"Më pëlqen shumë programi 'Jeta artistike', sepse në këtë program njerëzit mund të komunikojnë çiltër. Në këtë program ne përballemi sinqerisht me çdo të ftuar, me çdo shikues dhe me zemrën e tyre."

Programi "Jeta artistike" transmetohet një herë në javë dhe zgjat 50 minuta. Gjatë 5 vjetëve, më se 200 artistë kinezë kanë ardhur në këtë program për të treguar jetën e vet artistike. Në këtë program, pothuajse çdo i ftuar mund të ndiejë sinqeritetin dhe mirëkuptimin e drejtuesit të programit, si pasojë të ftuarit mund t'u tregojnë shikuesve mendimet e tyre të vërteta. Wang Zheng tha:

"Ne kërkojmë të vërtetën në programin 'Jeta artistike'. Sot në Kinë, njerëzve u mungon një vend ku të shkëmbehen ndjenjat. Kurse 'Jeta artistike' mund t'u japë artistëve një rast të tillë. Në programin tonë, shumë të ftuar ndajnë me shikuesit mendime të vërteta, madje edhe derdhin lot. Jam e mendimit se ky është shkaku kryesor që tërheq shikuesit."

Wang Zheng e përcaktoi moton kryesore të programit "Jeta artistike": "Të prekim zemrën me ndjenjat". Në çdo emision të programit, shikuesit mund të ndiejnë ndjenja të sinqerta ndaj artistëve. Wang Zheng tha:

"Në programin 'Jeta artistike', ne përballemi me artistë të famshëm. Dëshira ime më e madhe është që të bëhem mikesha e tyre. Edhe shumë artistë e konsiderojnë programin tonë si mikun e tyre."

Wang Zheng lindi në qytetin e lashtë Xian të Kinës perëndimore. Në vitin 1989, ajo u pranua në Universitetin e Transmetimit të Pekinit. Në vitin 1996, pas mbarimit të studimeve pasuniversitare, Wang Zheng nisi punën në qendrën artistike të Televizionit Qendror të Kinës. Pas një viti, 3 emisione të drejtuara nga ajo fituan "Çmimin e artit televiziv të Kinës". Për shkak të punës së shquar, në vitin 1999, 28-vjeçarja Wang Zheng u bë drejtoreshë e programit. Ajo ishte drejtoresha më e re e programit e Televizionit Qendror në atë kohë. Në korrik të vitit 2004, Wang Zheng u zgjodh një nga 10 të rinjtë më të shquar nga Drejtoria e Përgjithshme e Radio-Film-Televizionit e Kinës.

Në vitin 2000 kur programi "Jeta artistike" sapo ishte krijuar, Wang Zheng ishte shumë e zënë. Si drejtoreshë, ajo punonte për ditë. Çdo ditë ajo vinte e para në zyrë dhe largohej e fundit. Ajo respektonte çdo punonjës me qëllim që ata të mund ta shfaqnin plotësisht talentin e vet. Wang Zheng tha:

"E dua shumë këtë program dhe punën time. Shpresoj se dashuria ime ndaj programit do të ndikojë te çdo punonjës me qëllim që ata të luajnë plotësisht rolin e tyre. Programi 'Jeta artistike' duhet të mësojë pandërprerë nga përvojat e suksesshme, vetëm kështu, ky program do të jetë i gjallë dhe tërheqës."

Me rastin e Vitit të Ri 2006, Wang Zheng prodhoi një emision të posaçëm. Ajo ftoi aktorët, regjisorët dhe drejtorët më të famshëm të filmit të Kinës për të zhvilluar një bisedë. Pas transmetimit, ky emision u përshëndet nga shumë shikues.

Si drejtoreshë e një programi të famshëm, Wang Zheng shpreson se në programin e saj do të ketë gjithmonë gjëra të reja për të tërhequr më shumë shikues. (Fani)