Nga të dhënat e një ankete del se "vështirësitë dhe shpenzimet e mëdha të mjekimit " u bënë një çështje e madhe që zuri vendin e 2-të ndër 10 problemet kryesore të jetës shoqërore në Kinë, për të cilat shprehën shqetësim masat popullore në vitin 2005. Mjekja pensioniste e kombësisë tartare e Rajonit Autonom Sikiang-ujgur të Kinës Veriperëndimore, zonja Etibai Is'hakva tha se rajoni i saj ka një farë përvoje fillestare në zgjidhjen e problemit e sipërpërmendur.

Para se të dilte në pension, zonja Etibai punonte si shefe e repartit të patologjisë të Spitalit të Mushkërive të rajonit Sinkiang. Gjatë mbi 30 vjetëve të praktikës, ajo kuptoi mirë se mjekimi ka të bëjë me interesat jetike të masave popullore, sidomos të banorëve me vështirësi ekonomike, që nuk kanë të ardhura të qëndrueshme dhe që bëjnë një jetë duke u mbështetur në ndihmën e qeverisë për sigurimin e nivelit minimal të jetesës, ata kanë më shumë frikë se mos do të sëmuren. Ajo tha se, vitet e fundit, me ngritjen e spitaleve të ndihmës për banorët me vështirësi ekonomike në zonat e ndryshme të Sinkiangut, problemi i mjekimit të këtyre masave është zbutur.

"Spitalet e ndihmës për masat në vështirësi janë spitale specifike, të ngritura me vendimin e qeverisë mbi bazën e spitaleve të lagjeve, për të zgjidhur problemet e mjekimit të atyre banorëve që jetojnë duke u mbështetur në ndihmat e qeverisë për sigurimin e nivelit minimal të jetesës. Tani në të gjitha zonat e Sinkiangut janë ngritur spitale të tilla në rang rajoni dhe në rang qarqesh administrative."

Ajo tha se qeveria dhe sektorët e shëndetësisë të rajonit autonom të Sinkiang-ut dhanë fonde të posaçme për ndërtimin e këtyre spitaleve dhe për blerjen e pajisjeve. Familjet me të ardhura të ulëta dhe banorët me vështirësi ekonomike mund të gëzojnë favore në këto spitale, mjafton të tregojnë dëftesën e lëshuar nga zyra e lagjes.

Gjatë kohës kur pacientë të tillë janë të shtruar në spital, ata ushqehen falas me një standard mbi 12 juanë në ditë. Zonja Etibai tha e emocionuar se ngritja e spitaleve të ndihmës për masat me vështirësi ekonomike është një punë shumë praktike që bëri qeveria e Rajonit Autonom për të mirën e masave popullore. Këto spitale jo vetëm kanë zgjidhur problemet që lidhen me interesat jetike të masave, por edhe kanë dhënë kontribut të madh për stabilitetin e Sinkiangut dhe për formimin e një shoqërie harmonike.

Siç mësohet, në spitalet e ndihmës për masat në vështirësi, ende ekzistojnë disa probleme dhe problemi më i dukshëm është se shfrytëzimi i shtretërve në këto spitale është larg shfrytëzimit maksimal. Kjo ka lidhje me faktin se disa pacientë nuk i njohin mirë këto spitale dhe nuk besojnë plotësisht në teknikën e tyre mjekësore. Zonja Etibai propozoi që të shpejtohet përsosja e sistemit të shëndetësisë komunale me qytetin dhe fshatin si një të tërë. Ajo tha:

"Spitalet e mëdha duhet të ngrejnë filialet e tyre në lagje dhe mjekët e tyre duhet të japin mësime dhe të bëjnë shërbime klinike në to, me qëllim që masat të dinë se edhe filialet e spitaleve të mëdha kanë specialistë që mjekojnë, bile mjekojnë me shpenzime të ulëta."

Zonja Etibai shpreson se, në një të ardhme jo të largët, banorët me vështirësi ekonomike në Kinë do të gëzojnë shërbime mjekësore edhe më të mira, më të lira dhe me më shumë lehtësira.

"Pacientët, që vuajnë nga sëmundje e lehtë, mund të mjekohen në lagje, gjë që do të lehtësojë barrën e spitaleve të mëdha, do të pakësojë shpenzimet e mjekimit dhe do të evitojë përcaktimin e diagnozave të gabuara. (Zheng)