dëgjoni

Gjatë intervistës për grupin televiziv kinez, z.Hysen Hakani rrëfeu jetën e tij kinematografike, rreth filmit "Oshëtimë në bregdet" dhe " Njësiti Guerril " si dhe rreth temave të tjera.

Pasi i njohu korrespondentët me sfondin e filmit " Njësiti guerril", regjisori Hysen Hakani filloi t'i përgjigjet pyetjeve të korrespondentëve lidhur me këtë film, si për zgjedhjen e aktorëve, për procesin e xhirimit të një filmi, për ambjentin e xhirimit të këtij filmi etj. Duke iu përgjigjur pyetjes se

"Pas filmit 'Njësiti gueril', a keni xhiruar ndonjë film tjetër me temën e luftës? "

Kam xhiruar vetëm një film, me metrazh të mesëm. Quhet "Plaku dhe hasmi", është si një kinopoemë. Më vjen mirë që e pashë, se kisha 25 vjet e ca vjet pa e parë, dhe jam krenar që e kam xhiruar, se më është dukur si një kinopoemë. Kishte një skenar shumë, shumë të thjeshtë. Vendin po e pushton okupatori fashist, populli është i papërgatitur, jo shpirtërisht, por ushtarakisht, sepse mbreti iku bashkë me suitën... U bë një luftë, por luftën nuk e bëri ushtria shqiptare, por njerëz nga populli, njerëz të thjeshtë, që nga ndjenja atdhetare, nga dashuria për atdheun, rrokën armët dhe me ato armë të vjetra luftuan.

Duke iu përgjigjur pyetjes se "Si regjisor, çfarë lloj teme ju pëlqen më shumë?" Z. Hysen Hakani tha : "Të them të drejtën, tema për mua ka rëndësi të madhe, por jo vetëm tema, por konflikti që përshkon temën më pëlqen më tepër mua, ajo temë që ka konfliktin më të ashpër, që ka disa konflikte, që vjen duke e rritur, duke e zhvilluar konfliktin, që e mban spektatorin në ankth, e bën të rrijë i mbërthyer pas filmit, e të thotë: "Sa keq që mbaroi filmi".

Nuk është vetëm tema që përcakton bukurinë, por është skenari ai që e bën temën o të bukur, o të keqe. Se dhe një dashuri, po u shkrua keq, s'të pëlqen, po u shkrua në mënyrë poetike, thua: "Sa bukur!". Më vjen keq ta them, por kam nostalgji për filmin bardhezi, sepse këta filma që po na serviren tani me ngjyra, më duken, siç quhen në kinematografi, limonata, karamele.

Kur flas për konfliktin, mendoj për konflikte reale, jo për pseudokonflikte, si ata në telenovela, të pabesueshme, të neveritshme. E kam fjalën te vërtetësia, te metri, te masa. Siç thotë populli ynë: "Gjella me kripë e kripa me masë". Konfliktet nuk duhet të jenë pseudokonflikte, false. "

Duke përfunduar intervistën, z. Hysen Hakani iu përgjigj edhe pyetjes së fundit "Si skenar e keni zgjedhur vetë, apo jua kanë dhënë?" duke thenë : "

'Debatikun' e kam zgjedhur vetë, 'Plakun dhe hasmin' po ashtu vetë. 'Tokën tonë' ma kanë dhënë si plan tematik. 'Ndërgjegjen' e kam shkruar vetë, por duke qenë se s'po më miratohej në atë mënyrë, m'u desh të fusja "Deux ex machina". 'Njësitin gueril' e kam marrë vetë, 'Oshëtimë në bregdet' vetë. Jua thashë si m'u miratua 'Oshëtimë në bregdet'. Në fillim më thanë ashtu e kështu, në darkë u dekorova."

Pasi përfundoi intervistën, z. Hysen Hakani tha : "Me respekt e me konsideratë Me urimin më të përzemërt që puna t'ju shkojë mbarë. Admiroj të gjithë grupin realizoj". (Zhai)