Më 6 dhjetor të vitit 2005 erdha në bazën e perimeve të fshatit Tu Chengzi të qytetit Dalien, shkruan korrespondenti. Me të hyrë në serrën e perimeve të fshatarit Chang Yuxiu, më përfshiu një ajër i ngrohtë dhe aroma e këndshme e kastravecëve. "Kur dëgjon muzikë, ndien veten të frymëzuar, e gjithashtu kur dëgjojnë muzikën perimet, ka efekt shumë të mirë", tha Chang Yuxiu duke treguar një aparat në serrë. "Ky është një aparat me valë akustike. Pasi nisëm të përdorim këtë aparat, prodhimi i kastravecëve u shtua 26%, ata janë bërë më të shijshmëm e më të njomë dh e kushtojnë më shumë."

Pas kualifikimit, edhe fshatari Chan Yuxiu u bë specialist. Ai tha se teknika e valëve akustike mund t'i ndihmojë bimët të thithin më mirë ushqimet e ndryshme dhe t'i nxitë ato të rriten në mënyrë më të shëndetshme. Kështu kulturat bujqësore jo vetëm japin prodhime të larta, por janë edhe më rezistente ndaj sëmundjeve.

Siç mësohet, aparati me valë akustike është një nga 10 teknikat për shtimin e prodhimit bujqësor që janë zbatuar në vitin 2005 në qytetin Dalien. Në fshatrat e këtij qyteti u përdorën 260 aparate akustike, duke u sjellë fshatarëve 9,4 milionë juanë efektivitet ekonomik.

"Kam kultivuar tërë jetën patate, por asnjë herë nuk kam pasur prodhim kaq të bollshëm sa sivjet," tha bujku Wang Fujun nga fshati Xinjian i zonës së zhvillimit ekonomik të qytetit Dalien. Ai aplikoi këtë vit teknikën e mbulimit me pëlhurë plastmasi, mbolli 2 herë në vit dhe arriti efektivitet shumë të mirë. Si rezultat prodhimi i patates u shtua me 4,5 tonë për një hektar tokë.

Fshatari Wang Fujun i tha korrespondentit: Pas mbulimit me plastmas prodhimi i patateve u trifishua. Në të njëjtën kohë, pas vjeljes së patateve, ai mbolli po në këtë tokë rrepë. Kështu nga dy vjelje ai fitoi 60 mijë juanë për hektar në vitin 2005.

Specialistët thonë se nëpërmjet mbulimit të tokave me plastmas, mund të mbillen dy herë në vit. Sipas të dhënave statistikore, në vitin 2005, në 26 mijë hektarë tokë të qytetit Dalien u aplikua teknika e mbulimit me plastmas.

Pjesa jugore e provincës Liaoning quhet "zona e frutave". Kultura kryesore ekonomike këtu është molla. Për të ngritur cilësinë e frutave, në qytetin Dalien aplikohet teknika e mbulimit të kokrrave të mollës me qese.

Në fshatin Dong Matun të qytetit Wa Fandian, korrespondenti u takua me kryetarin e Shoqatës profesionale të mollëve Sun Jingzhon, i cili sapo nisi 200 mijë kilogramë mollë për në Moskë. Ai tha se qysh nga vjelja e mollëve në vjeshtë të vitit të kaluar, ai ka qenë shumë i zënë me shitjen e tyre. Në të kaluarën mollët e këtushme nuk shiteshin kollaj, por në vitin 2005 kjo gjendje ndryshoi. Sepse në 15 mijë plantacione të mollëve të kësaj shoqate u aplikua teknika e mbulimit të kokrrave molle me qese, si rezultat prodhimi i përgjithshëm i mollëve arriti në 20 milionë kilogramë dhe kultivuesit e mollëve fituan 68 milionë juanë.

Sipas të dhënave statistikore të Komitetit të Bujqësisë së qytetit Dalien, në vitin 2005, 680 mijë familje fshatare siguruan fitime nga 10 teknika bujqësore për shtimin e prodhimit, ndërsa të ardhurat e fshatarëve arritën në mbi 700 milionë juanë. (Pina)