35-vjeçarja Tao Hong ka lindur në qytetin Congqing të Kinës jugperëndimore. Kur ishte në moshë të re, ajo shfaqi talentin në fushën e këngës dhe të kërcimit. Në moshën 11-vjeçare, Tao Hong u pranua në shkollën artistike për të mësuar kërcim. Pas 8 vjetëve, ajo u pranua me rezultate të mira në Universitetin Qendror të Dramës duke filluar zyrtarisht jetën e aktores së filmit dhe dramës televizive.

Në vitin 1998, Tao Hong fitoi çmimin e aktores më të mirë të artit televiziv të Pekinit për interpretimin e mirë në dramën televizive "Familja afër lumit Yunhe". Më pas në dramën televizive "Vrima", ajo interpretoi gruan e një krimineli duke u lënë shikuesve përshtypje të thellë. Megjithatë, shumë shikues ishin të mendimit se Tao Hong është vetëm një aktore e re dhe e bukur dhe nuk ka shumë talent në fushën e interpretimit. Ky qëndrim ndryshoi pasi Tao Hong xhiroi filmin "Jeta".

Filmi "Jeta" është kryevepra e Tao Hongut. Filmi tregon jetën e një pronareje restoranti. Tao Hong e interpretoi me sukses këtë grua moderne që kapërcen vështirësitë e jetës duke kërkuar me guxim dashurinë. Në film, në restorantin e Tao Hongut shërbehet posaçërisht rosë. Para xhirimit Tao Hong harxhoi 4 muaj për të mësuar gatimin e ushqimeve. Duke kujtuar procesin e xhirimit të filmit, Tao Hong tha:

"Ky film ishte një sfidë e madhe për mua. Për ta luajtur mirë këtë rol, para xhirimit, unë qëndrova tërë ditën në shtëpi dhe bëra shumë përgatitje."

Për shkak të interpretimit të spikatur në filmin "Jeta", në vitin 2002, Tao Hong fitoi 3 çmime të aktores më të mirë të filmit. Këto çmime i kanë sjellë Tao Hongut më shumë mundësi për të pasur role në filma dhe në drama televizive ku Tao Hong filloi të luajë karaktere të ndryshme. Ajo tha:

"Shumë regjisorë më ftuan të interpretoj role si pronare restoranti, por zgjodha filmin 'Tajkuondo' sepse dua të interpretoj një rol me tipare të veçanta."

Në filmin "Tajkuondo" Tao Hong interpreton një sportiste. Për të zotëruar mjeshtërinë e Tajkuondosë, ajo u ushtrua pa u lodhur. Si rezultat, shumë sportistë janë të mendimit se ajo është një sportiste profesioniste. Interpretimi i Tao Hongut në filmin "Tajkuondo" fitoi përshëndetjet e shikuesve dhe të specialistëve sportivë.

Në fund të vitit 2004, Tao Hong xhiroi dramën televizive "Kënga e dashurisë Kangding". "Kënga e dashurisë Kangding" përshkruan një histori dashurie në Kangding të Kinës jugperëndimore. Në këtë dramë Tao Hong interpreton dy role, vajzën tibetiane Kang Zhu dhe nënën e saj Zhuo Ma. Tao Hong jo vetëm luan një vajzë të ëmbël, por interpreton edhe një nënë të hijshme. Kjo është një sfidë tjetër për Tao Hong, interpretimi i së cilës është shumë i suksesshëm.

Pas hyrjes në qarqet artistike, veprat e Tao Hongut nuk janë të shumta, sepse ajo i zgjedh rreptësisht rolet. Çdo rol i interpretuar nga Tao Hong ka karakteristikat e veta. Vitet e fundit, interpretimi i Tao Hongut është mirëpritur nga më shumë shikues, por ajo nuk ka famë si një yll. Tao Hong u shpreh:

"Dua të kaloj një jetë të qetë, ky është karakteri im. Jam aktore, do të interpretoj më shumë role të mira për shikuesit që më duan."

Tani Tao Hong po xhiron dramën televizive "Restoranti i nënës". Ajo interpreton një valltare të kombësisë koreane Bai He. Këtë herë, Tao Hong mësoi posaçërisht vallen e daulles të kombësisë koreane. Vallet e shkëlqyeshme të Tao Hongut në dramën televizive "Restoranti i nënës" do të tërheqin përsëri vëmendjen e shikuesve. (Fani)