Krijimi i fshatrave ekologjike po krzhet në provincën Hainan për të pestin vit. Deri në fund të vitit 2005, kjo provincë investoi gjithsej 530 milionë juanë në krijimin e 53 mijë fshatrave ekologjike, shifër kjo që zë 22,8% të numrit të përgjithshëm të fshatrave të provincës.

Në fshatrat e reja ekologjike, ka ndryshuar krejt pamja e tyre e dikurshme e papastër dhe e çrregulltë. Për të krijuar fshatrat ekologjike, duke u nisur nga kushtet konkrete të fshatrave të provincës Hainan, në fillim u pastruan të gjitha mbeturinat e lëna nga e kaluara, u vendosën teneqetë e plehrave, u hapën puse të gazit metan, u rregulluan rrugët dhe u mbolën pemë. Të gjitha këto masa e kanë ndryshuar pamjen e dikurshme të fshatit. Kohët e fundit, korrespondenti ynë vizitoi disa fshatra të provincës Hainan, ku pa nga afër kushtet e përmirësuara të banimit të fshatarëve, rrugët e rregullta dhe mjedisin e pastër e të gjelbëruar. Shumë fshatra ekologjike janë bërë tashmë pika turistike. Sipas të dhënave jo të plota, këto fshatra ekologjike i kanë vizituar turistë nga SHBA-ja, Japonia, Tajlanda, Singapori etj. dhe mbi 60 mijë vizitorë të 900 grupeve turistike të Pekinit, të provincave Heilongjiang, Guangdong, Guangxi etj.

Qëllimi i ndërtimit të fshatrave ekologjike është zhvillimi i ekonomisë qarkulluese dhe shtimi i të ardhurave të fshatarëve. Të gjitha qytetet dhe fshatrat e provincës Hainan, duke ndërthurur ndërtimin e fshatrave ekologjike me rregullimin e strukturës bujqësore, me zhvillimin e ekonomisë së oborrir dhe largimin e krahëve të tepërta të punës, kanë hapur shumë rrugë të reja të zhvillimit ekonomik dhe të shtimit të të ardhurave të fshatarëve. Në mënyrë të veçantë, duke shfrytëzuar kushtet e favorshme subtropikale të provincës Hainan, u ndërtuan 160 mijë stalla të reja, banja, kuzhina të reja dhe puse të gazit metan. Si rezultat, mjedisi u bë më i pastër, u kursye energjia, u zhvillua blegtoria, duke grumbulluar shumë plehra organike, dhe u nxit zhvillimi i bujqësisë pa ndotje, duke u krijuar një mënyrë e re e zhvillimit të ekonomisë qarkulluese në fshat, e cila është e përshtatshme për0 kushtet e provincës Hainan, është e favorshme për zhvillimin harmonik midis njeriut dhe natyrës dhe përputhet me kërkesat e shoqërisë së kursimit të burimeve dhe të mjedisit shoqëror.

Ndërtimi i fshatrave ekologjike ka ndryshuar zakonet e prapambetura të fshatarëve dhe u ka shtuar atyre krenarinë dhe besimin. Gjatë ndërtimit të fshatrave ekologjike, qytetet dhe distriktet e provincës Hainan kanë përqendruar forca të ndryshme në rritjen e kualifikimit të fshatarëve, në ndërtimin aktiv të objekteve kulturore, në organizimin e veprimtarive masive kulturore dhe sportive, në popullarizimin e njohurive ligjore, në krijimin e "fshatit të dalluar në planifikimin familjar", të "familjeve të 5 të mirave" etj. dhe si rezultat, është ngritur cilësia shkencore dhe kulturore e fshatarëve, e gjithnjë e më shumë fshatarë synojnë një jetesë shkencore, të qytetëruar dhe të shëndetshme.

Gjatë krijimit të fshatrave ekologjike, kuadrot e niveleve të ndryshme, sidomos kuadrot e fshatrave në bazë, bëjnë punë të hollësishme mobilizuese dhe ideologjike, ndihmojnë masat në ndryshimin e konceptit, mbledhin me të gjitha mënyrat fonde dhe organizojnë fshatarët në ndërtimin e vatrave të veta. Ata kërkojnë me të gjitha forcat rrugë të reja për shtimin e të ardhurave të fshatarëve dhe për zgjidhjen e vështirësive të tyre konkrete në prodhim dhe në jetë nëpërmjet zbatimit të teknikës praktike. (Pina)