Da Yu kuptoi se babai i tij përdorte metodën e bllokimit të ujërave duke ndërtuar diga, por digat shkatërroheshin shpejt duke u gërryer nga uji dhe, si rezultat, shkaktoheshin dëme edhe më të rënda. Prandaj ai përdori metodën e shkarkimit të ujirave duke hapur kanale. Në krye të ndihmësve ai studioi relievin e zonave të ndryshme duke kaluar male e lumenj. Pastaj ata filluan punimet për hapjen e kanaleve të shkarkimit të ujërave.

Kur u ngarkua me këtë detyrë, Da Yu kishte pak ditë që ishte martuar dhe e shoqja ishte shtatzënë. Gjatë 13 vjetëve të punës për sistemimin e ujërave, ai tri herë kaloi pranë portës së shtëpisë së tij, por nuk hyri asnjëherë brenda. Herën e parë që ai kaloi pranë shtëpisë bashkë me punonjësit e tjerë, biri i tij kishte pak ditë që kisht lindur. Herën e dytë, e shoqja mori të birin dhe shkoi në kantier për të parë atë dhe i biri e thirri atë "baba". Kurse herën e tretë që ai kaloi pranë shtëpisë së vet, i biri ishte dhjetë vjeç e ca . Djali doli te dera dhe i tha babait të hynte në shtëpi, por ky iu përgjigji: "Shko dhe thuaji nënës që të më presë. Do të kthehem, pasi mbaroj këtë punë."

Kallëzimi për Da Yunë, që gjatë sistemimit të ujërave kaloi tri herë pranë shtëpisë së vet dhe nuk hyri asnjëherë, u trashëgua gojë më gojë për më se 4000 vjet në tokën kineze dhe edhe sot i kësaj dite populli e vlerëson punën vetmohuese duke iu referuar shprehjes "si shpirti i da Yusë që sistemoi ujërat".