet në Pekin Panairi i Muzeumeve për vitin 2006

Gazeta kineze "Xinjingbao" njoftoi se nga 17 deri më 19 shtator do të zhvillohet në Pekin Panairi i Muzeumeve për vitin 2006.

Në këtë panair do të zhvillohen ekspozita e muzeumeve të Kinës dhe të huaja, ekspozita e produkteve dhe teknologjive përkatëse të muzeumit, forumi ndërkombëtar i drejtorëve të muzeumeve etj. Parashikohet se në këtë panair do të marrin pjesë 250 institucione përkatëse.

Teatri Shtetëror i Operës dhe i Baletit i Ukrainës do të japë shfaqje në Kinë

Gazeta kineze "Jinghuashibao" njoftoi se më 26 e 27 prill, Teatri Shtetëror i Operës dhe i Baletit i Ukrainës do të shfaqë baletin "Liqeni i Mjellmave" dhe "Bukuroshja e fjetur" në Pekin. Kjo është hera e parë që ky teatër jep shfaqje në Kinë.

Teatri Shtetëror i Operës dhe i Baletit i Ukrainës u krijua në vitin 1932 dhe ishte një nga 3 teatrot më të mëdha të ish-Bashkimit Sovjetik që kishte famë të madhe në skenën ndërkombëtare. Baleti "Liqeni i Mjellmave" dhe baleti "Bukuroshja e fjetur" janë vepra të kompozitorit të famshëm rus Çajkovski. (Fani)