Për të zgjidhur këtë problem, në disa zona të pazhvilluara, filloi para 4 vjetëve të zbatohet parimi i heqjes së pagesave të librave mësimorë, të shpenzimeve të përziera dhe të shpenzimeve të fjetjes në konvikt.

Distrikti Ikiholo i rajonit autonom të Mongolisë së Brendshme të Kinës Veriore është një nga zonat e pazhvilluara ekonomikisht. Megjithatë, fshtari Li Feirong, që jeton në këtë distrikt, bënte dikur një jetë të mirë, sepse zhvillonte ekonominë duke mbajtur lepuj. Por vitin e kaluar, një murtajë kafshësh i solli atij një katastrofë të madhe, sepse disa qindra lepujt e tij ngordhën plotësisht. Si pasojë e kësaj humbjeje të madhe ekonomike, ai mbeti fukara. Ai tha:

"Bija ime e madhe shpenzonte në vit 800 ose 900 juanë për të blerë librat mësimorë dhe për të fjetur në konviktin e shkollës. Bija ime e vogël, e cila mëson në shkollën fillore, gjithashtu, shpenzonte shumë. Nga të fitoj aq shumë para? Shyqyr që më shpëtoi parimi i heqjes së pagesave të shkollës. Sa mirë se nuk merakosem më për shkollimin e fëmijëve."

Qeveria qendrore kineze dhe administratat lokale angazhohen në këtë çështje. Konkretisht, ministria e financave paguan shpenzimet e blerjes së librave mësimorë të atyre nxënësve; administratat e provincave ose rajoneve autonome paguajnë shpenzimet e tyre të përziera, kurse administratat e distrikteve paguajnë shpenzimet e tyre të fjetjes në konvikt. Ky favor u jepet bijve dhe bijave të atyre familjeve të fshatit, që i kanë të ardhurat nën nivelin mesatar të të ardhurave në ato zona.

Sipas rregullave përkatëse, sektorët bazë administrativë të krahinave të ndryshme duhet të bëjnë shumë punë për zbatimin e parimit të heqjes së pagesave të librave mësimorë, të shpenzimeve të përziera dhe të shpenzimeve të fjetjes në konviktin e shkollës. Ata duhet të llogaritin me saktësi të ardhurat mesatare për çdo frymë në krahinën e vet, në mënyrë që të dinë se sa familje kanë nevojë për ndihmë; pastaj të inkurajojnë nxënësit e atyre familjeve të paraqesin lutje për ndihmë dhe, më në fund, sektorët përkatës analizojnë me kujdes gjendjen konkrete dhe përcaktojnë se cilave familje duhet t'u jepet kjo leverdi.

Meqenëse distrikti Ikinholo ndodhet në një zonë të varfër, fshatarët dhe blegtorët e këtij distrikti kanë përgjithësisht të ardhura të ulëta. Për këtë arsye, administrata e këtij distrikti ka vendosur që të gëzojnë këtë leverdi të gjitha familjet e fshatarëve dhe të blegtorëve, që kanë fëmijë në shkollën fillore dhe shkollën e mesme të ciklit të ulët. Zoti Liu Venshan, një nga përgjegjësit e distriktit, vuri në dukje se, po të duam të zhvillojmë ekonominë, në radhë të parë duhet t'i kushtojmë rëndësi arsimit, sepse vetëm me zhvillimin e arsimit do të përgatiten sa më shumë njerëz të talentuar që të çojnë përpara zhvillimin e ekonomisë. Ai tha:

"Sipas kërkesës së politikës së shtetit, administrata e distriktit tonë duhet të investonte 100 mijë juanë për zbatimin e parimit të sipërpërmendur, por administrata investoi 260 mijë juanë, domethënë shtoi 160 mijë juanë, megjithëse distrikti ynë ka vështirësi në lëmin e financave. Administrata e distriktit tonë është e mendimit se duhet medoemos t'i kushtojmë rëndësi zhvillimit të arsimit, edhe sikur të investojmë më pak në fusha të tjera."

Sot në këtë distrikt, të 16 mijë nxënësit e shkollave fillore dhe të mesme marrin ndimë në bazë të parimit të shtetit mbi heqjen e pagesave të librave mësimorë, të shpenzimeve të përziera dhe të shpenzimeve të fjetjes në konvikt. Drejtori i një shkolle të mesme, zoti Zhang tha se tani asnjë nxënës nuk lë shkollën për shkak të vështirësive ekonomike.

Lidhur me zbatimin e parimit të sipërpërmendur në rajonin autonom të Mongolisë së Brendshme, nënkryetari i rajonit, zoti Liangji tha:

"Sot, 81 ndër 101 distriktet e rajonit autonom të Mongolisë së Brendshme kanë vënë përgjithësisht në zbatim parimin e shtetit mbi heqjen e pagesave të librave mësimorë, të shpenzimeve të përziera dhe të shpenzimeve të fjetjes në konvikt. Domethënë, 80% i distrikteve të rajonit tonë kanë vënë në jetë këtë parim. Vitet e fundit, është zhvilluar me ritme të shpejta ekonomia në Mongolinë e Brendshme, por na mungojnë kuadro të talentuar, prandaj duhet medoemos të kapemi fort pas arsimit. Kjo është arsyeja pse e zbatojmë me vendosmëri këtë parim të shtetit."

Të dashur dëgjues, ato që thamë sipër, janë një konspekt i ngjeshur i gjendjes së zbatimit të parimit të shtetit kinez mbi ndihmën për nxënësit e familjeve me vështirësi ekonomike, që quhet " parimi i heqjes pagesave të librave mësimorë, të shpenzimeve të përziera dhe të shpenzimeve të fjetjes në konvikt ". Sot në mbarë Kinën ka 30 milionë nxënës që kanë nevojë për ndihmë në këtë drejtim dhe shumica dërmuese e tyre kanë filluar të marrin ndihmë.(Zheng)