"Lu Li" është jo vetëm emri i një vajze që ka fituar medalje të artë olimpike, por edhe emri i një lëvizjeje të vështirë në paralelen e shkallëzuar gjimnastikore. Para vitit 1992, vetëm mbretëresha e gjimnastikës Komaneç kishte arritur të merrte 10 pikë në garat olimpike gjimnastikore. Por në Lojërat Olimpike të Barcelonës, një kineze 16 vjeçare fitoi zemrat e të gjithë anëtarëve të jurisë dhe e mbaroi garën e saj me 10 pikë. Ajo vajzë është Lu Li, gjimnastja e njohur kineze.

Lu Li ka lindur në vitin 1976 në qytetin Changsha të Kinës jugore, ndërsa stërvitjen gjimnastikore e filloi në vitin 1983. Në vitin 1985, pas një paraqitjeje të mirë, ajo hyri në shkollën sportive të qytetit Changsha. Paraqitja e mirë e Lu Li-së tërhoqi vëmendjen e trajnerit të ekipit të provincës. Por gjatë kontrollit shëndetësor, u zbulua që Lu Li ishte me hepatit. Trajneri i saj Yan Ninan i tha gazetarit: "Më erdhi keq kur mora vesh për të. Në ekipin tonë nuk lejohet të pranohet as një lojtar me sëmundje ngjitëse, por Lu Li ishte një gjimnaste me talent dhe unë doja ta pranoja. Prandaj unë nuk ia thashë askujt këtë gjë." Në vitin 1988, Lu Li u pranua zyrtarisht në ekipin e gjimnastikës të provincës Hunan. "Në fillim, ndoshta për shkak të gjendjes së keqe shëndetësore, Lu Li stërvitej me shumë vështirësi dhe çdo ditë unë i jepja asaj shumë ilaçe për të kontrolluar keqësimin e sëmundjes."

Deri në vitin 1989, para spartakiadës kombëtare për të rinj, Lu Li arriti të kryejë një lëvizje shumë të vështirë. Por gjendja e saj u keqësua dhe ajo duhej të bënte pushim. Ish-mjeku i ekipit të Lu Li-së u shpreh: "Në fillim të vitit 1991, kombëtarja kineze kërkoi ta përfshijë në gjirin e saj, ne u thamë që Lu Li nuk ishte mirë me shëndet dhe nuk i thamë asgjë lidhur me sëmundjen e saj. Dhe në fund të atij viti, kombëtarja dha një urdhër për të marrë Lu Li-në. Pasi hyri në kombëtare, sëmundja e saj u zbulua në kontrollin shëndetësor. Për të përgatitur një gjimnaste të dalluar, ekipi kombëtar vendosi të mos e largojë dhe kështu Lu Li stërvitej gjithmonë me doreza." Trajneri i kombëtares kineze Xiong Jingbin tha: "Krahas Lu Li-së, edhe lojtarë të tjerë të ekipit stërviteshin me doreza, e kjo kishte ndikim të madh në gjendjen shpirtërore të Lu Li-së. Dhe për më tepër, për shkak të sëmundjes së saj, Lu Li nuk u përfshi në listën e pjesëmarrësve në stërvitjen e posaçme. Ndoshta të gjitha fitoret e mëdha kërkojnë sakrifica të mëdha."

Në vitin 1991, në kampionatin kombëtar të gjimnastikës, Lu Li fitoi titullin kampione në paralelen e shkallëzuar. Më pas në vitin 1992 në kampionatin botëror të gjimnastikës si individ, ajo zuri vendin e 4-t në paralelen e shkallëzuar, ndërsa më pas në Barcelonë, Lu Li fitoi një medalje të artë në paralelen e shkallëzuar dhe një medalje të argjendtë në traun e ekuilibrit. Pas kësaj fitoreje të madhe, ajo u dekorua nga Drejtoria e Përgjithshme e Sportit e Kinës me një medalje sportive nderi.

Në vitin 1994, Lu Li mbylli karrierën e saj sportive 13 vjeçare dhe hyri në Universitetin e Sportit të Pekinit, kurse një vit më pas, ajo hyri në Universitetin e Pekinit për studime të mëtejshme. Në shkollë, shokët dhe pedagogët i dhanë asaj ndihmë të madhe, por ajo nuk u mburrej dhe studionte me zell. Duke kujtuar kohën e shkollës, Lu Li tha: "Megjithëse korra sukses, fitorja në sport nuk është gjithçka në jetën time, por është vetëm një zanafillë për mua."

Pas diplomimit, Lu Li shkoi në Amerikë dhe formoi në Las Vegas klubin gjimnastikor "AAC". "Këtë emër ma sugjeroi një mik amerikan, dhe do të thotë: kampion i gjithanshëm." Lu Li tha: "Në njëfarë mënyre, jeta në Amerikë është një sfidë për mua. Po të qëndroj në Kinë, do të më ndihmojnë shokët e mi dhe nuk do të kem mundësi të tregoj veten. Kurse tani në Amerikë, unë duhet të rregulloj gjithçka vetë dhe ky është një rast i mirë për të forcuar aftësinë time." (Jiang Lei)