Korrespondentja e Radios së Jashtme të Kinës njoftoi se më 28 prill do të fillojnë në Pekin aktivitetet e Festivalit të 6-të "Takimi në Pekin". Në ceremoninë e hapjes së festivalit do të interpretohen këngët dhe vallet e pakicave kombëtare "Guixhou" të interpretuara nga Ansambli i Këngëve dhe Valleve i Provincës Guixhou.

Festivali "Takimi në Pekin" është një festival shtetëror artistik i Kinës. Festivali i parë u zhvillua në vitin 2000 dhe deri tani janë zhvilluar 5 të tilla. Gjatë çdo festivali janë dhënë më se 130 shfaqje duke tërhequr disa milionë shikues.

Festivali i 6-të "Takimi në Pekin" do të zgjasë 1 muaj, më se 50 trupa artistike të ardhura nga më se 20 vende dhe artistë kinezë do të japin së bashku shfaqje të shkëlqyeshme. Shfaqjet përfshijnë këngë, valle, drama, balet etj.

Orkestra Qendrore Kombëtare e Kinës do të japë shfaqje në Australi

Gazeta kineze "Beijingqingnianbao" njoftoi se më 29 mars, Orkestra Qendrore Kombëtare e Kinës do të shkojë në Australi për shfaqjen "Turneu i Kulturës Kineze në Australi".

Orkestra Qendrore Kombëtare e Kinës u krijua në vitin 1960 dhe është orkestra shtetërore e veglave tradicionale muzikore me nivelin më të lartë dhe me përmasat më të mëdha në Kinë. Gjatë kësaj vizite, orkestra do të shfaqë vepra të famshme muzikore kineze dhe vepra muzikore australiane.

Siç bëhet e ditur, Orkestra Qendrore Kombëtare e Kinës do të japë shfaqje në 12 qytete australiane si Sidnej, Kanberra etj.

Balerinët e Kinës dhe Francës do të shfaqin së bashku "Reimondën"

Gazeta kineze "Beijingchenbao" njoftoi se nga 5 deri më 7 maj, do të shfaqet në Pekin baleti klasik francez "Reimonda" i interpretuar bashkërisht nga Trupa Qendrore e Baletit e Kinës dhe Trupa e Baletit e Parisit.

"Reimonda" është një balet i famshëm botëror që është krijuar nga themeluesi i baletit klasik i Rusisë Marius Petipa në fund të shekullit të 19-të dhe përshkruan një tregim dashurie në Francë.

Baleti "Reimonda" është pjesë e rëndësishme përbërëse e "Javës së Kulturës Kino-Franceze" dhe një shfaqje e rëndësishme në Festivalin Artistik "Takimi në Pekin".

Kina do të botojë veprat e dramaturgut francez Beket

Gazeta kineze "Xinjingbao" njoftoi se me rastin e 100-vjetorit të lindjes së dramaturgut të Francës Samuel Beket, më 13 prill, shtëpia botuese e provincës Hunan të Kinës do të botojë "Veprat e zgjedhura të Beketit" në gjuhën kineze. Kjo është hera e parë që veprat e Beketit botohen në Kinë.

Beketi lindi në Irlandë në vitin 1906. Në vitin 1938 ai shkoi për të jetuar në Paris. Ai është një dramaturg që ka shkruar në gjuhën franceze dhe në gjuhën angleze. Në vitin 1969, ai fitoi çmimin Nobel të letërsisë. (Fani)