Në shtator të vitit 2003, qeveria kineze nisi të zbatojë politikën e heqjes së pagesës për librat dhe shkollimin dhe të dhënies së ndihmës financiare nxënësve konviktorë. Deri në semestrin e pranverës së këtij viti, iu hoqën pagesa për librat dhe shkollimin fëmijëve të familjeve të varfra të 592 distrikteve kryesore.

Në "Raportin shtetëror mbi arsimimin e mbarë popullit kinez" të publikuar për herë të parë thuhet se "deri në vitin 2007, të gjithë fëmijët e familjeve të varfra fshatare nuk duhet të paguajnë më për librat dhe shkollimin dhe asnjë nxënës nuk duhet të shkëputet nga shkolla. Deri në vitin 2010, në zonat fshatare të mbarë vendit duhet të nisë zbatimi i arsimit të detyrueshëm 9-vjeçar.

Pas zbatimit të kësaj politike, për çdo nxënës të arsimit fillor u hoqën 200 juanë, ndërsa për çdo nxënës të shkollës së mesme 340 juanë. Në vitin 2005, 30 milionë nxënësve të shkollës fillore dhe të mesme nga familjet e varfra të fshatit iu hoq pagesa për librat dhe shkollimin. Shteti do të japë 22 miliardë e 700 milionë juanë për zbatimin e plotë të kësaj politike nga viti 2005 deri në vitin 2007.

Pas zgjidhjes së problemit të parave, mbetet edhe një problem tjetër. Në zonat perëndimore me pak popullsi dhe me lartësi të madhe mbi nivelin e detit, ku ka rrafshënaltë dhe klimë të ftohtë, ekzistojnë 90 mijë qendra mësimdhënieje, secila me nga një mësues. Këto qendra nuk mund të sigurojnë cilësinë e mësimdhënies, por edhe sikur ngriheshin shkolla, largësia nuk do t'i lejonte nxënësit të shkonin në shkollë. Ç' duhet bërë ?

Në vitin 2004, qeveria qendrore dhe administratat qeveritare të provincave filluan të zbatojnë një plan, sipas të cilit, gjatë 4 vjetëve do të ngrihen me 10 miliardë juanë investime të qeverisë 7727 shkolla me konvikte, për të ndihmuar 1 milion e 65 mijë nxënës të fshatit të shkollohen. Sot qindra mijë nxënës të shkollave fillore të zonave perëndimore banojnë në konviktet e shkollave.

Arsimi modern në distancë të largët u ka krijuar fëmijëve fshatarë mundësi për arsimim cilësor. Që nga viti 2003, Ministria e Arsimit, Komiteti shtetëror i zhvillimit dhe i reformës dhe Ministria e Financave filluan të zbatojnë "veprën e arsimimit modern në distancë të largët në shkollat fillore dhe të mesme të fshatit kinez", në krahinat e ndryshme janë krijuar pikat e transmetimit të disqeve mësimore, qendrat e mësimdhënies nëpërmjet satelitit dhe është mundësuar mësimdhënia nëpërmjet internetit.

Nëpërmjet arsimit modern në distancë, nxënësit e shkollave fillore dhe të mesme në zonat të thella malore, në pyjet e dendura dhe në shkretëtira mund të gëzojnë burimet arsimore të shkollave dhe mësuesve të njohur qytetarë, duke zvogëluar distancën e arsimimit midis qytetit dhe fshatit.

Gjatë 5 vjetëve të ardhshëm, qeveria do të japë fond të posaçëm për të ngritur klasën e kompjuterave dhe klasën e multimedias në të gjitha shkollat e mesme të ciklit të ulët të fshatit, në të gjitha qendrat e mësimdhënies së fshatit do të jepet mësim nëpërmjet satelitit, do të ketë pajisje të transmetimit të disqeve mësimore cilësore DVD. Kështu nxënësit e fshatrave mund të përdorin mjetet mësimore që përdorin nxënësit e qyteteve të Pekinit, Shangait etj. (Pina )