dëgjoni

Përdoruesit e kompjuterave gjithmonë kanë nevojë të ruajnë disa të dhëna në disqe kompjuteri. Sot kinezët parapëlqejnë më shumë t'i ruajnë të dhënat në një lloj disku që mund ta mbajnë në xhep. Ky lloj disku u quajt në gjuhën kineze "Shan Cun Pan", që do të thotë "disku i vetëtimës", por dikush e përktheu atë në anglishte "Flash disk" dhe dikush tjetër e përktheu atë në anglishte "Only disk".

Ky lloj disku është shpikur nga Kompania Aksionare Tekniko-shkencore "Langke" e qytetit Shenzhen të Kinës. Kjo shpikje vlerësohet si e vetmja shpikje e kinezëve në lëmin e ruajtjes së të dhënave të kompjuterit gjatë 20 vjetëve të fundit. Ky produkt është regjistruar me markën "You Pan", që do të thotë "Disku i shkëlqyeshëm". Meqenëse fjala kineze "You" tingëllon si emërtimi i shkronjës së anglishtes "U", pjesa më e madhe e kinezëve e quajnë atë "disku U".

Disku i markës kineze "You Pan" karakterizohet nga sasia e madhe e ruajtjes, nga trupi i vogël dhe nga qëndrueshmëria e funksionimit. Kompania Aksionare Tekniko-shkencore Langke e qytetit Shenzhen hodhi kohët e fundit në treg një produkt të ri me vëllimin ruajtjeje 4 G. Inspektori i përgjithshëm i kësaj kompanie, zoti Siang Feng tha:

"Ky lloj disku ka një trup shumë të vogël, sa një gisht, kurse vëllimi i punës së tij arrin në 4 G, sa 3000 disketa të buta. Si është nocioni i 3000 disketave të buta? Po të vihen një mbi një, lartësia e tyre do të jetë sa 3 kate të një ndërtese."

Pedagogu i Universitetit Jaiotong të Pekinit, zoti Fan Ming, që ka 3 vjet që përdor një "flash disk", tha:

"Disku im më shërben si një ndihmëse i pandarë. Ky lloj disku ka disa të mira: ka vëllim shumë të madh ruajtjeje , prandaj është shumë praktik; funksionon në mënyrë shumë qëndrueshme dhe të sigurt."

Zoti Fan tha se një ditë, disku i ra në ujë nga pakujdesia dhe ai pati frikë se mos zhdukeshin të gjitha të dhënat, që do t'i përdorte për mësimdhënie, dhe disa projekt disertacione, që ende nuk i kishte mbaruar së shkruari. Por, pasi disku u tha, ai e vuri në kompjuter dhe pa se gjithçka ishte në rregull, si të mos kishte ndodhur asgjë.

Ky produkt i Kompanisë Aksionare Tekniko-shkencore "Langke" të qytetit Shenzhen u hodh në treg për herë të parë në vitin 2000 dhe u njoh gjerësisht nga shoqëria pas dy vjetëve. Por aso kohe nuk kishte shumë konsumatorë që e blinin atë, sepse çmimi ishte shumë i lartë. Më vonë, për shkak se shumë ndërmarrje kineze dhe të vendeve të tjera filluan të prodhojnë në seri, çmimi u ul vazhdimisht dhe, si rezultat, ato disqe hynë gradualisht në jetën e masave të gjera popullore.

Tani, "Flash disku" nuk është më i formës së mëparshme, si një kuti shkrepësesh, dhe llojet e tij janë bërë të larmishme. Në zyrat e institucioneve ose në oborret e universiteteve, mund të shohësh që e disa varin një disk të tillë në qafë ose në gjoks. Këto disqe shumëngjyrëshe dhe të shndritshme sikur tregojnë prirjen e tyre për bukurinë. Një prej këtyre njerëzve është edhe studentja e Universitetit Jiaotong të Pekinit, zonjusha Sia Tien Tien. Ajo tha:

"Këto disqe duken elegante, të kënshme dhe kanë ngjyrë të bukur. Ky që kam unë, duket shumë i bukur, prandaj e dua shumë dhe e var në gjoks çdo ditë."

Para 2 muajve, Kompania Aksionare Tekniko-shkencore Langke e qytetit Shenzhen nxori produktin e saj të një brezi të ri, i cili ka të gjitha funksionet e fotodiskut dhe, siç thotë një person i kësaj kompanie, pas 3-5 vjetëve, ky lloj disku do të zëvendësojë 80% të funksioneve të fotodiskut.

(Zheng)