Sot në Kinë, 76 mijë fëmijë janë bërë jetimë për shkak se u kanë vdekur prindërit nga sëmundja e Sidës. Meqenëse mjaft njerëz nuk kanë njohuri elementare për Sidën, këta fëmijë të shëndetshëm pësojnë diskriminim në sboqëri dhe në shkollë. Sektorët arsimorë dhe organizatat popullore të Kinës po marrin masa për të ndryshuar këtë gjendje.

Pak kohë më parë, në një teatër të Pekinit, mësuesit dhe nxënësit e mbi 10 shkollave fillore panë një mësim të veçantë të dashurisë për njeriun, në të cilin mësuesit dhe nxënësit e shkollës fillore pranë Universitetit Zhongguo Renmin shfaqën një dramë të shkurtër me titull "Shpresa", të krijuar nga ata vetë në bazë të një tregimi të vërtetë për një jetim që i kanë vdekur prindërit nga Sida. Në këtë tregim thuhet: një djalë, që mbeti jetim sepse i kanë vdekur prindërit nga Sida, deshi të hynte në një shkollë të re, por nxënësit, që kishin keqkuptim për Sidën, u trembën dhe u shprehën kundër pranimit të tij. Me ndihmën e mësuesve, nxënësit morën njohuritë përkatëse për Sidën, prandaj shprehën keqardhje dhe treguan kujdes për të.

Kjo shfaqje preku të gjithë të pranishmit. Nxënësit thanë se, më parë, ata nuk donin të luanin bashkë me ata jetimë. Kurse, pasi panë këtë dramë, e ndryshuan mendimin.

"Ai mbeti i vetmuar sepse prindërit i vdiqën nga sëmundja e Sidës, kurse ai vetë është i shëndetshëm. Kur ai ka ndonjë vështirësi, unë do të ndihmoj me sa mund."

Në Kinë, shumica e atyre fëmijëve, që kanë mbetur jetimë si pasojë e epidemisë së Sidës, jetojnë në fshat dhe kanë shumë vështirësi, dhe vështirësitë e tyre janë të papërfytyrueshme për shumicën e fëmijëve që jetojnë në qytet.

Përgjegjësi i Fondit të Filatropisë Huaxia të Pekinit, që është njësi organizuese e këtyre aktiviteteve, zoti Vang Bing vuri në dukje se qeveria dhe qarqet shoqërore po përpiqen të ndihmojnë këta fëmijë nga anët materiale dhe edukative, megjithatë nuk qetësohen ndjenjat e tyre të vetmisë psikike, të shkaktuara nga qëndrimi indiferent dhe diskriminues të moshatarëve të tyre. Prandaj Fondi i Filatropisë organizon aktivitete të ndryshme për të popullarizuar në gjirin e nxënësve njohuritë për Sidën, siç është kjo orë mësimi, me qëllim që nxënësit të njohin, të kuptojnë dhe të duan këtë fëmijë.

"Aktivitetet, që organizuam sot, patën qëllim që fëmijët e kryeqytetit tonë të njohin gjendjen e jetesës të atyre fëmijëve që kanë humbur prindërit si pasojë e sëmundjes së Sidës dhe të kuptojnë dëshirat e tyre. Kjo do të ndihmojë pionierët tanë të çmojnë të sotmen, të kujdesen për të tjerët, të brumosen me ndjenja dashamirësie dhe të bëhen shtetas me ndjenja të përgjegjësisë për shoqërinë".

Drejtoresha e shkollës fillore pranë Universitetit Zhonguo Renmin, zonja Zheng Ruifang vuri në dukje se edukata e dashurisë për njeriun mirëpritet gjithnjë e më shumë nga nxënësit dhe nga prindërit e tyre.

Pas shfaqjes së dramës "Shpresa", u ngjitën në skenë 7 fëmijë që u kanë vdekur prindërit nga Sida. Njëri prej tyre është djali 12 vjeçar Agjyn që mëson në klasin e 5-të.

"Do të mësoj me të gjitha përpjkjet. Kur rritem, do të bëhem një mjek dhe do të mjekoj njerëzit që vuajnë nga Sida".

Nxënësit, që morën pjesë në shfaqjen e kësaj drame, u bënë nxënësve të pranishëm propozimin që të bëhen miq të atyre fëmijëve fatkeq dhe të kursejnë të hollat për të ndihmuar ata. Të gjithë iu përgjigjën me entuziazëm këtij propozimi dhe premtuan se do të kujdesen më shumë për ata fëmijë që u bënë jetimë si pasojë e epidemisë së Sidës dhe do të përpiqen brenda mundësive për të përmirësuar jetesën e tyre.

(Zheng)