Për të kursyer energjinë, qeveria kineze ka kërkuar që para muajit mars të këtij viti, në të gjitha krahinat e vendit të hiqen kufizimet për makinat me shkarkim të paktë gazrash për mbrojtjen e mjedisit dhe u shpreh se do të hartojë një politikën përkatëse për nxitjen e prodhimit dhe të blerjes së makinave të tilla. Specialistët shprehën mendimin se këto veprime të qeverisë tregojnë se makinat e vogla do të zhvillohen me shpejtësi dhe do të mirëpriten këtë vit pikë në treg.

Në një treg të shitjes së makinave në Pekin, z. Ou Qing që po zgjidhte një makinë, i tha korrespondentit se ai vendosi të blinte një makinë me shkarkim të paktë gazrash, sepse shteti po heq kufizimet për makina të tilla dhe se çmimi i benzinës po ngrihet pandërprerë:

"Më mirë të blej një makinë me shkarkim të paktë gazrash, se ajo është e lirë dhe shpenzon më pak benzinë."

Në Kinë ka edhe shumë konsumatorë të tjerë të thjeshtë si z. Ou që dëshirojnë të blejnë makinë të përshtatshme ekonomike, kështu që tregu ka nevojë të madhe për makina me shkarkim të paktë gazrash. Por me gjithatë z. Ou ishte disi i shqetësuar:

"Por nuk mund të blej as një makinë tepër të vogël, se kam merak për sigurinë e saj."

Sipas anketës së një faqeje elektronike në internet, pas heqjes së kufizimeve përkatëse për makinat me shkarkim të paktë gazrash, 39,2% e konsumatorëve do të blejnë makina të tilla, ndërsa 30,5% të tjerë nuk do t'i blejnë ato. Konsumatorët shprehën mendimin se këto makina janë ekonomike dhe kursejnë energjinë, por janë të kategorisë së ulët.

Lidhur me mendimin se këto makina janë të kategorisë së ulët, personalitetet përkatëse u shprehën ndryshe. Zv-drejtori i përgjithshëm i ndërmarrjes "Dongfeng Peugeot", një nga ndërmarrjet më të mëdha të makinave të Kinës z. Tang Teng tha:

"Njerëzit kanë disa paragjykime për makinat me shkarkim të paktë gazrash, duke imagjinuar sikur janë të thjeshta dhe të teknologjisë së ulët. Në fakt në tregun ndërkombëtar të makinave është krejt ndryshe."

Z. Tang Teng u shpreh se ndërmarrjet kineze të makinave tani u kushtojnë vëmendje të madhe makinave me shkarkim të paktë gazrash, i kanë montuar në këto makina pajisjet e cilësisë së lartë si detalet mirëmbajtëse, dritat e përparme, kondicionerët automatikë etj. Kjo është në fakt prirja e zhvillimit të makinave me shkarkim të paktë gazrash në Kinë në të ardhmen.

Shoqëria me përgjegjësi të kufizuar e makinave Nr 1 e Tianjing-ut prodhon kryesisht makina me shkarkim të paktë gazrash. Vitin e kaluar, ajo shiti 200 mijë makina të tilla të serisë Xiali të prodhuara prej saj, duke zënë 30% të tregut kinez. Drejtori i përgjithshëm i kësaj shoqërie z. Vang Gang u shpreh se shteti ndërmori politikën e nxitjes së zhvillimit të makinave të vogla dhe ata do të ngrenë më tej cilësinë e makinave të tyre, në mënyrë që të tërheqin sa më shumë konsumatorë:

"Ne do të përpiqemi që makinat tona të kenë funksionet e makinave të nivelit të lartë, në mënyrë që konsumatorët të kursejnë paratë dhe energjinë e të mbrohet mjedisi, që blerja e makinave të vogla të bëhet një shprehi e të gjithëve."

Nënkryetari i përhershëm i Komisionit të specialistëve pranë Shoqatës së Industrisë së Automobilave të Kinës z. Rong Huikang bëri të ditur se këtë vit Kina do të rregullojë mënyrën e mbledhjes së taksave të makinave e do të ulë taksat e makinave me shkarkim të paktë gazrash, për të nxitur më tej konsumin e tyre:

"Këtë vit do të shpallet një politikë për të mbështetur dhe orientuar zhvillimin e makinave të vogla, p.sh. për makinat e vogla, do të paguhen më pak taksa, ndërsa për makinat e mëdha, më shumë."

Siç mësohet, në vendet evropiane dhe në Japoni, Korenë e Jugut etj. makinat me shkarkim të paktë gazrash janë mirëpritur shumë. Këto vende kanë shpallur gjithashtu politika përkatëse të favorshme për nxitjen e makinave të tilla. Në vendet evropiane sasia e shitjes së këtyre makinave zuri 70% të sasisë së përgjithshme të shitjes së makinave, kurse në Kinë ajo zuri vetëm 20%. Prandaj zhvillimi i këtyre makinave në Kinë ka ende hapësira të mëdha. Z. Rong Huikang u shpreh se makinat me shkarkim të paktë gazrash ka mundësi të bëhen rryma kryesore këtë vit në tregun kinez të makinave.

Sipas parashikimit, këtë vit shitja e makinave kineze do të rritet 12%, sasia vjetore e shitjes do t'i kalojë 6 milionë e 400 mijët, dhe makinat e vogla do të zënë më shumë vend në tregun kinez të makinave. ( Pina )