dëgjoni 

Më 23 shkurt sipas orës së Italisë, në Lojërat Olimpike Dimërore të Torinos, skiatori kinez Han Xiaopeng u shpall kampion në garën e teknikave në ajër të stilit të lirë për meshkuj. Kjo është medalja e parë e artë olimpike e Kinës në sportet e dëborës dhe gjithashtu medalja e parë e artë olimpike e një sportisti mashkull kinez. Atëherë si u hap kjo faqe e re historike dhe si e arriti Kina të ketë këtë përparim? 

22 shkurti ishte një ditë dëshpërimi për skiatoret kineze të teknikave në ajër të stilit të lirë. Ato kanë epërsi të madhe ekipore në këtë disiplinë, por asnjëra prej tyre nuk mundi të fitonte medalje ari olimpike. Të rrethuar nga psherëtimat, askush nuk e parashikonte se medalja e artë në këtë disiplinë për meshkuj do të fitohej nga një kinez vetëm një ditë më vonë. Më 23 shkurt, në finalen e teknikave në ajër të stilit të lirë për meshkuj, skiatori Han Xiaopeng, që u radhit në vendin e parë në garën fillestare, zbriti qëndrueshëm në dy kërcimet e tij. Megjithëse veprimet e tij nuk ishin të një shkalle të lartë vështirësie, prapëseprapë zbritjet e mrekullueshme e gjitën atë në podin e kampionit. Ndërkohë, skiatori kanadez Uarren Soldis dhe ai amerikan Xheret Peterson, që vepruan në shkallë të lartë vështirësie, nuk u përfshinë as në 3 vendet e para si pasojë të dështimit në zbritje.

Medalja e artë e Han Xiaopeng-it është e dyta medalje ari e delegacionit kinez në Torino. Kryetari i Komitetit Olimpik të Kinës. Liu Peng e vlerësoi lart rëndësinë e kësaj medaljeje. Ai tha:

"Kjo medalje ari u fitua me aq shumë vështirësi dhe është shumë e shtrenjtë. Ky është rezultati i përpjekjeve të disa brezave kinezë."

Trajneri kryesor i ekipit të Kinës, kanadezi Dustin Uilson u shpreh se më parë ai nuk e kishte çuar kurrë nëpër mend që Kina do të shpallej kampion në këtë disiplinë për meshkuj, por fakti vërteton potencialin e ekipit kinez dhe drejtësinë e taktikës së tij. Ai tha: 

"Ky është një gëzim krejt i papritur. Unë flas për faktin se për ne shkalla e vështirësisë nuk është më e larta, por jemi treguar të zgjuar që e kemi përqendruar vëmendjen në zbritje. Kjo është arsyeja e suksesit tonë."

Edhe përpjekjet individuale të Han Xiaopeng-it nuk duhen lënë mënjanë. Ky djalë 23 vjeçar nuk ishte shpallur kampion në turnetë e Kupës Botërore dhe rezultati i tij më i mirë ishte vendi i 3-të në renditjen botërore. Por ky djalosh i zellshëm, i shkathët dhe me cilësi të mira psikologjike nxori mësim nga dështimi i skiatoreve kineze dhe krijoi mrekullinë e vet. Ai tha se keqardhjet e skiatoreve e nxitën atë të përpiqej të realizonte ëndrrën që Kina ushqente prej kohësh në sportet në dëborë.

"Në garën e djeshme për femra, fryma e tyre e luftarake më ka lënë përshtypje të thellë dhe ia vlen të mësoj nga ato. Por rezultati i tyre më erdhi keq. Pra, pas garës mendova nëse do të arrij ta realizoj ëndrrën e disa brezave të kinezëve për sportet e dëborës. Sot, krejt pa pritur nga të gjithë, e realizova me të vërtetë këtë ëndërr!"

Medalja e Han Xiaopeng-it ishte një gëzim i "papritur", por ajo pasqyron në mënyrë objektive drejtimin e përpjekjeve të Kinës në disiplinën e teknikave në ajër të stili të lirë, dmth, ndërkombëtarizmin. Qysh nga viti 2004 kanadezët Dustin Uilson dhe Lucinda Tomson filluan të punonin përkatësisht si trajner kryesor dhe ai i energjisë trupore të ekipit kinez. Funksionar përkatës i Drejtorisë Shtetërore të Sportit të Kinës, z. Ren Hongguo është i mendimit se këta trajnerë të huaj i kanë sjellë ekipit kinez koncepte krejtësisht të reja dhe të përparuara, të cilat kanë favorizuar dhe do të favorizojnë më tej skiatorët kinezë në këtë disiplinë. Ai tha:

"Kanadaja është vendi i parë që zhvilloi rrëshqitjen e skive të stilit të lirë. Trajnerët e huaj kanë sjellë koncepte të përparuara në Kinë dhe skiatorët kinezë njohin këtë disiplinë në mënyrë krejt të re. Ata filluan të mësojnë se rrëshqitja me ski është jo vetëm një sport, por edhe kulturë. Krahas stërvitjeve të zellshme, duhet ta konsiderojnë këtë sport si dëfrim. Në këtë mënyrë, ka ndryshuar gjendja shpirtërore e sportistëve. Në këtë disiplinë, ne duhet të ndjekim rrugën e ndërkombëtarizimit dhe faktet tregojnë se kjo është një rrugë e suksesshme."

Nga mësimet e kaluara deri në suksesin e sotëm, Ren Hongguo parashikon me vetëbesim se pas kësaj medaljeje ari, do të vijë së shpejti "pranvera" e sporteve të dëborës të Kinës. (Wang Lei)