Fu Mingxia ka lindur në vitin 1978 në qytetin Wuhan të Kinës qendrore. Ajo është një sportiste e njohur botërore e përgatitur nga ekipi i kërcimit në ujë i provincës Hubei. Gjatë karrierës së saj sportive, Fu Mingxia ka fituar 4 tituj kampion në Lojërat Olimpike.

Çdo njeri ka ëndrrën e vet, por jo të gjithë mund ta realizojnë atë. Më 29 shtator të vitit 2000, kur flamuri kombëtar kinez u ngrit përsëri në Lojërat Olimpike, ëndrra e Fu Mingxia-së u realizua. Qeshja e saj ishte aq e bukur dhe e ëmbël, sa e gjithë bota u deh nga ajo.

Fu Mingxia e filloi karrierën e saj sportive në mënyrë krejt të rastësishme. Ishte një ditë e vitit 1985, kur Fu Mingxia shkoi në një ekip lokal të hedhjes në ujë bashkë me të motrën, e cila u paraqit aty për t'u pranuar në ekip. Por në vend të saj, trajneri zgjodhi Fu Mingxia-në të stërvitet në sportin e kërcimit në ujë. Me shumë talent, stërvitje të rreptë dhe me ndihmën e trajnerit, niveli i Fu Mingxia-së u ngrit shumë shpejt dhe këto i dhanë asaj një bazë të fortë për suksesin e saj të ardhshëm. Në vitin 1986, Fu Mingxia fitoi titullin kampione kombëtare dhe 3 vjet më pas, ajo u pranua në kombëtaren kineze të kërcimit në ujë për të rinj. Në vitin 1990, Fu Mingxia mori pjesë në kampionatin e sportit të kërcimit në ujë në SHBA dhe fitoi titullin kampione. Kjo fitore tërhoqi vëmendjen e të gjithë botës dhe Fu Mingxia u përcaktua nga revista amerikane "Bota e Notit" si sportistja më e mirë në botës. Në vitin 1991, në kampionatin e 6-të botëror të notit, Fu Mingxia fitoi një titull kampione, duke u bërë kampionia më e re botërore, gjë që u shënua dhe në librin e rekordeve botërore "Ginis". Në vitin 1992, në Lojërat Olimpike të Barcelonës, Fu Mingxia fitoi një medalje të artë në kërcimin nga platforma për femra, duke u bërë kampionia më e re olimpike.

Nga viti 1991 deri në 1996, Fu Mingxia fitoi gjithsej 10 tituj kampion. Kjo është në të vërtetë një epoka e Fu Mingxia-së, ndërsa ajo vetë u quajt "mbretëresha e sportit të hedhjes në ujë". Vlen të përmendet se në Lojërat Olimpike të Atlantës, Fu Mingxia fitoi dy medalje të arta në kërcimin nga trampolina dhe nga platforma, duke u bërë kampionia më e re olimpike që fiton dy herë radhazi titullin kampion në kërcimin nga platforma për femra. Krahas kësaj, ajo është edhe kinezja e parë që fiton medaljet e arta olimpike në kërcimin nga trampolina dhe nga platforma për femra.

Pas Lojërave Olimpike të Atlantës, ndoshta për shkak të presionit të madh ose për të bërë një jetë më të larmishme, Fu Mingxia 19-vjeçare e ndërpreu karrierën e saj sportive dhe hyri prë të studiuar në Universitetin Qinghua. Pas lodhjes shumëvjeçare dhe për shkak të dëshirës së saj për njohuri, Fu Mingxia u mësua shpejt me jetën shkollore dhe jetonte si një studente e thjeshtë. Por në vitin 1998, kombëtarja kineze e kërcimit në ujë filloi përsëri stërvitjen për të bërë përgatitje për Lojërat Olimpike të Sidnejit. Dikush i sugjeroi Fu Mingxia-së të rifutet në sport dhe pasi e mendoi mirë, ajo vendosi të rikthehet në kombëtaren kineze. Por pas dy vjetësh largimi nga sporti, asaj i duhej të përballonte vështirësitë të rritjes së peshës dhe të shtatlartësisë, që e pengonin atë të bënte lëvizje të shkathëta. Por Fu Mingxia nuk u step dhe stërvitej me shumë zell. Çdo ditë, ajo stërvitej mbi dhjetë orë dhe përsëriste shumë herë lëvizjet bazë. Stërvitja e rreptë dhe monotone i solli presion të madh Fu Mingxia-së, saqë ajo disa herë qante për shkak të stërvitjes së jashtëzakonshme. Disa herë ajo mendoi të heqë dorë nga stërvitja, por pastaj i thoshte vetes: "E kam marrë këtë vendim vetë dhe nuk duhet të tërhiqem." Dhe pas stërvitjes së jashtëzakonshme, Fu Mingxia përsëri hyri në formacionin e parë të kombëtares kineze dhe fitoi në Sidnej një medalje të artë në kërcimin nga trampolina 3 metra. Kështu, ajo u bë kinezja e parë që fiton medalje të arta në 3 Lojëra Olimpike. Këtë herë, Fu Mingxia qeshi dhe qeshja e saj ishte shumë e bukur dhe tërheqëse...(Jiang Lei)