Siç tha z. Hysen Hakani: "Zgjedhja e aktorit është gjysma e suksesit të filmit. Ndaj unë jam munduar, duke parë dhe anën vizive, tiparet burrërore te njëri, tiparet lirike te tjetri, sipas personazheve, pra të ishin tipa të ndryshëm nga njëri-tjetri. Por nuk ishin të gjithë të rinj, kishte edhe nga teatri. Në këtë film është edhe Lazri, por ai kishte rol episodik, ndërsa në teatër ka rol gati kryesor, por e mora se e kishte skalitur mirë rolin. Ose një aktor shumë i talentuar, Sandër Prosi, i cili mjerisht ka vdekur. Më vjen keq që një pjesë e madhe e personazheve të këtij filmi kanë vdekur."

Vajza ishte duke punuar në aksionet e rinisë. E pashë e m'u duk tip interesant. E futa në film e pas filmit ndoqi shkollën për aktore, e sot është edhe bashkëshortja e regjisorit Piro Mani, Pavlina Mani. Duke rrefyer rreth filmit " Oshëtimë në bregdet", ai përmendi aktorët kryesore të këtij filmi si Pavlina Mani që luante rolin e vajzës në aksionet e rinisë, Ndrekë Lucën që luante rolin e babait dhe Agim Shuken në rolin e djalit.

Pasi foli posaçërisht për Ndrekë Lucën, z, Hysen Hakani foli edhe për Kujtim Spahivoglin. Ai tha :

"Kujtim Spahivogli ka qenë bashkëmoshatar me mua, në një shkollë me mua, një vit më poshtë. Studioi në Bashkimin Sovjetik dhe ishte një ndër regjisorët më të talentuar që dolën në atë kohë. Ishte jo vetëm regjisor me kulturë të gjerë, por edhe aktor po ashtu kërkues ndaj vetes. Fatkeqësisht nuk jeton më. Edhe ai vdiq në rrethana tragjike. Por ata nuk kanë vdekur, jetojnë në zemrat tona, në mesin tonë, në dashurinë e madhe që ushqen populli, që edhe sot në 2005-n, shkon më tepër në filmat tanë të vjetër se në filmat e sotëm, e flet me më shumë pasion. Nuk e them këtë për vetëmburrje. Vetëmburrja është krejt e huaj për mua.

Tani lidhur me filmin, ne kemi një proverb shqiptar që thotë: "Nga trëndafili mbin gjembi dhe nga gjembi mbin trëndafili". Ka pasur plot raste, p. sh., kur i biri ishte me një organizatë që bashkëpunonte me fashistët, ndërsa e bija ishte e internuar në Prishtinë. Nuk ishin një kallëp, secili kishte bindjet e veta sipas formimit, sipas ndjenjave që kishte ndaj atdheut.

Pastaj z. Hysen Hakani foli edhe për Marie Logorecin që luajti rolin e nënës në këtë film. Ai tha : "Marie Logorecin e kam marrë unë për herë të parë në filmin "Fëmijët e saj". Ka qenë një aktore e dëgjuar e teatrit, ndër më të mirat e Shqipërisë. Në teatër ajo ka pasur mundësi të shpërthente më tepër, me role shumë më të qëlluara. Ndërmjet të tjerash luan dhe rolin e Lokes te "Toka jonë".

Nuk mund të lë mënjanë edhe Sandër Prosin e Kujtim Spahivoglin. Për Ndrekën kjo qe punë kolosale, se krijoi një rol që s'e mendonte kush të ishte ashtu. Edhe paruken e propozoi vetë, se i tillë ishte, të ngjitej si bleta. Një tjetër aktor është edhe Vangjush Furxhiu, që u bë ndër aktorët më të mirë të Teatrit Popullor dhe pedagog. Ai në këtë film luan rolin e Veipit, që është djali i sëmurë. Dhe ai ka xhiruar me mua filmin e parë. ( Zhai)