dëgjoni

Më 26 shkurt, me rastin e mbylljes së Lojërave të 20-ta Olimpike Dimërore në Torino, korrespondenti i Radios së Jashtme të Kinës i mori një intervistë të posaçme kryetarit të Komitetit Olimpik Ndërkombëtar, Xhak Rog. Gjatë intervistës, ndër të tjera Rog shprehu shpresë të madhe për Lojërat Olimpike të Pekinit.

Rogu i vlerësoi Lojërat Olimpike Dimërore të Torinos me fjalën "të shkëlqyeshme", gjë që tregon se Komiteti Olimpik Ndërkombëtar dhe Rogu janë të kënaqur për këto lojëra. Gjatë intervistës për korrespondentin e radios sonë, Rogu tha:

"Jemi shumë të gëzuar, sepse komitetet olimpike të vendeve të ndryshme dhe federatat ndërkombëtare të sporteve të ndryshme janë të kënaqura dhe po ashtu edhe kompanitë e transmetimit televiziv. Ky është suksesi më i madh i miqve tanë italianë."

Edhe delegacioni kinez ka patur suksesin e duhur në këto lojëra. Kina fitoi 2 medalje ari, 4 argjendi dhe 5 brozi, duke radhitur në vendin e 14-të për medalje ari dhe vendin e 9 për numrin e përgjithshëm të medaljeve. Megjithëse ky rezultat nuk është aq i mirë sa 32 medaljet e arta në Lojërat Olimpike të Athinës, prapëseprapë, Rogu i lavdëroi përparimet e Kinës në sportet dimërore. Ai tha:

"Mendoj se përparimet tuaja janë shumë të shpejta. Para kësaj, kishit rezultate të mira vetëm në sportet në akull, si patinazhi i shpejtë në pistë të shkurtër. Por tani, arritët sukses edhe në dëborë, Han Xiaopeng u shpall kampion olimpik në teknikat në ajër të skijimit me stil të lirë. Kjo është një pikënisje e mirë. Besoj se pas disa vjetësh, Kina do të ketë sukses edhe në sportet dimërore ashtu si në ato verore. Kam besim të plotë për këtë, sepse përparimet tuaja janë tepër shpejta."

Pavarësisht se nga nisesh, Lojërat Olimpike Dimërore të Torinos arritën sukses dhe në bazë të këtij suksesi, Rogu dhe Komiteti Olimpik Ndërkombëtar shpresojnë shumë te Lojërat Olimpike të Pekinit. Rogu është i mendimit se megjithëse Pekini i ka zhvilluar normalisht punët përgatitore, ai ndodhet ende përpara sfidave serioze. Ai tha: 

"Ajo do të jetë sfidë shumë serioze, sepse duhet të shfaqeni të suksesshëm në shumë drejtime, si në garantimin e sigurisë, në trafikun rreth stadiumeve sportive, në transmetimet televizive, shpërndarjen e shikuesve, shërbimet mjekësore, etj. Këto janë punë shumë të ndërlikuara dhe të vështira."

Rogu premtoi gjithashtu se Komiteti Olimpik Ndërkombëtar do t'i japë Pekinit ndihma në çdo anë, duke përfshirë këtu edhe trashëgimin e përvojës së suksesshme.

Në fund të intervistës, Rogu shprehu shpresën se nëpërmjet emisioneve të Radios së Jashtme të Kinës, do të ketë mundësi t'i transmetojë falënderimet e tij Kinës për përpjekjet e saj në zhvillimin e Olimpiadës. Rogu tha: 

"Dua t'u transmetoj falënderimet e mija shumë miqve kinezë për përpjekjet e tyre në zhvillimin e Olimpiadës dhe veçanërisht në punët organizative për Lojërat Olimpike të Pekinit. Nuk mbeten as edhe 1000 ditë para hapjes së këtyre Lojërave. Shpresoj se organizatorët do të vazhdojnë përpjekjet e zellshme që Lojërat Olimpike të Pekinit të jenë shumë të suksesshme. I uroj Pekinit Suksese! Faleminderit Pekinit!"  (Wang Lei)