Më 17 mars, me të zbritur nga aeroplani, Ven Jiabao shkoi në fshatra të distriktit Xia në jug të provincës Shanxi, i shoqëruar nga sekretari i Partisë Komuniste të Kinës për provincën Shanxi, Zhang Baoshun dhe nga kryetari i provincës Yu Youjun.

I moshuari Shi Fanding po harrte barërat në arë. Ven Jiabao iu afrua dhe e pyeti me përzemërsi se si u zhvilluan punimet e dy sesioneve. I moshuari Shi iu përgjigj i gëzuar: "Shumë mirë. I pamë punimet e sesioneve në televizor. Politikën që kemi pritur ju e shpjeguat me hollësi në raportin mbi veprimtarinë e qeverisë. Jo vetëm nuk do të paguajmë taksat për punimin e tokës, por mund të marrim edhe subvencione, kështu që në të gjitha tokat e lëna djerr do të mbillen drithëra."

Ndërsa fshatari i fshatit Nanshi të distriktit Xia, Çen Xiaovang tha se "raporti mbi veprimtarinë e qeverisë ka shprehur mendimet tona."

Në arë dhe në shtëpitë e fshatarëve Ven Jiabao u shpjegoi hollësisht fshatarëve masat politike për mbështetjen e fshatit dhe fshatarëve, të parashtruara në raportin mbi veprimtarinë e qeverisë dhe iu përgjigj pyetjeve të tyre.

Sekretari i organizatës bazë të PK të Kinës për fshatin Shijiazhuan të distriktit Linyi, kryetari i Komitetit të fshatit, Zhang Zhansheng tha se në raportin mbi veprimtarinë e qeverisë thuhet se këtë vit fondi i qeverisë qendrore për mbështetjen e fshatit do të arrijë në 339 miliardë e 900 milionë juanë. Sipas llogaritjes së tij, secilit fshatar do t'i takojnë mbi 300 juanë, ndaj ai paraqiti propozime për shpërndarjen dhe përdorimin e këtij fondi. Lidhur me këtë Ven Jiaobao tha se do të përdoret si duhet ky fond në kryerjen e punëve që kanë të bëjnë me interesat jetikë të fshatarëve.

Provinca Shanxi ndodhet në rrafshnaltën e Dheut të verdhë. Këtu sasia mesatare e reshjeve vjetore është vetëmsa një e katërta e nivelit mesatar të mbarë vendit, prandaj problemi i ujit është një pengesë e madhe në zhvillimin e kësaj province. Ven Jiabao i ka kushtuar vëmendje të madhe ndërtimit të veprave hidraulike në këtë provincë. Gjatë vizitës në distriktet Xia dhe Linyi më 17 mars, Ven Jiabao u tha fshatarëve se e shqetëson gjithmonë problemi i ujit, duke shprehur vendosmërinë për të kryer mirë punën e përmirësimit të ujit me përmbajtje të lartë fluori, në mënyrë që fshatarët të mos pinë më ujë të dëmshëm për shëndetin. Ai theksoi se duhet të investohen më shumë fonde në ndërtimin e infrastrukturës hidraulike e të ndërmerren masa për kursimin e ujit, për të zgjidhur sa më shpejt problemin e ujit të pijshëm të njerëzve dhe të bagëtive.

Kryeministri Ven Jiabao inspektoi edhe disa spitale dhe shkolla fillore dhe të mesme të fshatit. Në auditorin elektronik të shkollës së mesme të fshatit Xyjiaying, mësuesit i treguan kryeministrit Ven për arsimimin në distancë të largët. Në këtë shkollë të largët malore, nxënësit mund të dëgjojnë leksionet e mësuesve të njohur ashtu si nxënësit e qytetit. Ven Jiabao u shpreh se detyra më e rëndësishme është zbatimi i arsimit të detyrueshëm falas, që fëmijët e fshatit të gëzojnë të drejtën e barabartë të arsimimit si fëmijët e qytetit.

Fshatari He Jucai i tha kryeministrit Ven se politika favorizuese e shtetit është shumë e mirë, por ndryshimi i pamjes së fshatit duhet mbështetur në përpjekjet e vetë fshatarëve. Ven Jiabao tha se fondet e shtuara nga qeveria për ndërtimin e infrastrukturës dhe për zhvillimin e çështjeve sociale do të përdoren kryesisht në të ardhmen në fshat, ky është një ndryshim i madh. Shteti do të përkrahë ndërtimin e fshatit të ri, por më kryesorja është mobilizimi i iniciativës dhe i forcave krijuese të fshatarëve. (Pina)