Korrespondenti i Radios së Jashtme të Kinës njoftoi se siç bëhet e ditur më 10 shkurt nga Ministria e Kulturës e Kinës, qeveria kineze po merr masa për të përkrahur zhvillimin e trupave të operës së Pekinit të mbarë vendit.

Vitet e fundit, qeveria kineze ka hartuar politikën e përkrahjes për të zgjidhur vështirësitë dhe problemet në zhvillimin e trupave të operës së Pekinit, si për shembull dhënia e fondeve këtyre trupave për ndërtimin e teatrave. Tani, Pekini po ndërton teatrin e operës së Pekinit me emrin "Mei Lanfang"-artist i famshëm i operës së Pekinit, qyteti Tianjin ka investuar 100 milionë juanë në ndërtimin e teatrit të operës së Pekinit e krahas këtyre, disa krahina kanë krijuar fondacione të posaçme për të përgatitur talente të operës së Pekinit.

Siç mësohet, qeveria kineze vendosi të përkrahë kryesisht 11 trupa të famshme të operës së Pekinit si Trupën e Operës së Pekinit të Kinës, Trupën e Operës së Pekinit të Pekinit, Trupën e Operës së Pekinit të Shangait etj.

Trupa Qendrore e Baletit do të krijojë Fondacionin e Valleve "Dai Ailian"

Gazeta "Jinghuashibao" njoftoi se Trupa Qendrore e Baletit e Kinës do të krijojë Fondacionin e Valleve "Dai Ailian" për të ndihmuar krijuesit dhe valltarët e Kinës.

Dai Ailian është një nga pionierët dhe krijuesit e artit modern të valleve të Kinës, valltare e famshme, arsimtare, kryetare nderi e Shoqatës së Valltarëve të Kinës, drejtuese artistike e Trupës Qendrore të Baletit. Ajo vdiq në Pekin më 9 shkurt në moshën 90-vjeçare.

Dai Ailian u rrit në Angli. Në vitin 1940, gjatë Luftës së Popullit Kinez kundër agresorëve japonezë, ajo u kthye në atdhe dhe u mor me çështjen e valleve kineze. Në vitet '40 të shekullit të kaluar, me përpjekjet e Dai Ailianit, vallet popullore kineze u ngjitën për herë të parë në skenë si një art i pavarur. Vallet "Lotusi" dhe "Fluturimi në qiell" të krijuara nga ajo u përcaktuan nga qeveria kineze "vallet klasike të shekullit të 20-të".

Është përcaktuar lista e trashëgimive shtetërore kulturore jomateriale të Kinës

Korrespondenti i Radios së Jashtme të Kinës njoftoi se puna për regjistrimin e trashëgimive shtetërore kulturore jomateriale po zhvillohet normalisht e deri tani janë përzgjedhur 501 nga projektet e propozuara.

Një përgjegjës i Ministrisë së Kulturës të Kinës tha se këto projekte u përzgjodhën nga mbi 1300 projekte të propozuara nga 31 provinca, rajone e qytete të mbarë vendit dhe ndahen në 10 lloje: letërsi popullore, muzikë, valle, dramë, operë etj. Edhe festat tradicionale kineze si Festa e Pranverës, Festa e Fenerëve etj. janë radhitur në listën e projekteve të propozuara. (Fani)