Mesatarja e burimeve urimet ujore për frymë në Pekin nuk arrin as 300 metra kub, shifër kjo që është sa 1/8 e sasisë mesatare të gjithë vendit. Thatësira që ka vazhduar për 7 vjet me radhë ka keqësuar më tej gjendjen e mungesës së burimeve ujore të Pekinit. Bujqësia ka nevojë të madhe për ujë. Veçanërisht, ndërtimi i një bujqësie moderne në Pekin paraqit kërkesën më të madhe për modernizimin e ujitjes në fshat. Atëherë ç'duhet të bëjmë për të siguruar shfrytëzimin e vazhdueshëm të burimeve ujore, për të shtuar prodhimin bujqësor dhe të ardhurat e fshatarëve ?

Në fshatin Da Beiguan të zonës Pinggu të Pekinit, shumë fshatarë po punonin në plantacionet e veta të pjeshkëve.

"Shikoni, sa mirë janë sythat e pemëve, sivjet do të sigurojmë përsëri një prodhim të bollshëm", tha i gëzuar fshatari 52 vjeçar Zhang Baoli, duke treguar plantacionin e vet. Vitin e kaluar, nga 0,5 hektar tokë të mbjellë me pjeshkë ai fitoi 15 mijë juanë. Duke foluar për prodhimin e mirë të vitit të kaluar, ai tha se është zgjidhur mirë problemi i ujitjes.

Zona Pinggu e Pekinit është një zonë e njohur për kultivimin e pjeshkëve dhe fshatari Zhang Baoli është një bujk i aftë, por përse ai fitonte vetëm 6 mijë juanë në vit para disa vjetëve ?

"Mungonte uji, ndaj kokrrat e pjeshkëve ishin të vogla", tha Zhang Baoli. Dikur tokat e fshatit ujiteshin me ujërat e puseve nëpërmjet kanalit. Tokat e tij ujiteshin një herë në dy ditë, por kur uji mbërrintenë plantacionin e tij, mbetej shumë pak, sepse kishte depërtuar në tokë gjatë rrugës.

Në shtator të vitit 2004, fshati nisi veprën ujitëse me kursim. Kështu një tub i gjatë uji është futur në plantacionin e pjeshkëve të fshatarit Zhang, dhe ai filloi të ketë ujë të mjaftueshëm për ujitjen e plantacionit të vet, ndaj kokrrat e pjeshkëve të tij janë bërë të mëdha dhe të kuqe.

Zhang Qinghe, nënkryetar i Komitetit të fshatit Da Beiguan, u shpreh se tani të gjitha plantacionet e pjeshkëve të fshatit ujiten me tuba, kështu jo vetëm janë kursyer uji dhe krahët e punës, por edhe pjeshkët janë shitur mirë e të ardhurat e çdo familjeje fshatare u shtuan me 4 mijë juanë.

Modernizimi i ujitjes në fshat është një vepër sistematike. Fshatarët janë përdoruesit kryesorë të ujit gjatë ujitjes, prandaj duhet të rregullohen veprimet e tyre nëpërmjet krijimit të sistemit të administrimit demokratik të ujit.

"Tani sasia e përdorimit të ujit matet me kartë magnetike dhe paguhet sipas saj", tha fshatari Zhang Shizhuang. Dikur të gjithë paguanin njësoj pavarësisht se sa ujë ishte përdorur dhe si ujiteshin tokat, duke shkaktuar shpërdorim të madh të ujit dhe duke shtuar barrën fshatarëve.

Në vitin 2002, në këtë fshat u krijua Shoqata e përdoruesve të ujit, anëtarët e së cilës morën pjesë në hartimin e rregullores mbi furnizimin dhe administrimin e ujit. Tani çdo familje ka nga një kartë për të llogaritur sasinë e përdorimit të ujit. Kështu që përdorimi i ujit administrohet në mënyrë demokratike, të hapur dhe të transparente.

Dikur fshatari Zhang Shizhuang ujiste 3 herë në vit 0,2 hektar tokë të mbjellë me pjeshkë dhe paguante 400, 500 juanë, kurse tani ai pagon më pak se 100 juanë.

Sot 733 shoqata dhe grupe të përdoruesve të ujit në periferitë e Pekinit luajnë një rol shumë të madh në administrimin e ujit. Çdo vit kursehen 100 milionë metra kub ujë dhe në të njëjtën kohë, nëpërmjet përhapjes së teknologjisë së re të përdorimit të ujërave të shiut, të ujit të përdorur etj, është nxitur shumë zhvillimi i bujqësisë dhe janë shtuar të ardhurat e fshatarëve. ( Pina )