Gazeta kineze "Muzika" njoftoi se me rastin e 250-vjetorit të lindjes së Mozartit, në gusht të këtij viti do të zhvillohet "Koncerti i veprave të Mozartit të interpretuara nga fëmijët kinezë" i organizuar nga Fondacioni Simfonik i Kinës dhe Lidhja Simfonike e Kinës.

Kryetarja e Fondacionit Simfonik të Kinës Guo Shan u shpreh se tani shumë fëmijë kinezë po mësojnë t'u bien veglave muzikore, kurse veprat e Mozartit interpretohen shpesh nga fëmijët. Zhvillimi i këtij koncerti do të ngrejë nivelin artistik të fëmijëve dhe do të nxitë përhapjen e simfonisë.

Do të zhvillohet në Kinë "Viti i Ibsenit"

Gazeta kineze "Xinjingbao" njoftoi se qysh nga 20 marsi, artistët kinezë dhe ata norvegjezë do të fillojnë të zhvillojnë një sërë aktivitetesh në Pekin, Shangai dhe Nankin për të përkujtuar 100-vjetorin e vdekjes së dramaturgut norvegjez Henrik Ibsen.

Ibseni është një dramaturg modern, kryevepra e të cilit është "Shtëpia e Kukullës". Sot çdo ditë veprat e Ibsenit shfaqen në skenat e vendeve të ndryshme. "Shtëpia e Kukullës" u shfaq për herë të parë në skenën kineze në vitin 1914. Veprat e Ibsenit kanë pasur ndikim të madh për zhvillimin e artit dramatik të Kinës. Këtë vit, regjisori i famshëm kinez Lin Zhaohua do të bashkëpunojë me regjisorë norvegjezë për të vënë në skenë vepra të Ibsenit.

Teatri digjital "Shidaihuaxia" zhvilloi ceremoninë e shfaqjes së premierës së filmit "Mali Dingjun"

Gazeta kineze "Renminribao" njoftoi se ditët e fundit, teatri digjital "Shidaihuaxia" zhvilloi në Pekin ceremoninë e shfaqjes së premierës së filmit "Mali Dingjun".

Teatri digjital "Shidaihuaxia" është një teatër privat. Këtë vit, ky teatër do të investojë 500 milionë juanë për të krijuar më shumë degë të tij në mbarë vendin.

Filmi "Mali Dingjun" është një vepër në përkujtim të 100-vjetorit të lindjes së filmit kinez. Në vitin 1905, kinezi Ren Qingtai xhiroi filmin e operës së Pekinit "Mali Dingjun". Ky është filmi i parë kinez.

Qyteti Huhehaote do të ndërtojë 9 muzeume të posaçme

Gazeta kineze "Kultura kineze" njoftoi se nga viti 2006 deri në vitin 2010, kryeqendra e Rajonit Autonom të Mongolisë së Brendshme të Kinës Huhehaote do të ndërtojë 9 muzeume të posaçme.

Siç bëhet e ditur, këto 9 muzeume përfshijnë Muzeumin e Folklorit, Muzeumin e Ushqimeve, Muzeumin e Kullotave etj.

Rajoni Autonom i Mongolisë së Brendshme që ndodhet në Kinën veriore banohet kryesisht nga kombësia mongole. Kjo kombësi ka një histori të gjatë dhe një kulturë të veçantë të lidhur me kullotën. (Fani)