Me të përmendur televizionin digjital, na shkojnë ndërmend vetëm figura me qartësi të madhe dhe programet e pasura televizive. Në fakt televizioni digjital mund të na ofrojë shërbime të shumta me informacione të multimedias. Tani në zonat relativisht të zhvilluara tregtare dhe financiare të Kinës ka filluar blerja e makinave, e shtëpive etj., mjekimi në spital dhe spekulimi me aksione nëpërmjet televizionit digjital, duke u krijuar lehtësira të mëdha banorëve.

I moshuari 77 vjeçar Vang Qinpu që banon në qytetin Hangzhou e konsideron televizorin e shtëpisë si shokun e tij më të ngushtë. Para një viti, në jetën e tij hyri televizioni digjital. Ai dhe e shoqja e moshuar janë të kënaqur se mund të blejnë librat më të pëlqyer mbështetur në informacionet e ofruara nga televizioni:

"Tani mund të blejmë libra sipas listës së librave të mirëpritur të shpallur në televizionin digjital dhe kjo na lehtëson shumë."

Televizioni digjital jo vetëm u ofron shërbime të moshuarve si Van Qinpu, por u krijon lehtësi edhe atyre që punojnë ditën. Z. Çen Hong, banor i qytetit Hanzhou, e ka fëmijën të vogël dhe është shumë i zënë me punët e përditshme. Blerja e ushqimeve, vajit etj. nëpërmjet televizionit digjital e ka lehtësuar shumë atë:

"Ta zëmë se dua të blej një thes oriz. Në radhë të parë caktoj llojin dhe sasinë e orizit, shtyp tastierën në televizorin digjital, dhe porositja mbaroi."

Orizi i porositur nga z. Çen mbërriti në shtëpinë e tij brenda 30 minutash. Biznesmeni i furnizimit me mallra z. Jin Qiang i tha korrespondentit:

"Nga të dhënat statistikore të kohëve të fundit del se gati 20 deri në 30 mijë konsumatorë janë bërë konsumatorët tanë afatgjatë. Secili prej tyre konsumon në muaj 100 deri në 300 juanë për sendet e përdorimit të përditshëm."

Edhe shumë familje të tjera të qytetit Hanzhou jo vetëm shikojnë programe më të pasura në televizorin digjital, por gëzojnë në shtëpi edhe shërbimet e ndryshme, si blerja e mallrave të përditshme, porositja e biletave, spekulimi me aksione, punësimi, mjekimi etj.

Duke folur për shërbimet me informacione televizive, drejtoresha e përgjithshme e Shoqërisë me përgjegjësi të kufizuar të televizionit digjital të qytetit Hanzhou, zj. Tang Yu tha:

"Me anën e televizionit digjital kemi ofruar informacione të shumta të shërbimeve, p.sh. në programin televiziv kemi hapur 6 rubrika të shërbimeve, të cilat çdo ditë i vizitojnë 870 mijë veta."

Siç mësohet, përgatitja dhe transmetimi i emisioneve televizive në Kinë tashmë janë digjitalizuar, por pjesa dërrmuese e aparateve marrëse është analogjike. Tani me anën e vendosjes së një kutie mbi televizorin analogjik, mund të merren sinjalet digjitale, duke e shndërruar aparatin marrës analogjik në një terminal shtëpiak që merr informacionet e multimeadias.

Duke folur për epërsinë teknike të televizionit digjital, zv/drejtori i Përgjithshëm i Shoqërisë me përgjegjësi të kufizuar të televizionit digjital të Hanzhout z. Çen Xiaolin tha:

"Televizioni analogjik mund t'i transmetojë emisionet njëkohësisht në dhjetëra kanale, kurse televizioni digjital në qindra kanale, dhe cilësia e transmetimit është më e mirë. Më kryesorja është se ne mund ta përdorim televizorin si një kompjuter të thjeshtë, por ai është më i manovrueshëm dhe më praktik se kompjuteri."

Tani në 50 zona dhe qytete eksperimentale kineze po bëhet kalimi i televizionit analogjik në atë digjital. Z. Çen Xiaolin shprehu mendimin se televizori është mjeti i informacionit më i përhapur në Kinë dhe popullarizimi i televizionit digjital ka një potencial të madh tregu.

"Televizioni digjital është si një supermarket, ku kanë vendosur mallra dhe informacione bizmesmenë, dikastere qeveritare dhe individë dhe kanë filluar biznesin dhe shërbimet e tyre. Kjo do t'u krijojë banorëve shumë lehtësi." (Pina)