Gjatë intervistës për grupin televiziv kinez, z.Hysen Hakani rrëfeu jetën e tij kinematografike, rreth filmit "Oshëtimë në bregdet" dhe aktorëve kryesorë të këtij filmi.

Pastaj ai rrefeu edhe për filmin " Njesiti guerril". Ai tregoi në fillim figurat burimore të dy heronjve të luftës antifashiste pastaj vazhdoi edhe për veprimtarinë e njesitit guerril.

Pasi i njohu korrespondentët me sfondin e filmit " Njësiti guerril", regjisori Hysen Hakani filloi t'i përgjigjet pyetjeve të korrespondentëve lidhur me këtë film, si për zgjedhjen e aktorëve, për procesin e xhirimit të një filmi, për ambjentin e xhirimit të këtij filmi etj. Duke iu përgjigjur pyetjes se

"Për të xhiruar një film sa duhej nga ana financiare", z, Hysen hakani tha : "Për të xhiruar një film shpenzimet shkonin 2-3 milionë të vjetra në atë kohë, por nuk shpërbleheshin aktorët, as regjisori, me përjashtim të skenaristit. Gjithashtu nuk bëheshin ndërtime (flas për filmat e parë), por xhirohej në real, domethënë nuk ndërtoja një shtëpi, por gjeja një shtëpi. Pra dhe kjo nuk kishte shpenzime. Në përgjithësi kishte një garderobë shumë të varfër. Shpesh ndonjëri vishte rrobat e veta personale. Pra me shpenzime minimale. Në të rrallë jepej ndonjë shpërblim i vogël, prej 10 mijë lekësh. Më e bukura ishte se merrnim aktorë profesionistë dhe nuk i paguanim, ndërsa ndonjë diletant e paguanim me ndonjë 2 mijë lekësh. Por kjo nuk ndikonte aspak që aktorët të ngurronin të vinin në film. Përkundrazi, meqë këta ishin filmat e parë dhe shfaqnin dëshirë të madhe: "Të lutem, më gjej një rol, më gjej një rol". Nuk merrte asgjë, sakrifikonte. Iknim me muaj të tërë nga familja, pa marrë asnjë lek. Dhe nuk kishim pretendime, përkundrazi, punonim me zell, me pasion. Dhe rrinin gjer në orët e vona të natës. Kjo është e vërteta e mirëfilltë.

Në fillim ashtu është, kemi xhiruar kryesisht filma të luftës. Madje në atë kohë bëhej dhe një plan tematik i Kinostudios. Për një film lufte, e para që duhet të kesh parasysh, është të njohësh kohën kur zhvillohet ngjarja e filmit. Duhet të hysh në detaje si kanë qenë veshur, çfarë regjimi ishte. Këtu duhet të jesh tepër i saktë, me uniformat, me armatimin që këta t'i përgjigjen kohës. Duhet të marrësh vesh disi nga arti luftarak, si sulmohet, si tërhiqet, si bëhet aksioni. Pra, duhet të bëhesh një çerek ushtaraku që të dalë me vërtetësi filmi.(Zhai)