Agjencia kineze e lajmeve Zhongxin njoftoi se Shoqata Kineze e Shkrimtarëve, Shoqata e Miqësisë e Shkrimtarëve Kinezë në SHBA dhe Televizioni Minst i Gjermanisë do të zhvillojnë së bashku veprimtarinë e dhurimit të librave kinezë. Gjatë kësaj veprimtarie do t'u dhurohen bibliotekave të disa universiteteve të SHBA-së e Evropës dhe institucioneve që studiojnë kulturën kineze vepra të famshme të letërsisë kineze me qëllim që qarqet e letërsisë, të sinologjisë dhe lexuesit amerikanë dhe evropianë të njohin më tej letërsinë dhe shkrimtarët kinezë.

Përgjegjësi përkatës i Shoqatës Kineze të Shkrimtarëve tha se kjo shoqatë ka zhvilluar dy herë veprimtari të tilla duke ngjallur jehonë të madhe në SHBA. Veprimtaria e dhurimit të librave i shërben zgjerimit të mëtejshëm të shkëmbimeve në fushën e letërsisë midis Kinës dhe vendeve të huaja.

Filloi vepra e rindërtimit të varrezës Tailing

Gazeta kineze "Beijingqingnianbao" njoftoi se më 8 mars, filloi rindërtimi i varrezës Tailing të dinastisë Ming. Për këtë vepër do të shpenzohen 40 milionë juanë. Pas përurimit në fund të këtij viti, varreza do të administrohet me derë të mbyllura dhe nuk do të hapet për turistët.

Varreza Tailing u ndërtua në vitin 1506 dhe është varreza e perandorit Zhu Youtang të dinastisë Ming. Gjatë 500 vjetëve pas ndërtimit, varreza ka pësuar dëmtime serioze. Vepra e rindërtimit nuk do të ndryshojë pamjen e mëparshme të varrezës.

Do të zhvillohet Festivali i 3-të ndërkombëtar artistik Dashanzi

Gazeta kineze "Xinjingbao" njoftoi se më 29 prill do të hapet në Pekin Festivali i 3-të ndërkombëtar artistik Dashanzi. Ky festival popullor i organizuar nga artistë kinezë do të tërheqë përsëri vëmendjen e qarqeve ndërkombëtare artistike.

Dashanzi ndodhet në verilindje të Pekinit, dikur ai ishte një fabrikë. Duke filluar nga viti 2002, shumë artistë dhe institucione kulturore janë vendosur këtu. Tani Dashanzi është një vend ku gjenden shumë studio artistësh. Në vitin 2004, artistët filluan të organizojnë këtu festivalin artistik.

Në festivalin artistik të këtij viti do të ekspozohen kryesisht veprat e projektimit të ndërtesave. Qindra artistë të ardhur nga vende të ndryshme do të marrin pjesë në festival.

Do të zhvillohet veprimtaria përkujtimore me rastin e 100-vjetorit të lindjes së operës Yue

Gazeta kineze "Kultura kineze" njoftoi se me rastin e 100-vjetorit të lindjes së operës Yue të Kinës, në fund të marsit, Ministria e Kulturës e Kinës dhe provinca Zhejiang do të zhvillojnë një sërë aktivitetesh përkatëse.

Opera Yue lindi në provincën Zhejiang të Kinës lindore dhe ka karakteristika të veçanta dhe ndikim të madh brenda e jashtë vendit. (Fani)