Në Lojërat Olimpike të Barcelonës të vitit 1992, pas garave eliminatore të notit në stilin flutur, Qian Hong ishte shumë e shqetësuar për shkak të presionit. Ajo mendonte: "Ah, sikur të bjer sa më shpejt një tërmet i fortë në Spanjë, që gara finale të shtyhet."

Në ditën e garës finale, nuk ra tërmet, nuk kishte keqardhje, por kishte vetëm presion dhe lodhje. Pas një gare të fortë, Qian Hong fitoi titullin kampione me kohën 58 sekonda e 62 të dhjetat, duke thyer rekordin olimpik të kësaj gare. Pas kësaj medaljeje të artë që e kishte pritur për 8 vjet, Qian Hong u ndje më në fund e lehtësuar.

Qian Hong ka lindur më 30 janar të vitit 1971 në qytetin Baoding të provincës Hebei të Kinës veriore. Kur ishte 9 vjeçe, ajo hyri në shkollën sportive të qytetit, duke filluar stërvitjen profesionale në sportin e notit. Në vitin 1983, Qian Hong hyri në ekipin e notit të provincës Hebei dhe 2 vjet më pas, ajo u pranua në kombëtaren kineze të notit dhe u përcaktua si notare e dalluar e Kinës. Në vitin 1986, në stafetën e notit në stilin e lirë, Qian Hong dhe shoqet e saj vendosën rekord të ri kombëtar. Ndërsa në Lojërat e 10-ta Aziatike, ajo fitoi medaljen e artë në garën e notit në stilin flutur me kohën 1 minutë 1 sekondë e 36 të qindtat. Krahas kësaj medaljeje të rëndësishme, Qian Hong fitoi edhe një medalje të artë në stafetën e notit në stilin e lirë 4x100 dhe një medalje të argjendtë në stafetën e notit të përzier. Kjo ishte një fillim i mrekullueshëm për Qian Hong-in.

Në vitin 1987 në kampionatin e notit "American Open", Qian Hong fitoi titullin kampione në garën e notit në stilin flutur me kohën 1 minutë 1 sekondë dhe 5 të qindtat. Kjo ishte koha e katërt më e mirë atë vit në botë. Në të njëjtën vitin në Spartakiadën e 6-të Kombëtare, Qian Hong fitoi medaljen e artë në garën e notit të stilit të fluturit me kohën 1 minutë e 45 të qindtat. Në prill të vitit 1988, Qian Hong mori pjesë në kampionatin e 3-të aziatik të notit dhe fitoi medaljen e artë në garën e stilit të fluturit me kohën 59 sekonda e 93 të qindtat. Ky ishte rezultati më i mirë në Azi. Në vitin 1988, Qian Hong mori pjesë për herë të parë në Lojërat Olimpike dhe fitoi një medalje të bronztë me kohën 59 sekonda e 52 të qindat. Pas këtyre rezultateve të mira, ajo u përcaktua si notare e dalluar botërore e atij viti. Në vitin 1990 në Lojërat Aziatike të Pekinit, Qian Hong fitoi një medalje të artë në stafetën e notit të përzier dhe dy medalje të argjendta në stilin flutur 100 metra dhe 200 metra. Në vitin 1991, në kampionatin botëror të notit, Qian Hong fitoi titullin kampione në stilin flutur 100 metra dhe 50 metra.

Por Qian Hong nuk u kënaq me arritjet e saj. "Megjithëse kam fituar shumë medalje, unë nuk kam fituar asnjëherë medaljen e artë olimpike. Në Barcelonë do të fitoj me doemos një medalje të artë për vete dhe për atdheun tim." Në vitin 1992, para Lojërave Olimpike të Barcelonës, gjendja shëndetësore e Qian Hong-ut nuk ishte e mirë dhe ajo u lodh shumë nga stërvitjet e rrënda. Shpeshherë, për shkak të lodhjes së madhe ajo stërvitej me lot në sy. Por Qian Hong ishte me vullnet dhe nuk hoqi dorë asnjëherë nga stërvitja. Në pragun e Lojërave Olimpike, u fol se notaret amerikane kishin pasur ngritje të madhe, prandaj trajneri i saj ndryshoi planin e stërvitjes dhe i kushtoi rëndësi cilësisë së stërvitjes. Ky ndryshim në stërvitje solli edhe rezultatin e mirë. Gjatë garës finale, Qian Hong u paraqit shumë mirë duke fituar në fund medaljen e artë olimpike me avantazh prej 12 të qindtash. Pasi mori vesh fitoren e saj, Qian Hong nuk foli asnjë fjalë dhe derdhi vetëm lot. Për këtë medalje të artë, ajo kishte luftuar për 12 vjet.

Në vitin 1993, pas Spartakiadës së 7-të Kombëtare, Qian Hong vendosi të mbyllë karrierën e saj sportive. Megjithëse ishte vetëm 22 vjeçe dhe rezultati i saj ishte ende më i miri në botë, Qian Hong mendoi: "Kam harxhuar shumë kohë me notin, tani duhet të ndryshoj mënyrën time të jetesës."

Në korrik të vitit 1994, me ftesën e Shoqatës së Notarëve Zhonghua, Qian Hong filloi të studiojë jashtë vendit. Në atë kohë, biznesi kishte forcë të madhe tërheqëse për secilin dhe të gjithë bisedonin çdo ditë për biznes. Nën ndikimin e këtij mjedisi, Qian Hong vendosi të hyjë në fushën tregtare. Për një kohë të gjatë, ajo ia kushtonte të gjithë vëmendjen mësimit dhe përgatitjes për fillimin e biznesit të saj.