dëgjoni

Agjencia kineze e lajmeve Hsinhua njoftoi se më 17 shkurt, gazeta e vetme në gjuhën angleze në rang shtetëror në Kinë "China Daily" filloi të zhvillojë një sërë aktivitetesh për të kremtuar 25-vjetorin e krijimit të saj.

Gazeta ditore "China Daily" u krijua në vitin 1981. Tani tirazhi mesatar ditor i botimit të gazetës i kalon 200 mijët. Si një dritare për njohjen e Kinës, gazeta "China Daily" vazhdon të jetë një nga mediat në gjuhën angleze me më shumë autoritet në Kinë.

Siç bëhet e ditur, aktivitetet kremtuese përfshijnë zhvillimin e Forumit të Gazetës "China Daily"; zhvillimin e konkursit të fotografive të shtypit; zhvillimin e konkursit të leksioneve për gjuhën angleze etj.

Vallet "Buda me një mijë duar" do të shfaqen në korrik në Tajvan

Agjencia kineze e lajmeve Hsinhua njoftoi se vallet e njerëzve me të meta fizike "Buda me një mijë duar" do të shfaqen në korrik në Tajvan.

Vallet "Buda me një mijë duar" të interpretuara nga 21 artistë me të meta fizike të Trupës Artistike të Njerëzve me të meta fizike të Kinës u shfaqën për herë të parë në mbrëmjen e Festës së Pranverës të vitit 2005 të Televizionit Qendror të Kinës duke ngjallur jehonë të madhe.

Tani organet përkatëse të dy brigjeve po konsultohen për hollësitë lidhur me shfaqjen. Sipas planit, vallet "Buda me një mijë duar" do të shfaqen të paktën 10 herë në qytetin Tajpei dhe në qytetin Taizhong. Krahas këtyre, artistët me të meta fizike do t'u bien edhe veglave muzikore dhe do të këndojnë.

Filloi rindërtimi i banesës së vjetër të perandorit të fundit kinez Pu Yi në Tianjin

Agjencia kineze e lajmeve Hsinhua njoftoi se ditët e fundit, filloi puna për rindërtimin e banesës së vjetër të perandorit të fundit të Kinës Pu Yi në qytetin Tianjin. Vepra e rindërtimit nuk do ta ndryshojë pamjen e mëparshme të banesës. Parashikohet që vepra të përurohet brenda këtij viti.

Në vitet '20 dhe '30 të shekullit të kaluar, perandori i fundit Pu Yi banonte në Tianjin. Më vonë, banesa e vjetër u shkatërrua nga tërmeti. Pas rindërtimit, në banesën e Pu Yi-së do të ndërtohet një muze për të treguar jetesën e Pu Yi-së në Tianjin.

Në vitin 1908, 3-vjeçari Pu Yi u bë perandori i fundit i dinastisë Qing. Në vitin 1912, ai abdikoi nga froni duke shpallur përfundimin e sistemit feudal mbi 2000 vjeçar në Kinë. Pas krijimit të Republikës Popullore të Kinës, Pu Yi u bë një shtetas i zakonshëm.

Filloi veprimtaria "Viti i trashëgimive botërore të Makaos"

Korrespondentja e Radios së Jashtme të Kinës njoftoi se më 18 shkurt, Drejtoria Turistike e Rajonit të Posaçëm Administrativ të Makaos zhvilloi në Makao ceremoninë e fillimit të veprimtarisë "Viti i trashëgimive botërore të Makaos" duke nisur një sërë aktivitetesh propaganduese për Makaon.

Siç bëhet e ditur, në veprimtarinë "Viti i trashëgimive botërore të Makaos" përfshihen përhapja e trashëgimive botërore të Makaos jashtë vendit, shfaqje artistike etj. Qeveria e rajonit të posaçëm të Makaos do të marrë pjesë aktivisht në ekspozitat kryesore turistike botërore dhe do të ftojë specialistë dhe media të vizitojnë Makaon për të propaganduar këtë rajon. (Fani)