Profesor Çu Jiahu, kryetari i Institutit Studimor të Biologjisë Mjekësore pranë Akademisë Kineze të Shkencës Mjekësore dhe përgjegjësi kryesor i kësaj depoje, tha se Kina ka vendburime të pasura të trashëgimisë njerëzore. Meqë të 56 kombësitë kineze kanë në përgjithësi zonat e veta të banimit të përqendruara, kolonat e këtyre kombësive, që kanë tiparet e veta karakteristike nga anët e gjenezës dhe të trashëgimisë, mund të shërbejnë si materiale të pasura për studimin e shumëllojshmërisë së trashëgimisë njerëzore. Po ta shohim nën këtë prizëm, është plotësisht e domosdoshme që të ndërtohet një depo e tillë e qelizave.

"Kolona të caktuara të kombësive të ndryshme kanë tipare të ndryshme për ngjitjen dhe shërimin e një sëmundjeje."

Vitet e fundit, krahas përparimit shoqëror, disa kombësi kineze kanë filluar ta lejojnë martesën me kombësi të tjera dhe shpërnguljen në krahina të tjera, si pasojë, ka rrezik të zhduken gjenet e pastra të këtyre kombësive. Prandaj, me ndërtimin e një depoje të qelizave të përhershme të pakicave kombëtare, mund të ruhet një sasi e madhe të dhënash të çmueshme të trashëgimisë njerëzore për Kinën dhe për të gjithë botën për studimin e gjendjes shëndetësore dhe të gjeneve njerëzore, madje mund të ruhen mostra për studimin e gjeneve të kombësive edhe pas shumë shekujve. Profesor Çu tha se po të mos e fillojmë këtë punë që tani, Kina do të humbë rastin e ruajtjes në mënyrë të plotë të gjeneve të pastra të kolonave të kombësive të ndryshme.

"Qelizat e përhershme të kombësive të ndryshme janë të dhëna shumë të çmueshme për studimin e disa sëmundjeve të njerëzimit dhe të gjeneve të disa ilaçeve. Ne duhet të mbrojmë këto vendburime të trashëgimisë dhe të bashkëpunojmë me bashkësinë ndërkombëtare. Po bëjmë përpjekje për përsosjen e rregullave të administrimit të vendburimeve të trashëgimisë njerëzore dhe, në fakt, kemi bërë punë për bashkëpunim brenda vendit dhe për bashkëpunim ndërkombëtar."

Disa grupe banorësh të pakicave kombëtare kanë jetuar brez pas brezi në zona malore dhe nuk kanë patur lidhje me kombësinë Han, që përbën mbi 90% të popullsisë kineze, prandaj ata nuk e marrin vesh fare gjuhën hane dhe punonjësit e grumbullimit të mostrave të qelizave nuk kanë si të bisedojnë me ta, dhe as që mund të bëhet fjalë për t'u mbushur mendjen që të na lejojnë t'u marrim gjak si mostra të qelizave. Punonjësit tanë detyrohen t'u drejtohen në radhë të parë sektorëve lokalë të shëndetësisë, me qëllim që ata të komunikojnë me këta banorë në gjuhën e tyre. Kështu marrja e mostrave të qelizave arrihet pas shumë përpjekjesh të vështira. Duke kujtuar punën e tij për të grumbulluar mostra të qelizave në zonat malore të pakicave kombëtare të provincës Junan, zoti Sun Hao tha se, për të siguruar freskinë e mostrave të qelizave, sa herë që i merr ato, duhet t'i çosh pa vonesë në laboratorin e Kunmingut brenda 48 orëve, duke udhëtuar në fillim gjysmë dite me makinë nëpër shtigjet gjarpëruese malore dhe pastaj me aeroplan. Puna e tyre këmbëngulëse vlerësohet lart nga shumica e masave. Studentja e kombësisë mançure, zonjusha Çen tha:

"Unë jam e mendimit se kjo punë ka rëndësi shumë të madhe si për zhvillimin e etnologjisë së vendit tonë, ashtu edhe për zhvillimin e gjenetikës dhe të shkencës mbi jetën. Jam e mendimit, gjithashtu, se meqenëse një pjesë e madhe e zonave të banuara nga pakicat kombëtare janë zona të largëta dhe të pazhvilluara ekonomikisht, kushtet mjekësore në to janë të prapambetura, prandaj është e nevojshme që sa më shumë shkencëtarë dhe etnologë të shkojnë për studim në ato zona, ku ata mund të kenë bëjnë zbulime të reja në lëmë të shkencës së jetës."

Gjatë mbi 10 vjetëve, punonjësit përkatës kanë lënë gjymë në të gjitha provincat dhe rajonet e Kinës, simodos në krahinat e largëta të banuara nga pakicat kombëtare. Deri tani, ata kanë grumbulluar mostra të qelizave të përhershme të 58 kolonave të 42 kombësive. Pas studimit të këtyre mostrave, shkencëtarët kanë thelluar më tej njohurinë e tyre për gjenet e sëmundjeve dhe shkakun e ngjitjes së sëmundjeve dhe kanë arritur progres të rëndësishëm në studimin e gjeneve të shumë sëmundjeve, siç janë sëmundjet e trashëgueshme të gjakut dhe sëmundja Parkinson. Në bazë të marrëveshjeve të arritura, ata i kanë dhënë Qendrës Evropiane të studimit të shumëllojshmmërisë së gjeneve të njerëzimit 149 mostra të qelizave të përhershme, të cilat kanë arritur plotësisht standardet ndërkombëtare, siç vërtetohet nga analizat e bëra nga pala tjetën. (Zheng)