Të gjithë anëtarët e familjes mblidhen dhe hanë bashkë darkën e vigjiljes së Fesës së Pranverës, kjo është një traditë e kinezëve për të kremtuar këtë festë. Në të kaluarën shumica e kinezëve e hanin në shtëpi këtë darkë të rëndësishme, por tani, me shtimin e të ardhurave dhe të konsumit, gjithnjë e më shumë njerëz e hanë atë në restorante. Këtë vit, darkat e vigjiljes së festës në restorante të njohura të qyteteve të Pekinit, Shanghait, Chongqingut, Guanzhout etj. u porositën para 2 muajve. Kështu ndodhi edhe në restorantin e rosave të pjekura të Pekinit Quan Jiude. Përgjegjësja përkatëse e këtij restoranti zj. Liu Guifang parashikoi se vëllimi i biznesit të restorantit gjatë kësaj feste do të shënonte rekord të ri. Ajo tha:

"Edhe në restorantin tonë u porositën shumë darkat e vigjiljes së festës. Gjatë Festës së Pranverës të vitit të kaluar, të ardhurat e restoranteve të Shoqërisë "Quan Jiude" në Pekin arritën në 10 milionë juanë. Ne shpresojmë se këtë vit do të kemi të ardhura më të mira."

Siç parashikohej, të ardhurat e sektorit ushqimor gjatë kësaj feste ka mundësi t'i kalojnë 200 milionë juanët.

Pushimi 7 ditësh gjatë Festës së Pranverës u ka krijuar një shans të mirë kinezëve për turizëm. Zj. Chi Rui, një nuse e re që banon në qytetin Shenyang në veri-lindje të Kinës, i tha korrespondentit se do të shkonte për turizëm në Hongkong bashkë me të shoqin. Ajo tha:

"Ne duam të shkojmë në Hongkong për turizëm, por qëllimi kryesor është blerja e mallrave, sepse atje ka shumë mallra të markave të njohura dhe shiten me çmime të ulura gjatë festës. Kësaj here kemi në plan të harxhojmë 30-40 mijë juanë."

Edhe shumë kinezë të tjerë si çifti Chi Rui do të shkonin për turizëm në Hongkong, Makao dhe në zonën e Azisë jug-lindore.

Sipas të dhënave statistikore, turistët që shkojnë në vende të tjera janë kryesisht nga Pekini dhe Shanghai. Vitin e kaluar, numri i turistëve të këtyre dy qyteteve që shkuan në vende të tjera arriti përkatësisht në 32 mijë dhe 28 mijë veta. Profesori i Institutit të Ekonomisë pranë Universitetit të Popullit Kinez z. Gao Debu i tha korrespondentit se konsumi gjatë Festës së Pranverës ka nxitur në një farë shkalle rritjen ekonomike. Ai tha:

"Shtimi i konsumit të mallrave dhe konsumit të shërbimeve gjatë Festës së Pranverës ka luajtur një rol nxitës për tërë tregun. Kthimi i konsumit të mallrave në konsum të shërbimeve gjatë festës së këtij viti është një ndryshim i madh që pasqyron ngritjen e nivelit të jetesës së popullit. Biznesmenët duhet të zhvillojnë tregun e festës duke shfrytëzuar këtë prirje."

Z. Gao Debu u shpreh se gjatë Festës së Pranverës konsumi është shtuar pandërprerë si rezultat i rritjes së shpejtë të ekonomisë kineze. Vitet e fundit, rritja e ekonomisë kineze në vit është mbi 9%, të ardhurat e qytetarëve dhe fshatarëve janë shtuar dukshëm, ndërsa depozitat e banorëve janë rritur në mënyrë të qëndrueshme. Siç mësohet, edhe në zonat fshatare të pazhvilluara, treguesi i konsumit familjar gjatë Festës së Pranverës është ngritur shumë, fshatarët kanë blerë mallra të ndryshme për festën. Xing Hua, një grua e thjeshtë fshatare e provincës Shanxi në pjesën veriore të Kinës kishte planin e vet të konsumit gjatë festës:

"Unë kultivoj bimë mjekësore në fshat. Këtë vit fitova 5 mijë juanë, me këto para do t'u blej fëmijëve rroba të reja e do të blej edhe një motoçikletë."

Edhe biznesmenët e sektorit të turizmit, sektorit ushqimor, telekomunikacionit, transportit etj. kanë fituar shumë duke kapur mirë shansin tregtar të krijuar gjatë Festës së Pranverës. Sipas vlerësimit, tregu i konsumit gjatë Festës së Pranverës ka arritur në dhjetëra miliardë juanë.

Profesori Gao Debu i Institutit të Ekonomisë pranë Universitetit të Popullit Kinez vuri në dukje se si pasojë e disnivelit të të ardhurave, tani ekzistojnë ende dallime shumë të mëdha midis qytetit dhe fshatit në mënyrën e konsumit gjatë Festës së Pranverës. Konsumi i familjeve qytetare ka kaluar në konsum të shërbimeve, si në turizëm etj., ndërsa konsumi i pjesës më të madhe të familjeve fshatare përqendrohet ende në blerjen e mallrave. Duke marrë parasysh faktin se në Kinë ka 900 milionë fshatarë, në të ardhmen në tregun e konsumit të Festës së Pranverës ekziston një potencial shumë i madh zhvillimi. ( Pina )