dëgjoni

Li Shuangjiang është një tenor i famshëm kinez dhe njëkohësisht ai është një profesor që ka përgatitur shumë këngëtarë të rinj të shquar.

Li Shuangjiang lindi në vitin 1939 në qytetin Harbin të Kinës verilindore. Kur ishte i vogël, atij i pëlqente shumë arti veçanërisht këndimi. Pas përfundimit të shkollës së mesme, Li Shuangjiang u pranua me rezultate të mira në një universitet mjekësor. Kjo përputhej pikërisht me shpresën e babait, por Li Shuangjiang donte të studionte në një universitet muzikor, prandaj ai hoqi dorë nga ky rast. Zgjedhjen e Li Shuangjiangut babai i tij e kundërshtoi ashpër, por e ëma e përkrahu. Li Shuangjiang mori pjesë në provimet e Universitetit Qendror të Muzikës dhe u pranua me rezultate të mira në këtë universitet.

Gjatë 4 vjetëve të studimeve në Universitetin Qendror të Muzikës, Li Shuangjiang studionte sistematikisht teorinë dhe mjeshtërinë vokale. Krahas muzikës perëndimore, Li Shuangjing studionte edhe artin popullor vokal të Kinës. Në vitin 1963, Li Shuangjiang mbaroi studimet universitare dhe hyri në Trupën Artistike të Zonës Ushtarake të Sinjiangut në Kinën veriperëndimore duke filluar jetën e tij artistike në ushtri. Gjatë 10 vjetëve në Sinjiang, Li Shuangjiang mësoi shumë nga arti dhe kultura e pakicave kombëtare që patën ndikim të madh për formimin e stilit artistik të tij. Li Shuangjiang tha:

"Më pëlqejnë shumë Sinjiangu dhe kultura muzikore e pakicave kombëtare. Në Sinjiang mësova shumë lloje muzike të pakicave kombëtare që e kanë ngritur mjeshtërinë time muzikore."

Në vitin 1970, Li Shuangjiang mori pjesë në koncertin e Ushtrisë Çlirimtare Popullore të Kinës dhe këngoi "Himnin e Pekinit" duke tërhequr vëmendjen e qarqeve muzikore. Li Shuangjiang ka zë të shkëlqyeshëm dhe stil të natyrshëm këndimi, ndaj këngët e tij u përhaqën shpejt në mbarë vendin.

Në vitin 1973, Li Shuangjiang u pranua në Ansamblin e këngëve dhe valleve të Ushtrisë Çlirimtare Popullore të Kinës në Pekin. Pas ardhjes në Pekin, Li Shuangjiang hyri në fazën e lulëzimit të krijimtarisë së tij artistike dhe publikoi shumë albume me këngë. Albumi me këngë të tij "Shkoj në betejë" u shit në 3 milionë kopje duke vendosur rekord për sasinë më të madhe të shitjes së një albumi me këngë në Kinë në vitet '80 të shekullit të kaluar. Këngët e tij "Mirupafshim nënë", "Më merr malli për shokët" etj. u përshëndetën shumë nga dëgjuesit dhe atë e quajtën "Mbreti i këngëve".

Në vitin 1994, Li Shuangjiang filloi kthesën tjetër në jetën artistike të tij. Ai u largua nga skena dhe u bë dekan i fakultetit të muzikës të Universitetit Artistik të Ushtrisë Çlirimtare Popullore të Kinës për të përgatitur talente muzikore. Li Shuangjiang tha:

"Në vitin 1994, nisa punën në Universitetin Artistik të Ushtrisë Çlirimtare Popullore të Kinës për të përgatitur këngëtarë të rinj. Dua t'u mësoj studentëve përvojën time shumëvjeçare në skenë me qëllim që ata të bëhen sa më parë këngëtarë të shquar."

Pasi u bë dekan i fakultetit të muzikës, Li Shuangjiang organizoi shumë aktivitete dhe koncerte për t'u krijuar studentëve mundësi për të dhënë shfaqje. Si rezultat, niveli i këndimit të studentëve të tij u ngrit shumë dhe ata kanë fituar shumë çmime në konkurset e ndryshme muzikore brenda e jashtë vendit. Deri tani 67-vjeçari Li Shuangjiang ka përgatitur këngëtarë të panumërt të shquar dhe shumë studentë të tij janë këngëtarët më popullorë në skenë.

Li Shuangsong është pedagoge vokali në Universitetin Artistik të Ushtrisë Çlirimtare Popullore të Kinës dhe ish-studente e Li Shuangjiangut. Ajo është e mendimit se Li Shuangjiang jo vetëm këndon mirë, por është edhe një profesor i mirë. Li Shuangsong tha:

"Profesori Li u kërkon studentëve të kenë entuziazëm më të madh në skenë, sepse vetëm kështu ata mund të shprehin ndjenjat e këngëve. Njëkohësisht ai u kërkon studentëve t'i kushtojnë vëmendje me rreptësi çdo hollësie të shfaqjes."

Tani krahas punës së mësimdhënies, Li Shuangjiang po shkruan edhe "Historinë e muzikës së Ushtrisë Çlirimtare Popullore të Kinës". Ai është ftuar shpesh për të qenë në jurinë e konkurseve të këndimit dhe po bën përpjekje për të zbuluar dhe përgatitur më shumë talente muzikore. (Fani)