dëgjoni

Më 15 shkurt në Lojërat Olimpike Dimërore të Torinos, në garën e patinazhit të shpejtë në pistë të shkurtër 500 metra për femra, e reja kineze Wang Meng fitoi medaljen e parë të artë, për delegacionin kinez në këto lojëra. Por si e fitoi Wang Meng këtë medalje të artë dhe cila është kjo sportiste? 

Wang Meng, që nuk ka mbushur ende 21 vjeçe, mori pjesë për herë të parë në Lojërat Olimpike. Pavarësisht nga mosha e re, ajo duhej të kalonte një provë të vështirë në Lojërat Olimpike Dimërore, dmth. asaj i binte barra që të fitonte medaljen e artë në patinazhin e shpejtë në pistë të shkurtër 500 metra për femra. Në Lojërat Olimpike Dimërore të vitit 2002 në Salt-Leik-Siti, patinatorja kineze Yang Yang fitoi medaljen e parë olimpike për sportet dimërore kineze. Edhe gjatë 4 vjetëve pas atyre lojërave, potenciali i përgjithshëm i Kinës në këtë disiplinë ka qenë më i fuqishëm se i vendeve të tjera. Prandaj fitimi i medaljes së artë në këtë disiplinë në Torino u konsiderua si detyrë që duhet kryer. Wang Meng u radhit në vendin e parë për numrin e përgjithshëm të pikëve në këtë sezon të Kupës Botërore dhe u konsiderua nga shumë njerëz si konkurruesja më me potencial për fitimin e medaljes së artë. Duke qenë se të tjerët mbanin aq shumë shpresë tek ajo, Wang Meng e ndjeu veten nervoze. Në një intervistë pas garës, Wang Meng tha:

"Ndoshta ngaqë ishte hera e parë për mua që merrja pjesë në Lojërat Olimpike, e ndjeva veten nervoze. Gjatë intervistave në Kinë para Lojërave Olimpike, unë i thashë shtypit se nuk isha nervoze dhe s'kisha asnjë presion. Por kur erdha me të vërtetë në pistën e Lojërave Olimpike, zbulova se Olimpiada është krejtësisht e ndryshme nga Kupa Botërore dhe Kampionati Botëror."

Për shkak të nervozizmit, Wang Meng nuk mund të çlirohej qysh në garat fillestare. Megjithëse ajo i tha vetes se ishte diçka e lehtë, prapëseprapë, atmosfera e Lojërave Olimpike e solli pak a shumë ethe këtaj vajze me karakter djali. Më 15 shkurt, në gjysmë finale Wang Meng ishte më nervoze se kurrë, pasi dy rivalet e saj kryesore, bullgarja Evgenia Radanova dhe kanadzeja Kalina Roberg ishin në të njëjtin grup me të. Njëra prej tyre pa tjetër do të përjashtohej nga finalja, ndërsa Wang Meng zuri korsinë e 3-të, korsia më e keqe. Përballë kësaj prove serioze, Wang Meng e hoqi barrën shpirtërore që e rëndonte. Me të nisur gjysmë-finalja, ajo theu me guxim bllokimin midis Radanovës dhe Robergut dhe zuri vemd më krye. Më në fund, Wang Meng hyri normalisht në finale, ndërsa Roberg u eliminua. Trajneri i Wang Meng-ut, Yi Ming është i mendimit se rëndësia e gjysmë-finales është jo vetëm eliminimi i një rivaleje të fuqishme, por edhe fitorja mbi Radanovën, mbajtëse e rekordit botëror, gjë që i dha goditje vetëbesimit të rivales. Yi Ming tha:

"Me të fituar në gjysmë finale, kishim besim mbi 50% për shpalljen kampion."

Fakti tregoi se paraqitja e guximshme e Wang Meng-ut në gjysmë finale hodhi një bazë të mirë për fitoren e saj në finale. Në finalen, Radanova nuk kishte rast të dukshëm për ta kaluar Wang Meng-in, ndërsa Wang Meng, që zuri me short korsinë e parë, korsinë më të favorshme, zuri vendin e parë qysh nga pikënisja deri në fund.

Duke mposhtur nervozizmin e vet dhe rivalet, e reja Wang Meng fitoi medaljen e artë në Lojërat Olimpike Dimërore të Torinos për veten dhe për delegacionin kinez.

Pas fitores, e reja Wang Meng tregoi gjakftohtësi. Ajo tha:

"Duhet të jem e qetë, sepse para 25 shkurtit do të marr pjesë në gara në 3 disiplina, veçanërisht stafeta 3000 metra do të jetë më e rëndësishmja. Unë së bashku me shoqet e mia do të përpiqemi me të gjitha forcat për të fituar sa më shumë medalje ari për Kinën." (Wang Lei)