Gjatë qëndrimit në Shqipëri për të intervistuar kineastë veteranë shqiptarë të disa filmave shqiptarë të mirëpritur në Kinë, grupi televiziv kinez shkoi edhe në shtëpinë e shkrimtarit të madh shqiptar Dritëro Agolli dhe mori një intervistë prej tij.

Shkrimtari Dritëro Agolli dhe bashkëshortja e tij e pritën ngrohtësisht grupin në dhomën e pritjes të tyre karakteristike shqiptare, që ishte e stolisur shumë bukur me piktura dhe gdhendje artistike në mur. Grupi kinez e intervistoi z. Dritëro në bibliotekën e tij me shumë libra të çmuara.

Intervista filloi me rrëfimin për krijimin e romanit me temë nga Lufta Antifashiste Nacionalçlirimtare "Komisari Memo". Lidhur me këtë, z. Dritëro Agolli tha :"Unë, që kam qenë pionier në Luftën Antifashiste Nacionalçlimtare - kam qenë një partizan i vogël, - kam pasur dashuri për temën e luftës kundër fashizmit, dhe kjo më shtyu të shkruaja një roman, që në fillim quhej "I teti në bronz". Pastaj unë e ndryshova këtë titull dhe e vura "Komisari Memo". Filmi "I teti në bronz" është nxjerrë nga ky roman. Mirëpo unë në atë kohë nuk e kisha shkruar të gjithë romanin, kisha bërë më shumë se gjysmën dhe fundin e romanit, jo të tjera. Dhe në dorëshkrim, në letër, ia dhashë Viktorit Gjikës, regjisor nga më të mëdhenjtë tanët, për ta lexuar. Dhe atij i pëlqeu kjo temë dhe tha se do ta bëjmë skenar për një film, me titullin "I teti në bronz". Dhe ne punuam bashkë për këtë skenar, dhe bashkërisht e shkruam skenarin, pra autorë kemi qenë të dy, unë dhe Viktor Gjika. Mirëpo unë akoma nuk e kisha botuar romanin, ishte i pabotuar, ishte në dorëshkrim, dhe kisha një dyshim që nuk do të dilte i plotë si romani, se unë kisha edhe skena të tjera, dhe personazhe të tjera. Por atij i pëlqeu ky si subjekt dhe mori gjysmën e romanit, ai është gjysma e romanit "Komisari Memo". Dhe e shkruam bashkë skenarin dhe ai bëri filmin".

Pasi tregoi se si e ka filluar shkrimin e skenarit të filmit "I teti në bronz", z. Dritëro Agolli rrëfeu hollësitë gjatë krijimit të skenarit. Ai tha : "Ne me Viktorin, në të gjitha problemet, si ishte lufta etj. kemi rënë dakord, kishim një bashkëpunim të plotë. Viktori ishte shumë këmbëngulës dhe më vinte ditë përditë në shtëpi, ditë përditë, dhe unë duhej ta qerasja me raki dhe me të tjera. Dhe kështu që po e them për shaka që u mundova ta përfundoja sa më shpejt se do të më rrinte gjithnjë në shtëpi dhe do të më harxhonte. Kështu u mundova ta shkruaja sa më shpejt skenarin. Viktori ka qenë i vogël në kohën e luftës, ishte fëmijë, kurse unë isha i rritur, isha l4 -15 vjeç, kështu që e njihja luftën, dhe shumë personazhe atje janë të vërteta, janë nga lufta e guerrileve në Korçë, nga lufta partizane në malet e Korçës, se unë jam nga ajo krahinë, nga Korça, nga Devolli". 

Pasi tregoi procesin e shkrimit të skenarit të këtij filmi, z. Dritëro Agolli na tregoi se si i ka krijuar figurat e personazheve të këtij filmi. Ai tha : "Disa personazhe ishin të vërteta, si komisar Kovaçi, që është "i teti në bronz". Ka qenë një ngjarje e vërtetë, atë e vranë duke pirë ujë në burim, por unë e ndryshova faktin jetësor dhe e bëra që u vra në luftë. Kështu që realiteti i Luftës Nacionalçlirimtare më ka dhënë shumë personazhe, shumë njerëz, luftëtarë, komisarë, komunistë, patriotë dhe këto më kanë ngacmuar për ta shkruar këtë roman dhe për të bërë edhe skenarin e filmit "I teti në bronz".

Pasi foli për krijimin e filmit "I teti në bronz", z. Dritëro Agolli foli edhe për pritjen e ngrohtë të publikut për këtë film. Ai tha:  "Filmi doli në fillim të viteve '70 ose në fund të viteve '60 dhe u pëlqye shumë në publikun tonë. Unë edhe atëherë kam bërë intervista në televizionin tonë se si u shkrua skenari. 

Ai film u dha edhe në disa vende të tjera, u dha edhe nga televizione të huaja në atë kohë. U dha edhe nga televizioni i Beogradit të Jugosllavisë. Megjithëse ne nuk i kishim shumë mirë marrëdhëniet, ata e dhanë.(Zhai)