dëgjoni

Në çdo festë tradicionale kineze, profesori Tao Lifan është shumë i zënë sepse ai është nënkryetar i Shoqatës Folklorike të Kinës e shumë gazetarë duan ta intervistojnë për të folur për kulturën tradicionale kineze.

Tao Lifan ka lindur në vitin 1938 në qytetin Lanzhou të provincës Gansu. Pas mbarimit të studimeve në Universitetin Pedagogjik të Pekinit, ai u bë pedagog në Universitetin Qendror të Kombësive të Kinës dhe nisi të merret me studimin e folklorit dhe të letërsisë popullore të pakicave kombëtare. Tani Tao Lifan është kryetar i Shoqatës Ndërkombëtare të Folklorit Aziatik dhe nënkryetar i Shoqatës Folklorike të Kinës.

Foklori është kujtesa kulturore e një kombi. Me zhvillimin e ekonomisë kineze, njerëzit i kanë kushtuar vëmendje më të madhe kulturës folklorike. Si një specialist folklori, Tao Lifan është shumë i gëzuar për këtë. Tao Lifan ndien dashuri të thellë për kulturën tradicionale kineze. Gjatë studimeve mbi 40-vjeçare, ai ka qenë shumë herë në zonat e pakicave kombëtare për të njohur gjendjen e folklorit. Ai tha:

"Për një folklorist, është shumë e rëndësishme që të njohë kulturën tradicionale. Kam qenë në shumë zona të pakicave kombëtare për hulumtime. Jam i mendimit se masat popullore vendëse janë forca kryesore që ruan kulturën tradicionale."

Deri tani, Tao Lifan ka botuar mbi 20 vepra të posaçme. Ndër to "Teoria e folklorit" është përkthyer në shumë gjuhë për t'u botuar jashtë vendit. Ai ka qenë shumë herë në vende të tjera për mësimdhënie. Në vitin 1996, Tao Lifan organizoi Simpoziumin ndërkombëtar akademik të kulturës folklorike të Azisë Lindore. Me propozimin e tij, u krijua Shoqata Ndërkombëtare e Folklorit Aziatik dhe ai u bë kryetari i shoqatës. Tao Lifan tha:

"Shpresoj që Shoqata Ndërkombëtare e Folklorit Aziatik do të luajë një rol aktiv për nxitjen e shkëmbimeve dhe të njohjes midis vendeve të ndryshme në fushën e studimeve për folklorin aziatik."

Tao Lifan tha se midis vendeve të ndryshme aziatike ka shumë zakone të afërta ose të njëjta. Ai shpreson se nëpërmjet përpjekjeve të folkloristëve, këto zakone do të luajnë plotësisht rolin e shkëmbimeve duke nxitur njohjen dhe miqësinë midis popujve të vendeve të ndryshme. Deri tani, Shoqata e Folklorit Aziatik ka zhvilluar 8 konferenca akademike. Pas çdo konference botohen veprat e posaçme që kanë nxitur fuqimisht shkëmbimet dhe studimin e folklorit midis vendeve të ndryshme aziatike.

Ekonomia kineze po zhvillohet shpejt, si rezultat, ka ndryshuar struktura tradicionale shoqërore. Shumë njerëz janë të mendimit se pasuritë do të thonë lumturi, por Tao Lifan nuk është në një mendje me këtë. Ai është i mendimit se shumë qytetarë nuk jetojnë më të lumtur se banorët në fshat. Ai tha:

"Shumë banorë të pakicave kombëtare jetojnë në zona të varfra dhe të largëta, ku kushtet e jetës janë të këqija, por ata jetojnë të gëzuar, sepse kanë kulturën e vet. Një detyrë e rëndësishme jona është që të përhapim kulturën e tyre."

Në vitin 1999, Tao Lifani dhe artisti i famshëm Chen Peisi krijuan së bashku uebsajtin "Folklori kinez" dhe ai u bë drejtuesi i parë i këtij uebsajti. Sot ky uebsajt është bërë një dritare e rëndësishme e folklorit kinez. Tani Tao Lifan po redakton librat "Letërsia popullore kineze - proverbat" dhe "Folklori kinez".

Tao Lifan është shumë i zënë me studimet, por në kohën e lirë, atij i pëlqen shumë të merret me pikturën. Ai ka talent në këtë fushë dhe deri tani ka zhvilluar 3 ekspozita vetjake pikture.

Tao Lifan është një studiues tradicional kinez që e do shumë kulturën tradicionale kineze dhe është shumë entuziast për historinë, letërsinë, folklorin etj. të Kinës. Ai është i mendimit se kultura tradicionale kineze duhet mësuar në mënyrë dialektike, sepse në kulturën tradicionale kineze ka edhe disa gjëra të prapambetura. Vetëm kështu, kultura tradicionale kineze do të luajë rolin e duhur. (Fani)