34-vjeçarja Ma Liwen është një regjisore plot vetëbesim. Entuziazmi i saj për artin e filmit është i famshëm në qarqet e filmit. Gjatë 5 vjetëve, ajo xhiroi dy filma me investime të pakta "Vdiq njeriu që më donte shumë" dhe "Ne të dy". Këta dy filma fituan çmime si brenda dhe jashtë vendit dhe kjo s'është një gjë e lehtë për një regjisore të re. Ma Liwen tha:

"Këta dy filma u përshëndetën nga shikuesit, jam e mendimit se ky është sukses për mua."

Në vitin 2001, Ma Liwen xhiroi filmin "Vdiq njeriu që më donte shumë". Ky film tregon për një shkrimtare që vizitoi nënën mbi 80-vjeçare duke zbuluar se ajo ishte plakur shumë. Mjeku i tregoi shkrimtares se nënës së saj i mungojnë ushtrimet fizike, prandaj shkrimtarja e nxiti me të gjitha përpjekjet nënën për të bërë ushtrime fizike. Një ditë në mëngjes, nëna vdiq duke bërë ushtrime. Ky është një film shumë prekës ku ndjenjat e vërteta midis nënës dhe vajzës kanë prekur shumë shikues. Në vitin 2002, filmi "Vdiq njeriu që më donte shumë" fitoi 3 çmime: çmimin e filmit më të mirë, të regjisorit më të mirë dhe të aktores më të mirë të Festivalit të 6-të të Filmit të Changchunit të Kinës. Përveç këtyre, ky film fitoi me radhë edhe 15 çmime brenda e jashtë vendit.

Ma Liwen lindi në provincën Jiangxi të Kinës jugore. Në vitet '90 të shekullit të kaluar, ajo erdhi në Pekin për studime në Universitetin Qendror të Dramës. Për të gjetur një banesë, Ma Liwen vizitoi me biçikletë shumë shtëpi dhe më në fund mori me qira një dhomë të vogël. Pronarja e kësaj dhome ishte një zonjë e moshuar, midis tyre pati shumë episode. Vitin e kaluar, Ma Liwen dëgjoi se zonja e moshuar vdiq dhe në bazë të eksperiencës së vet, ajo xhiroi filmin "Ne të dy".

Filmi "Ne të dy" tregon për një zonjë e moshuar që ka një apartament të madh. Një ditë, një studente mori me qira një dhomë duke ndryshuar jetën e zonjës së moshuar. Ato të dyja grindeshin shpesh për gjëra të vogla. Por pas largimit të studentes, zonja e moshuar filloi të ketë mall për të. Më vonë ajo zonjë e moshuar vdiq duke i sjellë studentes një dhembje të madhe.

Pak kohë më parë, filmi "Ne të dy" fitoi çmimet e regjisorit më të mirë dhe të aktores më të mirë të Festivalit të Filmit të Kinës. Përveç këtyre çmimeve, ky film fitoi çmim edhe në Festivalin e 18-të të Filmit të Tokjos duke marrë vlerësimin e lartë të specialistëve.

"Ne të dy" është një film i thjeshtë dhe ka vetëm dy aktore kryesore. 97% e përmbajtjes së filmit i takon realitetit. Ma Liwen tha:

"Në këtë film xhirova kryesisht ndjenjat e vërteta midis zonjës së moshuar dhe studentes. Shumica e episodeve të filmit nga përvoja ime jetësore."

Duhet përmendur se për shkak të interpretimit të shkëlqyeshëm në film, aktorja 84-vjeçe Jin Yaqin u bë e famshme. Jin Yaqin është një aktore e dramës, kjo është hera e parë që ajo interpreton në film. Roli i zonjës së moshuar i interpretuar nga ajo u ka lënë shikuesve përshtypje të thellë. Pikërisht për shkak të këtij roli, Jin Yaqin fitoi çmimin e aktores më të mirë të Festivalit të Filmit të Tokjos dhe të Festivalit të Filmit të Kinës.

Ma Liwen tha se xhirimi i filmit është një proces me plot vështirësi dhe lodhje. Filmi i parë i saj filloi të përgatitet në vitin 1996 dhe deri në vitin 2000, ajo mbaroi xhirimin e filmit. Por pikërisht entuziazmi i saj për filmin e ka ndihmuar atë të harrojë lodhjen. Për regjisorë të rinj si Ma Liwen, është një gjë shumë e vështirë që të tërhiqen investime për xhirimin e filmit. Ma Liwen i ka prekur të gjithë njerëzit me sinqeritetin e saj.

Dy filmat e parë të Ma Liwenit nuk patën humbje në para, bile sollën pak fitime. Kjo u ka dhënë besim investorëve. Këtë vit, ajo do të xhirojë filmin e ri "Të dua" dhe për këtë ka marrë investime të shumta. Ky do të jetë një film që përshkruan dashurinë në qytet.

Për të xhiruar filmat, Ma Liwen ka kapërcyer vështirësi të panumërta. Për shkak të zënies me punë, deri më sot ajo nuk është martuar akoma, por ajo nuk pendohet sepse filmi është ideali i saj. (Fani)