"Mua më duket se zhvillimi i shkencës dhe teknikës ka hyrë në një etapë të rëndësishme, që vendos fatin e vendit tonë. Vendburimet natyrore te ne janë të kufizuara dhe, në rrethanat e globalizimit të ekonomisë, të gjitha problemet duhet t'i marrim parasysh duke shikuar sfondin botëror. Prandaj, po të mos zinim një pikë të lartë në zinxhirin industrial, ne nuk do të bënim gjë tjetër veçse do të merrnim një fitim modest, duke sakrifikuar shpërblimet që punonjësit tanë meritojnë t'i marrin. Kjo gjë ka të bëjë me strategjinë e shtetit tonë. Ne duhet medoemos të krijojmë të reja duke u mbështetur në forcat tona. Ne mund të garantojmë sigurinë e vendit vetëm duke përvetësuar me të vërtetë teknologjinë thelbësore. Po të flasin në këtë prizëm, mospërparimi do të thotë zmbrapsje dhe këtu nuk ka rrugë alternative: mund të ndjekim vetëm rrugën e shpejtimit të zhvillimit të shkencës dhe teknikës."

Po, nuk ka rrugë zmbrapsjeje dhe Kina duhet të ndjekë vetëm rrugën e krijimit të të rejave. Ndërsa, krijimi i të rejave kërkon mendjen e njeriut, kërkon zgjuarsinë, kërkon talentin. Lidhur me këtë, foli zoti Lin Shengzhong, bashkëpunëtor shkencor i institutit studimor të vendburimeve minerare pranë Akademisë së Shkencës së Gjeologjisë të Kinës.

"Ndoshta ndër njësitë gjeologjike, instituti ynë posedon më shumë pajisje të mira, por që nga vitet '90 të shekullit të kaluar, studiuesit e shumë temave e ndiejnë veten si një njeri që ka mbetur në gjendjen as të ngopjes dhe as të urisë. Në përdorimin e pajisjeve, zbatohet parimi i vetëpërgjegjësisë për fitimin dhe për humbjen, prandaj, kur mungojnë fondet e mjaftueshme, çdokush sprapset. Si pasojë, këto pajisje të mëdha vjetrohen dhe nxirren jashtë përdorimit. Vitin e kaluar, Ministria e Shkencës dhe Teknikës dha një fond prej 30 milionë juanësh, me të cilin u blenë pajisje të reja, mirëpo nuk pati njeri që t'i përdorë ato, sepse punonjësit veteranë të shkencës dhe teknikës kanë dalë në pension, ndërsa të rinjtë ende nuk kanë ardhur."

Ne e kuptojmë mirë shqetësimin e zotit Lin. Ashtu është, krijimi i të rejave nuk mund të shkëputet nga njeriu. Përsa i përket numrit të punonjësve të shkencës dhe teknikës, Kina zë vendin e parë në botë, kurse që nga koha e reformës dhe hapjes, përparimi i shkencës dhe teknikës, që quhet "forca e parë prodhuese", ka dhënë një kontribut që përbën vetëm 39% të faktorëve të rritjes së ekonomisë, kurse në vendet e zhvilluara, kjo përqindje i kalon 70%. 10 ndërmarrjet më të fuqishme kineze të telekomunikacionit kanë fituar brenda 5 vjetëve aq patenta sa kompania amerikane IBM fiton për një vit. Në kongresin kombëtar kinez të shkencës dhe teknikës, u la bosh vendi i çmimit shtetëror të shpikjes tekniko-shkencore, që është një çmim domethënës, dhe kjo gjë u bë fokusi i vëmendjes së mediave. Lidhur me këtë, akademiku i Akademisë së Shkencave të Kinës, Vang Zhizhen shprehu mendimin se një nga arsyet e rëndësishme është mospërsosja e organizimit të punës në fushën e eksperimentimeve shkencore të Kinës.

