dëgjoni

Shkrimtarë në gjuhën kineze diskutuan në Makao për zhvillimin e kulturës kineze

Agjencia kineze e lajmeve Hsinhua njoftoi se më 18 mars, u mbyllën në Makao mitingu i 6-të i Shoqatës Botërore të Shkrimtarëve në Gjuhën Kineze dhe simpoziumi "Bashkimi i kombit kinez dhe përhapja e kulturës kineze" i organizuar nga kjo shoqatë.

Gjatë simpoziumit 3-ditor, shkrimtarë në gjuhën kineze dhe personalitete të qarqeve kulturore të ardhur nga afro 100 vende e rajone të botës diskutuan për zhvillimin e letërsisë në gjuhën kineze dhe të kulturës kineze në shekullin e 21-të. Pjesëmarrësit shkëmbyen edhe mendime për shkrimin e novelave, poemave etj.

Në Rushan të provincës Shandong do të ndërtohet një park i kulturës së arit

Agjencia kineze e lajmeve Hsinhua njoftoi se më 18 mars, filloi ndërtimi i parkut të parë aziatik të kulturës së arit në qytetin Rushan të provincës Shandong të Kinës lindore.

Ky park do të ndërtohet në një minierë ari dhe parashikohet të përurohet në maj të vitit 2008. Pas ndërtimit, vizitorët mund të shohin me sytë e tyre procesin e prodhimit të arit.

Qyteti Rushan ka një histori mbi 1000-vjeçare të prodhimit të arit.

U hap Festivali Artistik i Studentëve Kinezë e Rusë

Korrespondenti i Radios së Jashtme të Kinës njoftoi se më 17 mars, u zhvillua në Universitetin e Pekinit ceremonia e hapjes së Festivalit Artistik të Studentëve Kinezë e Rusë. Funksionarë të arsimit të të dy vendeve dhe personalitete të qarqeve të ndryshme morën pjesë në ceremoninë e hapjes dhe ndoqën shfaqjen artistike.

Festivali Artistik i Studentëve Kinezë e Rusë është një nga aktivitetet kulturore të "Vitit të Rusisë" që zhvillohet këtë vit në Kinë. Delegacioni artistik i Rusisë përbëhet nga më se 50 studentë dhe pedagogë të ardhur nga Moska, Shën Petërburgu etj. Gjatë festivalit, ata do të shkojnë në Pekin, Hangzhou, Shenzhen etj. për të dhënë shfaqje dhe për të zhvilluar shkëmbime kulturore me studentë kinezë.

Festivali artistik do të zgjasë deri më 25 mars.

Do të zhvillohet në Pekin ekspozita e veprave kolektive të Galerisë Shtetërore të Arteve Figurative "Tretyakov" të Rusisë

Gazeta kineze "Xinjingbao" njoftoi se më 22 mars, do të hapet në Galerinë e Arteve Figurative të Kinës në Pekin ekspozita e veprave kolektive të Galerisë Shtetërore të Arteve Figurative "Tretyakov" të Rusisë. Në këtë ekspozitë do të paraqitet procesi i zhvillimit të pikturave ruse nga shekulli i 18-të deri në shekullin e 20-të.

Galeria "Tretyakov" është galeria më e rëndësishme artistike në Rusi ku mblidhen shumë vepra të çmuara artistike ruse.

Ekspozita do të qëndrojë e hapur për 2 muaj në Pekin, pastaj do të shkojë në Shangai.(Fani)