Vitet e fundit, me zhvillimin e vazhdueshëm dhe të qendrueshëm të ekonomisë kineze, janë krijuar çdo vit shumë ndërmarrje të reja, ndër to ndërmarrjet me zhvillim të shpejtë që kanë të ardhme te mirë fitimi dhe zhvillimi parapëlqehen nga firmat e investimeve me rrezik kineze dhe të huaja, siç janë Kompania e internetit Baidu me faqen e saj kërkuese të njohur në gjuhën kineze, Kompania mikroelektronike Zhongxing që merret me studimin dhe prodhimin e çipeve të multimedias digjitale etj., kanë tërhehur investime me rrezik kineze dhe të huaja.

Zona tekinko-shkencore Zhongguancun e Pekinit është qendra më kryesore e krijimeve të reja tekniko-shkencore të Kinës, ku numërohen 17 mijë ndërmarrje, shumica dërmuese e të cilave janë në fazën fillestare të krijimit ose në atë të rritjes. Ndërmarrjet e kësaj zone përbëjnë mbi 40% të 50 ndërmarrjeve më të mira të industrisë tekniko-shkencore në pjesën kontinentale të Kinës.

Në një intervistë të dhënë për korrespondetin e radios sonë, nënkryetari i Komitetit Administrativ të Zonës tekniko-shkencore Zhongguancun z. Guo Hong tha se gjatë dy vjetëve të fundit në këtë zonë janë shtuar 4 mijë ndërmarrje të reja, të ardhurat e shitjes së 600 ndërmarrjeve të kësaj zone i kanë kaluar të 100 milionë juanët. Rritja e shpejtë e bizneseve të këtyre ndërmarrjeve ka tërhequr shumë investime të huaja. Z. Guo tha:

"Nga të dhënat e raportit mbi investimet në Kinë del se vitin e kaluar, 72 ndërmarrje pekinase tërhoqën nga jashtë 378 milionë dollarë amerikanë investime, kështu Pekini zuri vendin e parë në tërheqjen e investimeve të huaja, duke e kaluar qytetin e Shangait dhe provincën Jiangsu, të marra së bashku."

Vitet e fundit, degët industriale të internetit, telekomunikacionit të lëvizshëm, të softeve etj. kanë marrë një zhvillim të shpejtë në Kinë, shumë ndërmarrje me rritje të shpejtë të këtyre degëve kanë tërhequr vëmendjen e investorëve të huaj, duke u bërë objekti i investimeve të tyre. Të nxitur nga e ardhmja me fitime të mëdha këta investorë kanë hyrë njeri pas tjetrit në tregun kinez për të gjetur ndërmarrje me potencial të madh zhvillimi.

Grupi digjital ndërkombëtar i Amerikës është një organ ndërkombëtar i investimeve me rrezik, që ka hyrë më herët në Kinë. Qysh nga viti 1992, kur hyri në tregun kinez, ai ka investuar në mbi 150 ndërmarrje kineze të teknikës së informacionit me potencial të madh. Nënkryetari i Fondit të investimeve për krijimet teknike të këtij grupi amerikan z. Li Jianguan i tha korrespondentit:

"Ne kemi investuar mbi 90% të fondeve në fushën e teknikës së informacionit, si në atë të internetit, të softeve, të shërbimeve përkatëse të telekomunikacionit etj."

Z. Li tha se përqindja e fitimit nga investimet me rrezik në Kinë arrin në 40%, duke e kaluar shumë fitimin e Grupit Digjital Ndërkombëtar të Amerikës në vendin e saj. Gjatë 3 a 4 vjetëve të ardhshëm, ky grup do të investojë në Kinë 500 deri 600 milionë dollarë amerikanë.

Tani në Kinë aktivizohen mbi 30 firma ndërkombëtare të investimeve me rrezik, prej të cilave më aktive janë The Wiharper Group, Soft Bank, Goldman Sachs etj. në zonat me ekonomi të gjallëruar dhe në zonat tekniko-shkencore të Kinës, për të investuar dhe ndjekur ato objekte që kanë perspektivë zhvillimi. Kina është bërë tashmë një pikë e nxehtë e investimeve ndërkombëtare me rrezik.

Ndërmarrjet kineze me rritje të shpejtë kanë tërhequr jo vetëm investimet e huaja me rrezik, por edhe investorët kinezë. Shoqëria me përgjegjësi të kufizuar e investimeve Infotech, e krijuar në vitin 2000, është një kompani kineze e investimeve me rrezik, e cila investon kryesisht në fushën e teknikës së informacionit, si të qarqeve të integruara, softeve, pjesëve të këmbimit etj. Zv/drejtori i kësaj shoqërie z. Zhou Ning i tha korrespondentit:

"Shoqëria jonë ka investuar në disa objekte, njera prej tyre është Shoqëria e projektimit të çipeve, që është kompania e parë kineze e kuotizuar në Nosdaq, vitin e kaluar. Ky është një objekt me efektivitet të mirë ekonomik dhe do të kemi fitime të mira."

Shoqëria e çipeve ku ka investuar Shoqëria Infotech është Shoqëria mikroelektronike Zhongxing, që fitoi me çipet e veta të multimedias digjitale çmimin e parë të progresit tekniko-shkencor shtetëror të Kinës në vitin 2004, duke u ngritur si shembull tipik i ndërmarrjeve me rritje të shpejtë. Pas krijimit të saj në vitin 1999 kjo shoqëri ka zënë 70% të tregut botëror.

Në të njëjtën kohë, edhe disa zona industriale të teknologjisë së re dhe të lartë kineze po përpiqen të tërheqin sa më shumë investime me rrezik. (Pina)