"Sot në vendin tonë, ka problem në rendin administrues ekzistues të fondit të eksperimenteve shkencore. Punonjësit e eksperimenteve shkencore harxhojnë shumë kohë për të rregulluar objektet e eksperimenteve dhe për vlerësimin e arritjeve, gjë që ndikon negativisht mbi cilësinë e arritjeve të eksperimenteve shkencore. Sot në disa njësi të eksperimenteve shkencore dhe në disa shkolla të larta, ekziston prirja e thjeshtësimit të vlerësimit të punonjësve të talentuar, për shembull, i kushtohet vëmendje vetëm sasisë së disertacioneve të botuara dhe jo cilësisë dhe vlerës shkencore të tyre. Metoda e thjeshtësuar e vlerësimit nuk përputhet me ligjet e eksperimenteve shkencore dhe, si pasojë, shumë punonjës të eksperimenteve shkencore nxitojnë për të përfituar, siç thonë ata me terminologjinë e gjuajtjes në ndeshjet e volejbollit 'gjuajtja e shkurtër, e sheshtë, e shpejtë', dhe nuk duan të marrin përsipër detyrat e eksperimenteve shkencore të temave "të larta, të sakta dhe të majës", madje, kjo solli veprime të shumta të gabuaranë çështjet akademike."

Punonjësit e talentuar janë faktori kryesor i krijimtarisë autonome. Drejtori i përgjithshëm dhe kryeadministratori i Kompanisë Stakan UT, zoti Vu Ying tha se baza e funksionimit të shpejtë të kompanisë së tij është ngjyrimi specifik i administrimit, që përmblidhet në fjalët "mençuria orientale dhe krijimtaria perëndimore". Vu Ying tha se studentët kinezë patën përvojë të suksesshme në eksperimentet shkencore përtej detit, prandaj, krahas pajtimit të njerëzve të talentuar nga vende të tjera, Kina mund të shfrytëzojë edhe këta studentë kinezë për të sjellë përvojën e tyre të suksesshme nga jashtë në Kinë. Një nga shembujt tipikë është themelimi i kompanisë së tij nga studentët kinezë jashtë vendit në vitin 1995.

"Themeluesi i kompanisë sonë dhe të gjithë inxhinierët, që u pranuan të parët në kompaninë tonë, fituan përvojë duke studiuar, jetuar dhe punuar në SHBA. Ne i inkurajojmë ata të krijojnë të reja në fushën teknike dhe në punën administruese. Duke kombinuar përvojën e suksesshme perëndimore me atë kineze në administrimin e njerëzve të talentuar, ne kemi krijuar një mjedis të hapur dhe një kompleks rregullash përgëzuese."

Një fjalë e urtë popullore thotë: "Ndërto një fole për të tërhequr feniksët ". Këtë e ka kuptuar mirë nënkryetari i Komitetit të Progresit Demokratik, zoti Yan Gjynqi, i cili shprehu mendimin se kyçi i krijimit të rejave në Kinë është krijimi nga shteti kinez i një sistemi të ri.

"Më duket se krijimi i një sistemi të ri ka shumë rëndësi. Rregullat e ndarjes së fitimeve, të emërimit dhe të shkarkimit të kuadrove, të mbrojtjes së patentave të inteligjencës dhe të vlerësimit të arritjeve kanë të bëjnë me faktorin njeri, prandaj, me rregulla racionale, do të mobilizohet në maksimum iniciativa e punonjësve. Besoj se kombi kinez është një komb punëtor dhe i zgjuar, dhe këtë e ka vërtetuar historia."

Akademiku i Akademisë së Shkencave të Kinës Vang Zhizhen paraqiti disa propozime konkrete.

"Propozoj që të vendosen rregulla racionale dhe efektive të administrimit të fondeve të eksperimentimeve shkencore; të përsosen rregullat e administrimit të objekteve tekniko-shkencore dhe rregullat e ndarjes së punonjësve të eksperimenteve shkencore; të krijohet një sistem i vlerësimit të talenteve, që përputhet me ligjin e eksperimenteve shkencore; të krijohet një model i administrimit, që përputhet me ligjin e shkencave."

Na kënaq fakti se këto mendime janë përfshirë tashmë në kursin politik të shtetit kinez. (Zheng)